स गत्वा सागरं राजा गङ्गयानुगतस् तदा । (१।१)

प्रविवेश तलं भूमेर् यत्र ते भस्मसात्कृताः ॥ (१।२)

भस्मन्य् अथाप्लुते राम गङ्गायाः सलिलेन वै । (२।१)

सर्वलोकप्रभुर् ब्रह्मा राजानम् इदम् अब्रवीत् ॥ (२।२)

तारिता नरशार्दूल दिवं याताश् च देववत् । (३।१)

षष्टिः पुत्रसहस्राणि सगरस्य महात्मनः ॥ (३।२)

सागरस्य जलं लोके यावत् स्थास्यति पार्थिव । (४।१)

सगरस्यात्मजास् तावत् स्वर्गे स्थास्यन्ति देववत् ॥ (४।२)

इयं च दुहिता ज्येष्ठा तव गङ्गा भविष्यति । (५।१)

त्वत्कृतेन च नाम्ना वै लोके स्थास्यति विश्रुता ॥ (५।२)

गङ्गा त्रिपथगा नाम दिव्या भागीरथीति च । (६।१)

त्रिपथो भावयन्तीति ततस् त्रिपथगा स्मृता ॥ (६।२)

पितामहानां सर्वेषां त्वम् अत्र मनुजाधिप । (७।१)

कुरुष्व सलिलं राजन् प्रतिज्ञाम् अपवर्जय ॥ (७।२)

पूर्वकेण हि ते राजंस् तेनातियशसा तदा । (८।१)

धर्मिणां प्रवरेणाथ नैष प्राप्तो मनोरथः ॥ (८।२)

तथैवांशुमता तात लोके ऽप्रतिमतेजसा । (९।१)

गङ्गां प्रार्थयता नेतुं प्रतिज्ञा नापवर्जिता ॥ (९।२)

राजर्षिणा गुणवता महर्षिसमतेजसा । (१०।१)

मत्तुल्यतपसा चैव क्षत्रधर्मस्थितेन च ॥ (१०।२)

दिलीपेन महाभाग तव पित्रातितेजसा । (११।१)

पुनर् न शङ्किता नेतुं गङ्गां प्रार्थयतानघ ॥ (११।२)

सा त्वया समतिक्रान्ता प्रतिज्ञा पुरुषर्षभ । (१२।१)

प्राप्तो ऽसि परमं लोके यशः परमसंमतम् ॥ (१२।२)

यच् च गङ्गावतरणं त्वया कृतम् अरिंदम । (१३।१)

अनेन च भवान् प्राप्तो धर्मस्यायतनं महत् ॥ (१३।२)

प्लावयस्व त्वम् आत्मानं नरोत्तम सदोचिते । (१४।१)

सलिले पुरुषव्याघ्र शुचिः पुण्यफलो भव ॥ (१४।२)

पितामहानां सर्वेषां कुरुष्व सलिलक्रियाम् । (१५।१)

स्वस्ति ते ऽस्तु गमिष्यामि स्वं लोकं गम्यतां नृप ॥ (१५।२)

इत्य् एवम् उक्त्वा देवेशः सर्वलोकपितामहः । (१६।१)

यथागतं तथागच्छद् देवलोकं महायशाः ॥ (१६।२)

भगीरथो ऽपि राजर्षिः कृत्वा सलिलम् उत्तमम् । (१७।१)

यथाक्रमं यथान्यायं सागराणां महायशाः । (१७।२)

कृतोदकः शुची राजा स्वपुरं प्रविवेश ह ॥ (१७।३)

समृद्धार्थो नरश्रेष्ठ स्वराज्यं प्रशशास ह । (१८।१)

प्रमुमोद च लोकस् तं नृपम् आसाद्य राघव । (१८।२)

नष्टशोकः समृद्धार्थो बभूव विगतज्वरः ॥ (१८।३)

एष ते राम गङ्गाया विस्तरो ऽभिहितो मया । (१९।१)

स्वस्ति प्राप्नुहि भद्रं ते संध्याकालो ऽतिवर्तते ॥ (१९।२)

धन्यं यशस्यम् आयुष्यं स्वर्ग्यं पुत्र्यम् अथापि च । (२०।१)

इदम् आख्यानम् आख्यातं गङ्गावतरणं मया ॥ (२०।२)