अथ तौ देशकालज्ञौ राजपुत्राव् अरिंदमौ । (१।१)

देशे काले च वाक्यज्ञाव् अब्रूतां कौशिकं वचः ॥ (१।२)

भगवञ् श्रोतुम् इच्छावो यस्मिन् काले निशाचरौ । (२।१)

संरक्षणीयौ तौ ब्रह्मन् नातिवर्तेत तत्क्षणम् ॥ (२।२)

एवं ब्रुवाणौ काकुत्स्थौ त्वरमाणौ युयुत्सया । (३।१)

सर्वे ते मुनयः प्रीताः प्रशशंसुर् नृपात्मजौ ॥ (३।२)

अद्य प्रभृति षड्रात्रं रक्षतं राघवौ युवाम् । (४।१)

दीक्षां गतो ह्य् एष मुनिर् मौनित्वं च गमिष्यति ॥ (४।२)

तौ तु तद् वचनं श्रुत्वा राजपुत्रौ यशस्विनौ । (५।१)

अनिद्रौ षडहोरात्रं तपोवनम् अरक्षताम् ॥ (५।२)

उपासां चक्रतुर् वीरौ यत्तौ परमधन्विनौ । (६।१)

ररक्षतुर् मुनिवरं विश्वामित्रम् अरिंदमौ ॥ (६।२)

अथ काले गते तस्मिन् षष्ठे ऽहनि समागते । (७।१)

सौमित्रम् अब्रवीद् रामो यत्तो भव समाहितः ॥ (७।२)

रामस्यैवं ब्रुवाणस्य त्वरितस्य युयुत्सया । (८।१)

प्रजज्वाल ततो वेदिः सोपाध्यायपुरोहिता ॥ (८।२)

मन्त्रवच् च यथान्यायं यज्ञो ऽसौ सम्प्रवर्तते । (९।१)

आकाशे च महाञ् शब्दः प्रादुरासीद् भयानकः ॥ (९।२)

आवार्य गगनं मेघो यथा प्रावृषि निर्गतः । (१०।१)

तथा मायां विकुर्वाणौ राक्षसाव् अभ्यधावताम् ॥ (१०।२)

मारीचश् च सुबाहुश् च तयोर् अनुचरास् तथा । (११।१)

आगम्य भीमसंकाशा रुधिरौघान् अवासृजन् ॥ (११।२)

ताव् आपतन्तौ सहसा दृष्ट्वा राजीवलोचनः । (१२।१)

लक्ष्मणं त्व् अभिसम्प्रेक्ष्य रामो वचनम् अब्रवीत् ॥ (१२।२)

पश्य लक्ष्मण दुर्वृत्तान् राक्षसान् पिशिताशनान् । (१३।१)

मानवास्त्रसमाधूतान् अनिलेन यथाघनान् ॥ (१३।२)

मानवं परमोदारम् अस्त्रं परमभास्वरम् । (१४।१)

चिक्षेप परमक्रुद्धो मारीचोरसि राघवः ॥ (१४।२)

स तेन परमास्त्रेण मानवेन समाहितः । (१५।१)

सम्पूर्णं योजनशतं क्षिप्तः सागरसम्प्लवे ॥ (१५।२)

विचेतनं विघूर्णन्तं शीतेषुबलपीडितम् । (१६।१)

निरस्तं दृश्य मारीचं रामो लक्ष्मणम् अब्रवीत् ॥ (१६।२)

पश्य लक्ष्मण शीतेषुं मानवं धर्मसंहितम् । (१७।१)

मोहयित्वा नयत्य् एनं न च प्राणैर् वियुज्यते ॥ (१७।२)

इमान् अपि वधिष्यामि निर्घृणान् दुष्टचारिणः । (१८।१)

राक्षसान् पापकर्मस्थान् यज्ञघ्नान् रुधिराशनान् ॥ (१८।२)

विगृह्य सुमहच् चास्त्रम् आग्नेयं रघुनन्दनः । (१९।१)

सुबाहूरसि चिक्षेप स विद्धः प्रापतद् भुवि ॥ (१९।२)

शेषान् वायव्यम् आदाय निजघान महायशाः । (२०।१)

राघवः परमोदारो मुनीनां मुदम् आवहन् ॥ (२०।२)

स हत्वा राक्षसान् सर्वान् यज्ञघ्नान् रघुनन्दनः । (२१।१)

ऋषिभिः पूजितस् तत्र यथेन्द्रो विजये पुरा ॥ (२१।२)

अथ यज्ञे समाप्ते तु विश्वामित्रो महामुनिः । (२२।१)

निरीतिका दिशो दृष्ट्वा काकुत्स्थम् इदम् अब्रवीत् ॥ (२२।२)

कृतार्थो ऽस्मि महाबाहो कृतं गुरुवचस् त्वया । (२३।१)

सिद्धाश्रमम् इदं सत्यं कृतं राम महायशः ॥ (२३।२)