सुकेशं धार्मिकं दृष्ट्वा वरलब्धं च राक्षसं । (१।१)

ग्रामणीर् नाम गन्धर्वो विश्वावसुसमप्रभः ॥ (१।२)

तस्य देववती नाम द्वितीया श्रीर् इवात्मजा । (२।१)

तां सुकेशाय धर्मेण ददौ दक्षः श्रियं यथा ॥ (२।२)

वरदानकृतैश्वर्यं सा तं प्राप्य पतिं प्रियम् । (३।१)

आसीद् देववती तुष्टा धनं प्राप्येव निर्धनः ॥ (३।२)

स तया सह संयुक्तो रराज रजनीचरः । (४।१)

अञ्जनाद् अभिनिष्क्रान्तः करेण्वेव महागजः ॥ (४।२)

देववत्यां सुकेशस्तु जनयामास राघव । (५।१)

त्रींस्त्रिनेत्रसमान् पुत्रान् राक्षसान् राक्षसाधिपः । (५।२)

माल्यवन्तं सुमालिं च मालिं च बलिनां वरम् ॥ (५।३)

त्रयो लोका इवाव्यग्राः स्थितास्त्रय इवाग्नयः । (६।१)

त्रयो मन्त्रा इवात्युग्रास्त्रयो घोरा इवामयाः ॥ (६।२)

त्रयः सुकेशस्य सुतास्त्रेताग्निसमवर्चसः । (७।१)

विवृद्धिम् अगमंस्तत्र व्याधयोपेक्षिता इव ॥ (७।२)

वरप्राप्तिं पितुस्ते तु ज्ञात्वैश्वर्यं ततो महत् । (८।१)

तपस्तप्तुं गता मेरुं भ्रातरः कृतनिश्चयाः ॥ (८।२)

प्रगृह्य नियमान् घोरान् राक्षसा नृपसत्तम । (९।१)

विचेरुस्ते तपो घोरं सर्वभूतभयावहम् ॥ (९।२)

सत्यार्जवदमोपेतैस्तपोभिर् भुवि दुष्करैः । (१०।१)

संतापयन्तस्त्रींल् लोकान् सदेवासुरमानुषान् ॥ (१०।२)

ततो विभुश्चतुर्वक्त्रो विमानवरम् आस्थितः । (११।१)

सुकेशपुत्रान् आमन्त्र्य वरदो ऽस्मीत्यभाषत ॥ (११।२)

ब्रह्माणं वरदं ज्ञात्वा सेन्द्रैर् देवगणैर् वृतम् । (१२।१)

ऊचुः प्राञ्जलयः सर्वे वेपमाना इव द्रुमाः ॥ (१२।२)

तपसाराधितो देव यदि नो दिशसे वरम् । (१३।१)

अजेयाः शत्रुहन्तारस्तथैव चिरजीविनः । (१३।२)

प्रभविष्णवो भवामेति परस्परम् अनुव्रताः ॥ (१३।३)

एवं भविष्यतीत्युक्त्वा सुकेशतनयान् प्रभुः । (१४।१)

प्रययौ ब्रह्मलोकाय ब्रह्मा ब्राह्मणवत्सलः ॥ (१४।२)

वरं लब्ध्वा ततः सर्वे राम रात्रिंचरास्तदा । (१५।१)

सुरासुरान् प्रबाधन्ते वरदानात् सुनिर्भयाः ॥ (१५।२)

तैर् वध्यमानास्त्रिदशाः सर्षिसंघाः सचारणाः । (१६।१)

त्रातारं नाधिगच्छन्ति निरयस्था यथा नराः ॥ (१६।२)

अथ ते विश्वकर्माणं शिल्पिनां वरम् अव्ययम् । (१७।१)

ऊचुः समेत्य संहृष्टा राक्षसा रघुसत्तम ॥ (१७।२)

गृहकर्ता भवान् एव देवानां हृदयेप्सितम् । (१८।१)

अस्माकम् अपि तावत् त्वं गृहं कुरु महामते ॥ (१८।२)

हिमवन्तं समाश्रित्य मेरुं मन्दरम् एव वा । (१९।१)

महेश्वरगृहप्रख्यं गृहं नः क्रियतां महत् ॥ (१९।२)

विश्वकर्मा ततस्तेषां राक्षसानां महाभुजः । (२०।१)

निवासं कथयामास शक्रस्येवामरावतीम् ॥ (२०।२)

दक्षिणस्योदधेस्तीरे त्रिकूटो नाम पर्वतः । (२१।१)

शिखरे तस्य शैलस्य मध्यमे ऽम्बुदसंनिभे । (२१।२)

शकुनैर् अपि दुष्प्रापे टङ्कच्छिन्नचतुर्दिशि ॥ (२१।३)

त्रिंशद्योजनविस्तीर्णा स्वर्णप्राकारतोरणा । (२२।१)

मया लङ्केति नगरी शक्राज्ञप्तेन निर्मिता ॥ (२२।२)

तस्यां वसत दुर्धर्षाः पुर्यां राक्षससत्तमाः । (२३।१)

अमरावतीं समासाद्य सेन्द्रा इव दिवौकसः ॥ (२३।२)

लङ्कादुर्गं समासाद्य राक्षसैर् बहुभिर् वृताः । (२४।१)

भविष्यथ दुराधर्षाः शत्रूणां शत्रुसूदनाः ॥ (२४।२)

विश्वकर्मवचः श्रुत्वा ततस्ते राम राक्षसाः । (२५।१)

सहस्रानुचरा गत्वा लङ्कां ताम् अवसन् पुरीम् ॥ (२५।२)

दृढप्राकारपरिखां हैमैर् गृहशतैर् वृताम् । (२६।१)

लङ्काम् अवाप्य ते हृष्टा विहरन्ति निशाचराः ॥ (२६।२)

नर्मदा नाम गन्धर्वी नानाधर्मसमेधिता । (२७।१)

तस्याः कन्यात्रयं ह्यासीद् धीश्रीकीर्तिसमद्युति ॥ (२७।२)

ज्येष्ठक्रमेण सा तेषां राक्षसानाम् अराक्षसी । (२८।१)

कन्यास्ताः प्रददौ हृष्टा पूर्णचन्द्रनिभाननाः ॥ (२८।२)

त्रयाणां राक्षसेन्द्राणां तिस्रो गन्धर्वकन्यकाः । (२९।१)

मात्रा दत्ता महाभागा नक्षत्रे भगदैवते ॥ (२९।२)

कृतदारास्तु ते राम सुकेशतनयाः प्रभो । (३०।१)

भार्याभिः सह चिक्रीडुर् अप्सरोभिर् इवामराः ॥ (३०।२)

तत्र माल्यवतो भार्या सुन्दरी नाम सुन्दरी । (३१।१)

स तस्यां जनयामास यद् अपत्यं निबोध तत् ॥ (३१।२)

वज्रमुष्टिर् विरूपाक्षो दुर्मुखश्चैव राक्षसः । (३२।१)

सुप्तघ्नो यज्ञकोपश्च मत्तोन्मत्तौ तथैव च । (३२।२)

अनला चाभवत् कन्या सुन्दर्यां राम सुन्दरी ॥ (३२।३)

सुमालिनो ऽपि भार्यासीत् पूर्णचन्द्रनिभानना । (३३।१)

नाम्ना केतुमती नाम प्राणेभ्यो ऽपि गरीयसी ॥ (३३।२)

सुमाली जनयामास यद् अपत्यं निशाचरः । (३४।१)

केतुमत्यां महाराज तन्निबोधानुपूर्वशः ॥ (३४।२)

प्रहस्तो ऽकम्पनैश्चैव विकटः कालकार्मुकः । (३५।१)

धूम्राक्षश्चाथ दण्डश्च सुपार्श्वश्च महाबलः ॥ (३५।२)

संह्रादिः प्रघसश्चैव भासकर्णश्च राक्षसः । (३६।१)

राका पुष्पोत्कटा चैव कैकसी च शुचिस्मिता । (३६।२)

कुम्भीनसी च इत्येते सुमालेः प्रसवाः स्मृताः ॥ (३६।३)

मालेस्तु वसुदा नाम गन्धर्वी रूपशालिनी । (३७।१)

भार्यासीत् पद्मपत्राक्षी स्वक्षी यक्षीवरोपमा ॥ (३७।२)

सुमालेर् अनुजस्तस्यां जनयामास यत् प्रभो । (३८।१)

अपत्यं कथ्यमानं तन्मया त्वं शृणु राघव ॥ (३८।२)

अनलश्चानिलश्चैव हरः संपातिर् एव च । (३९।१)

एते विभीषणामात्या मालेयास्ते निशाचराः ॥ (३९।२)

ततस्तु ते राक्षसपुंगवास्त्रयो निशाचरैः पुत्रशतैश्च संवृताः । (४०।१)

सुरान् सहेन्द्रान् ऋषिनागदानवान् बबाधिरे ते बलवीर्यदर्पिताः ॥ (४०।२)

जगद् भ्रमन्तो ऽनिलवद् दुरासदा रणे च मृत्युप्रतिमाः समाहिताः । (४१।१)

वरप्रदानाद् अभिगर्विता भृशं क्रतुक्रियाणां प्रशमंकराः सदा ॥ (४१।२)