तेन शङ्खविमिश्रेण भेरीशब्देन राघवः । (१।१)

उपयातो महाबाहू रामः परपुरंजयः ॥ (१।२)

तं निनादं निशम्याथ रावणो राक्षसेश्वरः । (२।१)

मुहूर्तं ध्यानम् आस्थाय सचिवान् अभ्युदैक्षत ॥ (२।२)

अथ तान् सचिवांस्तत्र सर्वान् आभाष्य रावणः । (३।१)

सभां संनादयन् सर्वाम् इत्युवाच महाबलः ॥ (३।२)

तरणं सागरस्यापि विक्रमं बलसंचयम् । (४।१)

यद् उक्तवन्तो रामस्य भवन्तस्तन्मया श्रुतम् । (४।२)

भवतश्चाप्यहं वेद्मि युद्धे सत्यपराक्रमान् ॥ (४।३)

ततस्तु सुमहाप्राज्ञो माल्यवान्नाम राक्षसः । (५।१)

रावणस्य वचः श्रुत्वा मातुः पैतामहो ऽब्रवीत् ॥ (५।२)

विद्यास्वभिविनीतो यो राजा राजन्नयानुगः । (६।१)

स शास्ति चिरम् ऐश्वर्यम् अरींश्च कुरुते वशे ॥ (६।२)

संदधानो हि कालेन विगृह्णंश्चारिभिः सह । (७।१)

स्वपक्षवर्धनं कुर्वन्महद् ऐश्वर्यम् अश्नुते ॥ (७।२)

हीयमानेन कर्तव्यो राज्ञा संधिः समेन च । (८।१)

न शत्रुम् अवमन्येत ज्यायान् कुर्वीत विग्रहम् ॥ (८।२)

तन्मह्यं रोचते संधिः सह रामेण रावण । (९।१)

यदर्थम् अभियुक्ताः स्म सीता तस्मै प्रदीयताम् ॥ (९।२)

तस्य देवर्षयः सर्वे गन्धर्वाश्च जयैषिणः । (१०।१)

विरोधं मा गमस्तेन संधिस्ते तेन रोचताम् ॥ (१०।२)

असृजद् भगवान् पक्षौ द्वावेव हि पितामहः । (११।१)

सुराणाम् असुराणां च धर्माधर्मौ तदाश्रयौ ॥ (११।२)

धर्मो हि श्रूयते पक्षः सुराणां च महात्मनाम् । (१२।१)

अधर्मो रक्षसां पक्षो ह्यसुराणां च रावण ॥ (१२।२)

धर्मो वै ग्रसते ऽधर्मं ततः कृतम् अभूद् युगम् । (१३।१)

अधर्मो ग्रसते धर्मं ततस्तिष्यः प्रवर्तते ॥ (१३।२)

तत् त्वया चरता लोकान् धर्मो विनिहतो महान् । (१४।१)

अधर्मः प्रगृहीतश्च तेनास्मद्बलिनः परे ॥ (१४।२)

स प्रमादाद् विवृद्धस्ते ऽधर्मो ऽहिर् ग्रसते हि नः । (१५।१)

विवर्धयति पक्षं च सुराणां सुरभावनः ॥ (१५।२)

विषयेषु प्रसक्तेन यत्किंचित्कारिणा त्वया । (१६।१)

ऋषीणाम् अग्निकल्पानाम् उद्वेगो जनितो महान् । (१६।२)

तेषां प्रभावो दुर्धर्षः प्रदीप्त इव पावकः ॥ (१६।३)

तपसा भावितात्मानो धर्मस्यानुग्रहे रताः । (१७।१)

मुख्यैर् यज्ञैर् यजन्त्येते नित्यं तैस्तैर् द्विजातयः ॥ (१७।२)

जुह्वत्यग्नींश्च विधिवद् वेदांश्चोच्चैर् अधीयते । (१८।१)

अभिभूय च रक्षांसि ब्रह्मघोषान् उदैरयन् । (१८।२)

दिशो विप्रद्रुताः सर्वे स्तनयित्नुर् इवोष्णगे ॥ (१८।३)

ऋषीणाम् अग्निकल्पानाम् अग्निहोत्रसमुत्थितः । (१९।१)

आदत्ते रक्षसां तेजो धूमो व्याप्य दिशो दश ॥ (१९।२)

तेषु तेषु च देशेषु पुण्येषु च दृढव्रतैः । (२०।१)

चर्यमाणं तपस्तीव्रं संतापयति राक्षसान् ॥ (२०।२)

उत्पातान् विविधान् दृष्ट्वा घोरान् बहुविधांस्तथा । (२१।१)

विनाशम् अनुपश्यामि सर्वेषां रक्षसाम् अहम् ॥ (२१।२)

खराभिस्तनिता घोरा मेघाः प्रतिभयंकरः । (२२।१)

शोणितेनाभिवर्षन्ति लङ्काम् उष्णेन सर्वतः ॥ (२२।२)

रुदतां वाहनानां च प्रपतन्त्यस्रबिन्दवः । (२३।१)

ध्वजा ध्वस्ता विवर्णाश्च न प्रभान्ति यथापुरम् ॥ (२३।२)

व्याला गोमायवो गृध्रा वाशन्ति च सुभैरवम् । (२४।१)

प्रविश्य लङ्काम् अनिशं समवायांश्च कुर्वते ॥ (२४।२)

कालिकाः पाण्डुरैर् दन्तैः प्रहसन्त्यग्रतः स्थिताः । (२५।१)

स्त्रियः स्वप्नेषु मुष्णन्त्यो गृहाणि प्रतिभाष्य च ॥ (२५।२)

गृहाणां बलिकर्माणि श्वानः पर्युपभुञ्जते । (२६।१)

खरा गोषु प्रजायन्ते मूषिका नकुलैः सह ॥ (२६।२)

मार्जारा द्वीपिभिः सार्धं सूकराः शुनकैः सह । (२७।१)

किंनरा राक्षसैश्चापि समेयुर् मानुषैः सह ॥ (२७।२)

पाण्डुरा रक्तपादाश्च विहगाः कालचोदिताः । (२८।१)

राक्षसानां विनाशाय कपोता विचरन्ति च ॥ (२८।२)

चीचीकूचीति वाशन्त्यः शारिका वेश्मसु स्थिताः । (२९।१)

पतन्ति ग्रथिताश्चापि निर्जिताः कलहैषिणः ॥ (२९।२)

करालो विकटो मुण्डः पुरुषः कृष्णपिङ्गलः । (३०।१)

कालो गृहाणि सर्वेषां काले काले ऽन्ववेक्षते । (३०।२)

एतान्यन्यानि दुष्टानि निमित्तान्युत्पतन्ति च ॥ (३०।३)

विष्णुं मन्यामहे रामं मानुषं देहम् आस्थितम् । (३१।१)

न हि मानुषमात्रो ऽसौ राघवो दृढविक्रमः ॥ (३१।२)

येन बद्धः समुद्रस्य स सेतुः परमाद्भुतः । (३२।१)

कुरुष्व नरराजेन संधिं रामेण रावण ॥ (३२।२)

इदं वचस्तत्र निगद्य माल्यवान् परीक्ष्य रक्षोऽधिपतेर् मनः पुनः । (३३।१)

अनुत्तमेषूत्तमपौरुषो बली बभूव तूष्णीं समवेक्ष्य रावणम् ॥ (३३।२)