एवम् उक्तस्तु रामेण परां व्रीडाम् उपागतः । (१।१)

शत्रुघ्नो वीर्यसम्पन्नो मन्दं मन्दम् उवाच ह ॥ (१।२)

अवश्यं करणीयं च शासनं पुरुषर्षभ । (२।१)

तव चैव महाभाग शासनं दुरतिक्रमम् । (२।२)

अयं कामकरो राजंस्तवास्मि पुरुषर्षभ ॥ (२।३)

एवम् उक्ते तु शूरेण शत्रुघ्नेन महात्मना । (३।१)

उवाच रामः संहृष्टो लक्ष्मणं भरतं तथा ॥ (३।२)

संभारान् अभिषेकस्य आनयध्वं समाहिताः । (४।१)

अद्यैव पुरुषव्याघ्रम् अभिषेक्ष्यामि दुर्जयम् ॥ (४।२)

पुरोधसं च काकुत्स्थौ नैगमान् ऋत्विजस्तथा । (५।१)

मन्त्रिणश्चैव मे सर्वान् आनयध्वं ममाज्ञया ॥ (५।२)

राज्ञः शासनम् आज्ञाय तथाकुर्वन् महारथः । (६।१)

अभिषेकसमारम्भं पुरस्कृत्य पुरोधसं । (६।२)

प्रविष्टा राजभवनं पुरंदरगृहोपमम् ॥ (६।३)

ततो ऽभिषेको ववृधे शत्रुघ्नस्य महात्मनः । (७।१)

सम्प्रहर्षकरः श्रीमान् राघवस्य पुरस्य च ॥ (७।२)

ततो ऽभिषिक्तं शत्रुघ्नम् अङ्कम् आरोप्य राघवः । (८।१)

उवाच मधुरां वाणीं तेजस्तस्याभिपूरयन् ॥ (८।२)

अयं शरस्त्वमोघस्ते दिव्यः परपुरंजयः । (९।१)

अनेन लवणं सौम्य हन्तासि रघुनन्दन ॥ (९।२)

सृष्टः शरो ऽयं काकुत्स्थ यदा शेते महार्णवे । (१०।१)

स्वयम्भूर् अजितो देवो यं नापश्यन् सुरासुराः ॥ (१०।२)

अदृश्यः सर्वभूतानां तेनायं हि शरोत्तमः । (११।१)

सृष्टः क्रोधाभिभूतेन विनाशार्थं दुरात्मनोः । (११।२)

मधुकैटभयोर् वीर विघाते वर्तमानयोः ॥ (११।३)

स्रष्टुकामेन लोकांस्त्रींस्तौ चानेन हतौ युधि । (१२।१)

अनेन शरमुख्येन ततो लोकांश्चकार सः ॥ (१२।२)

नायं मया शरः पूर्वं रावणस्य वधार्थिना । (१३।१)

मुक्तः शत्रुघ्न भूतानां महांस्त्रासो भवेद् इति ॥ (१३।२)

यच्च तस्य महच्छूलं त्र्यम्बकेण महात्मना । (१४।१)

दत्तं शत्रुविनाशाय मधोर् आयुधम् उत्तमम् ॥ (१४।२)

तत् संनिक्षिप्य भवने पूज्यमानं पुनः पुनः । (१५।१)

दिशः सर्वाः समालोक्य प्राप्नोत्याहारम् आत्मनः ॥ (१५।२)

यदा तु युद्धम् आकाङ्क्षन् कश्चिद् एनं समाह्वयेत् । (१६।१)

तदा शूलं गृहीत्वा तद् भस्म रक्षः करोति तम् ॥ (१६।२)

स त्वं पुरुषशार्दूल तम् आयुधविवर्जितम् । (१७।१)

अप्रविष्टपुरं पूर्वं द्वारि तिष्ठ धृतायुधः ॥ (१७।२)

अप्रविष्टं च भवनं युद्धाय पुरुषर्षभ । (१८।१)

आह्वयेथा महाबाहो ततो हन्तासि राक्षसं ॥ (१८।२)

अन्यथा क्रियमाणे तु अवध्यः स भविष्यति । (१९।१)

यदि त्वेवं कृते वीर विनाशम् उपयास्यति ॥ (१९।२)

एतत् ते सर्वम् आख्यातं शूलस्य च विपर्ययम् । (२०।१)

श्रीमतः शितिकण्ठस्य कृत्यं हि दुरतिक्रमम् ॥ (२०।२)