तां रात्रिम् उषितं रामं सुखोत्थितम् अरिंदमम् । (१।१)

अब्रवीत् प्राञ्जलिर् वाक्यं जयं पृष्ट्वा विभीषणः ॥ (१।२)

स्नानानि चाङ्गरागाणि वस्त्राण्याभरणानि च । (२।१)

चन्दनानि च दिव्यानि माल्यानि विविधानि च ॥ (२।२)

अलंकारविदश्चेमा नार्यः पद्मनिभेक्षणाः । (३।१)

उपस्थितास्त्वां विधिवत् स्नापयिष्यन्ति राघव ॥ (३।२)

एवम् उक्तस्तु काकुत्स्थः प्रत्युवाच विभीषणम् । (४।१)

हरीन् सुग्रीवमुख्यांस्त्वं स्नानेनोपनिमन्त्रय ॥ (४।२)

स तु ताम्यति धर्मात्मा मम हेतोः सुखोचितः । (५।१)

सुकुमारो महाबाहुः कुमारः सत्यसंश्रवः ॥ (५।२)

तं विना कैकेयीपुत्रं भरतं धर्मचारिणम् । (६।१)

न मे स्नानं बहुमतं वस्त्राण्याभरणानि च ॥ (६।२)

इत एव पथा क्षिप्रं प्रतिगच्छाम तां पुरीम् । (७।१)

अयोध्याम् आयतो ह्येष पन्थाः परमदुर्गमः ॥ (७।२)

एवम् उक्तस्तु काकुत्स्थं प्रत्युवाच विभीषणः । (८।१)

अह्ना त्वां प्रापयिष्यामि तां पुरीं पार्थिवात्मज ॥ (८।२)

पुष्पकं नाम भद्रं ते विमानं सूर्यसंनिभम् । (९।१)

मम भ्रातुः कुबेरस्य रावणेनाहृतं बलात् ॥ (९।२)

तद् इदं मेघसंकाशं विमानम् इह तिष्ठति । (१०।१)

तेन यास्यसि यानेन त्वम् अयोध्यां गतज्वरः ॥ (१०।२)

अहं ते यद्यनुग्राह्यो यदि स्मरसि मे गुणान् । (११।१)

वस तावद् इह प्राज्ञ यद्यस्ति मयि सौहृदम् ॥ (११।२)

लक्ष्मणेन सह भ्रात्रा वैदेह्या चापि भार्यया । (१२।१)

अर्चितः सर्वकामैस्त्वं ततो राम गमिष्यसि ॥ (१२।२)

प्रीतियुक्तस्तु मे राम ससैन्यः ससुहृद्गणः । (१३।१)

सत्क्रियां विहितां तावद् गृहाण त्वं मयोद्यताम् ॥ (१३।२)

प्रणयाद् बहुमानाच्च सौहृदेन च राघव । (१४।१)

प्रसादयामि प्रेष्यो ऽहं न खल्वाज्ञापयामि ते ॥ (१४।२)

एवम् उक्तस्ततो रामः प्रत्युवाच विभीषणम् । (१५।१)

रक्षसां वानराणां च सर्वेषां चोपशृण्वताम् ॥ (१५।२)

पूजितो ऽहं त्वया वीर साचिव्येन परंतप । (१६।१)

सर्वात्मना च चेष्टिभिः सौहृदेनोत्तमेन च ॥ (१६।२)

न खल्वेतन्न कुर्यां ते वचनं राक्षसेश्वर । (१७।१)

तं तु मे भ्रातरं द्रष्टुं भरतं त्वरते मनः ॥ (१७।२)

मां निवर्तयितुं यो ऽसौ चित्रकूटम् उपागतः । (१८।१)

शिरसा याचतो यस्य वचनं न कृतं मया ॥ (१८।२)

कौसल्यां च सुमित्रां च कैकेयीं च यशस्विनीम् । (१९।१)

गुरूंश्च सुहृदश्चैव पौरांश्च तनयैः सह ॥ (१९।२)

उपस्थापय मे क्षिप्रं विमानं राक्षसेश्वर । (२०।१)

कृतकार्यस्य मे वासः कथंचिद् इह संमतः ॥ (२०।२)

अनुजानीहि मां सौम्य पूजितो ऽस्मि विभीषण । (२१।१)

मन्युर् न खलु कर्तव्यस्त्वरितस्त्वानुमानये ॥ (२१।२)

ततः काञ्चनचित्राङ्गं वैदूर्यमणिवेदिकम् । (२२।१)

कूटागारैः परिक्षिप्तं सर्वतो रजतप्रभम् ॥ (२२।२)

पाण्डुराभिः पताकाभिर् ध्वजैश्च समलंकृतम् । (२३।१)

शोभितं काञ्चनैर् हर्म्यैर् हेमपद्मविभूषितम् ॥ (२३।२)

प्रकीर्णं किङ्किणीजालैर् मुक्तामणिगवाक्षितम् । (२४।१)

घण्टाजालैः परिक्षिप्तं सर्वतो मधुरस्वनम् ॥ (२४।२)

तन्मेरुशिखराकारं निर्मितं विश्वकर्मणा । (२५।१)

बहुभिर् भूषितं हर्म्यैर् मुक्तारजतसंनिभैः ॥ (२५।२)

तलैः स्फटिकचित्राङ्गैर् वैदूर्यैश्च वरासनैः । (२६।१)

महार्हास्तरणोपेतैर् उपपन्नं महाधनैः ॥ (२६।२)

उपस्थितम् अनाधृष्यं तद् विमानं मनोजवम् । (२७।१)

निवेदयित्वा रामाय तस्थौ तत्र विभीषणः ॥ (२७।२)