वैशंपायन उवाच । (१।१)

ततस्ते नरशार्दूला भ्रातरः पञ्च पाण्डवाः । (१।२)

ब्रह्मरूपधराः पार्था जटिला ब्रह्मचारिणः । (१।३)

प्रययुर् द्रौपदीं द्रष्टुं तं च देवमहोत्सवम् ॥ (१।४)

ते प्रयाता नरव्याघ्रा मात्रा सह परंतपाः । (२।१)

ब्राह्मणान् ददृशुर् मार्गे गच्छतः सगणान् बहून् ॥ (२।२)

तान् ऊचुर् ब्राह्मणा राजन् पाण्डवान् ब्रह्मचारिणः । (३।१)

क्व भवन्तो गमिष्यन्ति कुतो वागच्छतेति ह ॥ (३।२)

युधिष्ठिर उवाच । (४।१)

आगतान् एकचक्रायाः सोदर्यान् देवदर्शिनः । (४।२)

भवन्तो हि विजानन्तु सहितान् मातृचारिणः ॥ (४।३)

ब्राह्मणा ऊचुः । (५।१)

गच्छताद्यैव पाञ्चालान् द्रुपदस्य निवेशनम् । (५।२)

स्वयंवरो महांस्तत्र भविता सुमहाधनः ॥ (५।३)

एकसार्थं प्रयाताः स्मो वयम् अप्यत्र गामिनः । (६।१)

तत्र ह्यद्भुतसंकाशो भविता सुमहोत्सवः ॥ (६।२)

यज्ञसेनस्य दुहिता द्रुपदस्य महात्मनः । (७।१)

वेदीमध्यात् समुत्पन्ना पद्मपत्रनिभेक्षणा ॥ (७।२)

दर्शनीयानवद्याङ्गी सुकुमारी मनस्विनी । (८।१)

धृष्टद्युम्नस्य भगिनी द्रोणशत्रोः प्रतापिनः ॥ (८।२)

यो जातः कवची खड्गी सशरः सशरासनः । (९।१)

सुसमिद्धे महाबाहुः पावके पावकप्रभः । (९।२)

यस्मिन् संजायमाने च वाग् उवाचाशरीरिणी । (९।३)

एष शिष्यश्च मृत्युश्च भरद्वाजस्य जायते ॥ (९।४)

स्वसा तस्यानवद्याङ्गी द्रौपदी तनुमध्यमा । (१०।१)

नीलोत्पलसमो गन्धो यस्याः क्रोशात् प्रवायति ॥ (१०।२)

तां यज्ञसेनस्य सुतां स्वयंवरकृतक्षणाम् । (११।१)

गच्छामहे वयं द्रष्टुं तं च देवमहोत्सवम् ॥ (११।२)

राजानो राजपुत्राश्च यज्वानो भूरिदक्षिणाः । (१२।१)

स्वाध्यायवन्तः शुचयो महात्मानो यतव्रताः ॥ (१२।२)

तरुणा दर्शनीयाश्च नानादेशसमागताः । (१३।१)

महारथाः कृतास्त्राश्च समुपैष्यन्ति भूमिपाः ॥ (१३।२)

ते तत्र विविधान् दायान् विजयार्थं नरेश्वराः । (१४।१)

प्रदास्यन्ति धनं गाश्च भक्ष्यं भोज्यं च सर्वशः ॥ (१४।२)

प्रतिगृह्य च तत् सर्वं दृष्ट्वा चैव स्वयंवरम् । (१५।१)

अनुभूयोत्सवं चैव गमिष्यामो यथेप्सितम् ॥ (१५।२)

नटा वैतालिकाश्चैव नर्तकाः सूतमागधाः । (१६।१)

नियोधकाश्च देशेभ्यः समेष्यन्ति महाबलाः ॥ (१६।२)

एवं कौतूहलं कृत्वा दृष्ट्वा च प्रतिगृह्य च । (१७।१)

सहास्माभिर् महात्मानः पुनः प्रतिनिवर्त्स्यथ ॥ (१७।२)

दर्शनीयांश्च वः सर्वान् देवरूपान् अवस्थितान् । (१८।१)

समीक्ष्य कृष्णा वरयेत् संगत्यान्यतमं वरम् ॥ (१८।२)

अयं भ्राता तव श्रीमान् दर्शनीयो महाभुजः । (१९।१)

नियुध्यमानो विजयेत् संगत्या द्रविणं बहु । (१९।२)

आहरिष्यन्न् अयं नूनं प्रीतिं वो वर्धयिष्यति ॥ (१९।३)

युधिष्ठिर उवाच । (२०।१)

परमं भो गमिष्यामो द्रष्टुं देवमहोत्सवम् । (२०।२)

भवद्भिः सहिताः सर्वे कन्यायास्तं स्वयंवरम् ॥ (२०।३)