वैशंपायन उवाच । (१।१)

स प्रविश्य यथान्यायं पाण्डवानां निवेशनम् । (१।२)

पितामहीम् अभ्यवदत् साम्ना परमवल्गुना ॥ (१।३)

तथा चित्राङ्गदा देवी कौरव्यस्यात्मजापि च । (२।१)

पृथां कृष्णां च सहिते विनयेनाभिजग्मतुः । (२।२)

सुभद्रां च यथान्यायं याश्चान्याः कुरुयोषितः ॥ (२।३)

ददौ कुन्ती ततस्ताभ्यां रत्नानि विविधानि च । (३।१)

द्रौपदी च सुभद्रा च याश्चाप्यन्या ददुः स्त्रियः ॥ (३।२)

ऊषतुस्तत्र ते देव्यौ महार्हशयनासने । (४।१)

सुपूजिते स्वयं कुन्त्या पार्थस्य प्रियकाम्यया ॥ (४।२)

स च राजा महावीर्यः पूजितो बभ्रुवाहनः । (५।१)

धृतराष्ट्रं महीपालम् उपतस्थे यथाविधि ॥ (५।२)

युधिष्ठिरं च राजानं भीमादींश्चापि पाण्डवान् । (६।१)

उपगम्य महातेजा विनयेनाभ्यवादयत् ॥ (६।२)

स तैः प्रेम्णा परिष्वक्तः पूजितश्च यथाविधि । (७।१)

धनं चास्मै ददुर् भूरि प्रीयमाणा महारथाः ॥ (७।२)

तथैव स महीपालः कृष्णं चक्रगदाधरम् । (८।१)

प्रद्युम्न इव गोविन्दं विनयेनोपतस्थिवान् ॥ (८।२)

तस्मै कृष्णो ददौ राज्ञे महार्हम् अभिपूजितम् । (९।१)

रथं हेमपरिष्कारं दिव्याश्वयुजम् उत्तमम् ॥ (९।२)

धर्मराजश्च भीमश्च यमजौ फल्गुनस्तथा । (१०।१)

पृथक् पृथग् अतीवैनं मानार्हं समपूजयन् ॥ (१०।२)

ततस्तृतीये दिवसे सत्यवत्याः सुतो मुनिः । (११।१)

युधिष्ठिरं समभ्येत्य वाग्मी वचनम् अब्रवीत् ॥ (११।२)

अद्य प्रभृति कौन्तेय यजस्व समयो हि ते । (१२।१)

मुहूर्तो यज्ञियः प्राप्तश्चोदयन्ति च याजकाः ॥ (१२।२)

अहीनो नाम राजेन्द्र क्रतुस्ते ऽयं विकल्पवान् । (१३।१)

बहुत्वात् काञ्चनस्यास्य ख्यातो बहुसुवर्णकः ॥ (१३।२)

एवम् एव महाराज दक्षिणां त्रिगुणां कुरु । (१४।१)

त्रित्वं व्रजतु ते राजन् ब्राह्मणा ह्यत्र कारणम् ॥ (१४।२)

त्रीन् अश्वमेधान् अत्र त्वं सम्प्राप्य बहुदक्षिणान् । (१५।१)

ज्ञातिवध्याकृतं पापं प्रहास्यसि नराधिप ॥ (१५।२)

पवित्रं परमं ह्येतत् पावनानां च पावनम् । (१६।१)

यद् अश्वमेधावभृथं प्राप्स्यसे कुरुनन्दन ॥ (१६।२)

इत्युक्तः स तु तेजस्वी व्यासेनामिततेजसा । (१७।१)

दीक्षां विवेश धर्मात्मा वाजिमेधाप्तये तदा । (१७।२)

नराधिपः प्रायजत वाजिमेधं महाक्रतुम् ॥ (१७।३)

तत्र वेदविदो राजंश्चक्रुः कर्माणि याजकाः । (१८।१)

परिक्रमन्तः शास्त्रज्ञा विधिवत् साधुशिक्षिताः ॥ (१८।२)

न तेषां स्खलितं तत्र नासीद् अपहुतं तथा । (१९।१)

क्रमयुक्तं च युक्तं च चक्रुस्तत्र द्विजर्षभाः ॥ (१९।२)

कृत्वा प्रवर्ग्यं धर्मज्ञा यथावद् द्विजसत्तमाः । (२०।१)

चक्रुस्ते विधिवद् राजंस्तथैवाभिषवं द्विजाः ॥ (२०।२)

अभिषूय ततो राजन् सोमं सोमपसत्तमाः । (२१।१)

सवनान्यानुपूर्व्येण चक्रुः शास्त्रानुसारिणः ॥ (२१।२)

न तत्र कृपणः कश्चिन्न दरिद्रो बभूव ह । (२२।१)

क्षुधितो दुःखितो वापि प्राकृतो वापि मानवः ॥ (२२।२)

भोजनं भोजनार्थिभ्यो दापयामास नित्यदा । (२३।१)

भीमसेनो महातेजाः सततं राजशासनात् ॥ (२३।२)

संस्तरे कुशलाश्चापि सर्वकर्माणि याजकाः । (२४।१)

दिवसे दिवसे चक्रुर् यथाशास्त्रार्थचक्षुषः ॥ (२४।२)

नाषडङ्गविद् अत्रासीत् सदस्यस्तस्य धीमतः । (२५।१)

नाव्रतो नानुपाध्यायो न च वादाक्षमो द्विजः ॥ (२५।२)

ततो यूपोच्छ्रये प्राप्ते षड् बैल्वान् भरतर्षभ । (२६।१)

खादिरान् बिल्वसमितांस्तावतः सर्ववर्णिनः ॥ (२६।२)

देवदारुमयौ द्वौ तु यूपौ कुरुपतेः क्रतौ । (२७।१)

श्लेष्मातकमयं चैकं याजकाः समकारयन् ॥ (२७।२)

शोभार्थं चापरान् यूपान् काञ्चनान् पुरुषर्षभ । (२८।१)

स भीमः कारयामास धर्मराजस्य शासनात् ॥ (२८।२)

ते व्यराजन्त राजर्षे वासोभिर् उपशोभिताः । (२९।१)

नरेन्द्राभिगता देवान् यथा सप्तर्षयो दिवि ॥ (२९।२)

इष्टकाः काञ्चनीश्चात्र चयनार्थं कृताभवन् । (३०।१)

शुशुभे चयनं तत्र दक्षस्येव प्रजापतेः ॥ (३०।२)

चतुश्चित्यः स तस्यासीद् अष्टादशकरात्मकः । (३१।१)

स रुक्मपक्षो निचितस्त्रिगुणो गरुडाकृतिः ॥ (३१।२)

ततो नियुक्ताः पशवो यथाशास्त्रं मनीषिभिः । (३२।१)

तं तं देवं समुद्दिश्य पक्षिणः पशवश्च ये ॥ (३२।२)

ऋषभाः शास्त्रपठितास्तथा जलचराश्च ये । (३३।१)

सर्वांस्तान् अभ्ययुञ्जंस्ते तत्राग्निचयकर्मणि ॥ (३३।२)

यूपेषु नियतं चासीत् पशूनां त्रिशतं तथा । (३४।१)

अश्वरत्नोत्तरं राज्ञः कौन्तेयस्य महात्मनः ॥ (३४।२)

स यज्ञः शुशुभे तस्य साक्षाद् देवर्षिसंकुलः । (३५।१)

गन्धर्वगणसंकीर्णः शोभितो ऽप्सरसां गणैः ॥ (३५।२)

स किंपुरुषगीतैश्च किंनरैर् उपशोभितः । (३६।१)

सिद्धविप्रनिवासैश्च समन्ताद् अभिसंवृतः ॥ (३६।२)

तस्मिन् सदसि नित्यास्तु व्यासशिष्या द्विजोत्तमाः । (३७।१)

सर्वशास्त्रप्रणेतारः कुशला यज्ञकर्मसु ॥ (३७।२)

नारदश्च बभूवात्र तुम्बुरुश्च महाद्युतिः । (३८।१)

विश्वावसुश्चित्रसेनस्तथान्ये गीतकोविदाः ॥ (३८।२)

गन्धर्वा गीतकुशला नृत्तेषु च विशारदाः । (३९।१)

रमयन्ति स्म तान् विप्रान् यज्ञकर्मान्तरेष्वथ ॥ (३९।२)