सुपर्ण उवाच । (१।१)

यस्माद् उत्तार्यते पापाद् यस्मान्निःश्रेयसो ऽश्नुते । (१।२)

तस्माद् उत्तारणफलाद् उत्तरेत्युच्यते बुधैः ॥ (१।३)

उत्तरस्य हिरण्यस्य परिवापस्य गालव । (२।१)

मार्गः पश्चिमपूर्वाभ्यां दिग्भ्यां वै मध्यमः स्मृतः ॥ (२।२)

अस्यां दिशि वरिष्ठायाम् उत्तरायां द्विजर्षभ । (३।१)

नासौम्यो नाविधेयात्मा नाधर्म्यो वसते जनः ॥ (३।२)

अत्र नारायणः कृष्णो जिष्णुश्चैव नरोत्तमः । (४।१)

बदर्याम् आश्रमपदे तथा ब्रह्मा च शाश्वतः ॥ (४।२)

अत्र वै हिमवत्पृष्ठे नित्यम् आस्ते महेश्वरः । (५।१)

अत्र राज्येन विप्राणां चन्द्रमाश्चाभ्यषिच्यत ॥ (५।२)

अत्र गङ्गां महादेवः पतन्तीं गगनाच्च्युताम् । (६।१)

प्रतिगृह्य ददौ लोके मानुषे ब्रह्मवित्तम ॥ (६।२)

अत्र देव्या तपस्तप्तं महेश्वरपरीप्सया । (७।१)

अत्र कामश्च रोषश्च शैलश्चोमा च संबभुः ॥ (७।२)

अत्र राक्षसयक्षाणां गन्धर्वाणां च गालव । (८।१)

आधिपत्येन कैलासे धनदो ऽप्यभिषेचितः ॥ (८।२)

अत्र चैत्ररथं रम्यम् अत्र वैखानसाश्रमः । (९।१)

अत्र मन्दाकिनी चैव मन्दरश्च द्विजर्षभ ॥ (९।२)

अत्र सौगन्धिकवनं नैरृतैर् अभिरक्ष्यते । (१०।१)

शाड्वलं कदलीस्कन्धम् अत्र संतानका नगाः ॥ (१०।२)

अत्र संयमनित्यानां सिद्धानां स्वैरचारिणाम् । (११।१)

विमानान्यनुरूपाणि कामभोग्यानि गालव ॥ (११।२)

अत्र ते ऋषयः सप्त देवी चारुन्धती तथा । (१२।१)

अत्र तिष्ठति वै स्वातिर् अत्रास्या उदयः स्मृतः ॥ (१२।२)

अत्र यज्ञं समारुह्य ध्रुवं स्थाता पितामहः । (१३।१)

ज्योतींषि चन्द्रसूर्यौ च परिवर्तन्ति नित्यशः ॥ (१३।२)

अत्र गायन्तिकाद्वारं रक्षन्ति द्विजसत्तमाः । (१४।१)

धामा नाम महात्मानो मुनयः सत्यवादिनः ॥ (१४।२)

न तेषां ज्ञायते सूतिर् नाकृतिर् न तपश्चितम् । (१५।१)

परिवर्तसहस्राणि कामभोग्यानि गालव ॥ (१५।२)

यथा यथा प्रविशति तस्मात् परतरं नरः । (१६।१)

तथा तथा द्विजश्रेष्ठ प्रविलीयति गालव ॥ (१६।२)

न तत् केनचिद् अन्येन गतपूर्वं द्विजर्षभ । (१७।१)

ऋते नारायणं देवं नरं वा जिष्णुम् अव्ययम् ॥ (१७।२)

अत्र कैलासम् इत्युक्तं स्थानम् ऐलविलस्य तत् । (१८।१)

अत्र विद्युत्प्रभा नाम जज्ञिरे ऽप्सरसो दश ॥ (१८।२)

अत्र विष्णुपदं नाम क्रमता विष्णुना कृतम् । (१९।१)

त्रिलोकविक्रमे ब्रह्मन्न् उत्तरां दिशम् आश्रितम् ॥ (१९।२)

अत्र राज्ञा मरुत्तेन यज्ञेनेष्टं द्विजोत्तम । (२०।१)

उशीरबीजे विप्रर्षे यत्र जाम्बूनदं सरः ॥ (२०।२)

जीमूतस्यात्र विप्रर्षेर् उपतस्थे महात्मनः । (२१।१)

साक्षाद्धैमवतः पुण्यो विमलः कमलाकरः ॥ (२१।२)

ब्राह्मणेषु च यत् कृत्स्नं स्वन्तं कृत्वा धनं महत् । (२२।१)

वव्रे वनं महर्षिः स जैमूतं तद् वनं ततः ॥ (२२।२)

अत्र नित्यं दिशापालाः सायं प्रातर् द्विजर्षभ । (२३।१)

कस्य कार्यं किम् इति वै परिक्रोशन्ति गालव ॥ (२३।२)

एवम् एषा द्विजश्रेष्ठ गुणैर् अन्यैर् दिग् उत्तरा । (२४।१)

उत्तरेति परिख्याता सर्वकर्मसु चोत्तरा ॥ (२४।२)

एता विस्तरशस्तात तव संकीर्तिता दिशः । (२५।१)

चतस्रः क्रमयोगेन कामाशां गन्तुम् इच्छसि ॥ (२५।२)

उद्यतो ऽहं द्विजश्रेष्ठ तव दर्शयितुं दिशः । (२६।१)

पृथिवीं चाखिलां ब्रह्मंस् तस्माद् आरोह मां द्विज ॥ (२६।२)