याज्ञवल्क्य उवाच । (१।१)

तथैवोत्क्रममाणं तु शृणुष्वावहितो नृप । (१।२)

पद्भ्याम् उत्क्रममाणस्य वैष्णवं स्थानम् उच्यते ॥ (१।३)

जङ्घाभ्यां तु वसून् देवान् आप्नुयाद् इति नः श्रुतम् । (२।१)

जानुभ्यां च महाभागान् देवान् साध्यान् अवाप्नुयात् ॥ (२।२)

पायुनोत्क्रममाणस्तु मैत्रं स्थानम् अवाप्नुयात् । (३।१)

पृथिवीं जघनेनाथ ऊरुभ्यां तु प्रजापतिम् ॥ (३।२)

पार्श्वाभ्यां मरुतो देवान्नासाभ्याम् इन्दुम् एव च । (४।१)

बाहुभ्याम् इन्द्रम् इत्याहुर् उरसा रुद्रम् एव च ॥ (४।२)

ग्रीवायास्तम् ऋषिश्रेष्ठं नरम् आप्नोत्यनुत्तमम् । (५।१)

विश्वेदेवान्मुखेनाथ दिशः श्रोत्रेण चाप्नुयात् ॥ (५।२)

घ्राणेन गन्धवहनं नेत्राभ्यां सूर्यम् एव च । (६।१)

भ्रूभ्यां चैवाश्विनौ देवौ ललाटेन पितॄन् अथ ॥ (६।२)

ब्रह्माणम् आप्नोति विभुं मूर्ध्ना देवाग्रजं तथा । (७।१)

एतान्युत्क्रमणस्थानान्युक्तानि मिथिलेश्वर ॥ (७।२)

अरिष्टानि तु वक्ष्यामि विहितानि मनीषिभिः । (८।१)

संवत्सरवियोगस्य सम्भवेयुः शरीरिणः ॥ (८।२)

यो ऽरुन्धतीं न पश्येत दृष्टपूर्वां कदाचन । (९।१)

तथैव ध्रुवम् इत्याहुः पूर्णेन्दुं दीपम् एव च । (९।२)

खण्डाभासं दक्षिणतस्ते ऽपि संवत्सरायुषः ॥ (९।३)

परचक्षुषि चात्मानं ये न पश्यन्ति पार्थिव । (१०।१)

आत्मच्छायाकृतीभूतं ते ऽपि संवत्सरायुषः ॥ (१०।२)

अतिद्युतिर् अतिप्रज्ञा अप्रज्ञा चाद्युतिस्तथा । (११।१)

प्रकृतेर् विक्रियापत्तिः षण्मासान्मृत्युलक्षणम् ॥ (११।२)

दैवतान्यवजानाति ब्राह्मणैश्च विरुध्यते । (१२।१)

कृष्णश्यावच्छविच्छायः षण्मासान्मृत्युलक्षणम् ॥ (१२।२)

शीर्णनाभि यथा चक्रं छिद्रं सोमं प्रपश्यति । (१३।१)

तथैव च सहस्रांशुं सप्तरात्रेण मृत्युभाक् ॥ (१३।२)

शवगन्धम् उपाघ्राति सुरभिं प्राप्य यो नरः । (१४।१)

देवतायतनस्थस्तु षड्रात्रेण स मृत्युभाक् ॥ (१४।२)

कर्णनासावनमनं दन्तदृष्टिविरागिता । (१५।१)

संज्ञालोपो निरूष्मत्वं सद्योमृत्युनिदर्शनम् ॥ (१५।२)

अकस्माच्च स्रवेद्यस्य वामम् अक्षि नराधिप । (१६।१)

मूर्धतश्चोत्पतेद् धूमः सद्योमृत्युनिदर्शनम् ॥ (१६।२)

एतावन्ति त्वरिष्टानि विदित्वा मानवो ऽत्मवान् । (१७।१)

निशि चाहनि चात्मानं योजयेत् परमात्मनि ॥ (१७।२)

प्रतीक्षमाणस्तत्कालं यत्कालं प्रति तद् भवेत् । (१८।१)

अथास्य नेष्टं मरणं स्थातुम् इच्छेद् इमां क्रियाम् ॥ (१८।२)

सर्वगन्धान् रसांश्चैव धारयेत समाहितः । (१९।१)

तथा हि मृत्युं जयति तत्परेणान्तरात्मना ॥ (१९।२)

ससांख्यधारणं चैव विदित्वा मनुजर्षभ । (२०।१)

जयेच्च मृत्युं योगेन तत्परेणान्तरात्मना ॥ (२०।२)

गच्छेत् प्राप्याक्षयं कृत्स्नम् अजन्म शिवम् अव्ययम् । (२१।१)

शाश्वतं स्थानम् अचलं दुष्प्रापम् अकृतात्मभिः ॥ (२१।२)