वासुदेव उवाच । (१।१)

ततः स प्रयतो भूत्वा मम तात युधिष्ठिर । (१।२)

प्राञ्जलिः प्राह विप्रर्षिर् नामसंहारम् आदितः ॥ (१।३)

उपमन्युर् उवाच । (२।१)

ब्रह्मप्रोक्तैर् ऋषिप्रोक्तैर् वेदवेदाङ्गसंभवैः । (२।२)

सर्वलोकेषु विख्यातैः स्थाणुं स्तोष्यामि नामभिः ॥ (२।३)

महद्भिर् विहितैः सत्यैः सिद्धैः सर्वार्थसाधकैः । (३।१)

ऋषिणा तण्डिना भक्त्या कृतैर् देवकृतात्मना ॥ (३।२)

यथोक्तैर् लोकविख्यातैर् मुनिभिस्तत्त्वदर्शिभिः । (४।१)

प्रवरं प्रथमं स्वर्ग्यं सर्वभूतहितं शुभम् । (४।२)

श्रुतैः सर्वत्र जगति ब्रह्मलोकावतारितैः ॥ (४।३)

यत् तद् रहस्यं परमं ब्रह्मप्रोक्तं सनातनम् । (५।१)

वक्ष्ये यदुकुलश्रेष्ठ शृणुष्वावहितो मम ॥ (५।२)

परत्वेन भवं देवं भक्तस्त्वं परमेश्वरम् । (६।१)

तेन ते श्रावयिष्यामि यत् तद् ब्रह्म सनातनम् ॥ (६।२)

न शक्यं विस्तरात् कृत्स्नं वक्तुं शर्वस्य केनचित् । (७।१)

युक्तेनापि विभूतीनाम् अपि वर्षशतैर् अपि ॥ (७।२)

यस्यादिर् मध्यम् अन्तश्च सुरैर् अपि न गम्यते । (८।१)

कस्तस्य शक्नुयाद् वक्तुं गुणान् कार्त्स्न्येन माधव ॥ (८।२)

किं तु देवस्य महतः संक्षिप्तार्थपदाक्षरम् । (९।१)

शक्तितश्चरितं वक्ष्ये प्रसादात् तस्य चैव हि ॥ (९।२)

अप्राप्येह ततो ऽनुज्ञां न शक्यः स्तोतुम् ईश्वरः । (१०।१)

यदा तेनाभ्यनुज्ञातः स्तुवत्येव सदा भवम् ॥ (१०।२)

अनादिनिधनस्याहं सर्वयोनेर् महात्मनः । (११।१)

नाम्नां कंचित् समुद्देशं वक्ष्ये ह्यव्यक्तयोनिनः ॥ (११।२)

वरदस्य वरेण्यस्य विश्वरूपस्य धीमतः । (१२।१)

शृणु नामसमुद्देशं यद् उक्तं पद्मयोनिना ॥ (१२।२)

दश नामसहस्राणि यान्याह प्रपितामहः । (१३।१)

तानि निर्मथ्य मनसा दध्नो घृतम् इवोद्धृतम् ॥ (१३।२)

गिरेः सारं यथा हेम पुष्पात् सारं यथा मधु । (१४।१)

घृतात् सारं यथा मण्डस्तथैतत् सारम् उद्धृतम् ॥ (१४।२)

सर्वपाप्मापहम् इदं चतुर्वेदसमन्वितम् । (१५।१)

प्रयत्नेनाधिगन्तव्यं धार्यं च प्रयतात्मना । (१५।२)

शान्तिकं पौष्टिकं चैव रक्षोघ्नं पावनं महत् ॥ (१५।३)

इदं भक्ताय दातव्यं श्रद्दधानास्तिकाय च । (१६।१)

नाश्रद्दधानरूपाय नास्तिकायाजितात्मने ॥ (१६।२)

यश्चाभ्यसूयते देवं भूतात्मानं पिनाकिनम् । (१७।१)

स कृष्ण नरकं याति सह पूर्वैः सहानुगैः ॥ (१७।२)

इदं ध्यानम् इदं योगम् इदं ध्येयम् अनुत्तमम् । (१८।१)

इदं जप्यम् इदं ज्ञानं रहस्यम् इदम् उत्तमम् । (१८।२)

इदं ज्ञात्वान्तकाले ऽपि गच्छेद्धि परमां गतिम् ॥ (१८।३)

पवित्रं मङ्गलं पुण्यं कल्याणम् इदम् उत्तमम् । (१९।१)

निगदिष्ये महाबाहो स्तवानाम् उत्तमं स्तवम् ॥ (१९।२)

इदं ब्रह्मा पुरा कृत्वा सर्वलोकपितामहः । (२०।१)

सर्वस्तवानां दिव्यानां राजत्वे समकल्पयत् ॥ (२०।२)