अर्जुन उवाच । (१।१)

कृतास्त्रम् अभिविश्वस्तम् अथ मां हरिवाहनः । (१।२)

संस्पृश्य मूर्ध्नि पाणिभ्याम् इदं वचनम् अब्रवीत् ॥ (१।३)

न त्वम् अद्य युधा जेतुं शक्यः सुरगणैर् अपि । (२।१)

किं पुनर् मानुषे लोके मानुषैर् अकृतात्मभिः । (२।२)

अप्रमेयो ऽप्रधृष्यश्च युद्धेष्वप्रतिमस्तथा ॥ (२।३)

अथाब्रवीत् पुनर् देवः सम्प्रहृष्टतनूरुहः । (३।१)

अस्त्रयुद्धे समो वीर न ते कश्चिद् भविष्यति ॥ (३।२)

अप्रमत्तः सदा दक्षः सत्यवादी जितेन्द्रियः । (४।१)

ब्रह्मण्यश्चास्त्रविच् चासि शूरश्चासि कुरूद्वह ॥ (४।२)

अस्त्राणि समवाप्तानि त्वया दश च पञ्च च । (५।१)

पञ्चभिर् विधिभिः पार्थ न त्वया विद्यते समः ॥ (५।२)

प्रयोगम् उपसंहारम् आवृत्तिं च धनंजय । (६।१)

प्रायश्चित्तं च वेत्थ त्वं प्रतिघातं च सर्वशः ॥ (६।२)

तव गुर्वर्थकालो ऽयम् उपपन्नः परंतप । (७।१)

प्रतिजानीष्व तं कर्तुम् अतो वेत्स्याम्यहं परम् ॥ (७।२)

ततो ऽहम् अब्रुवं राजन् देवराजम् इदं वचः । (८।१)

विषह्यं चेन् मया कर्तुं कृतम् एव निबोध तत् ॥ (८।२)

ततो माम् अब्रवीद् राजन् प्रहस्य बलवृत्रहा । (९।१)

नाविषह्यं तवाद्यास्ति त्रिषु लोकेषु किंचन ॥ (९।२)

निवातकवचा नाम दानवा मम शत्रवः । (१०।१)

समुद्रकुक्षिम् आश्रित्य दुर्गे प्रतिवसन्त्युत ॥ (१०।२)

तिस्रः कोट्यः समाख्यातास् तुल्यरूपबलप्रभाः । (११।१)

तांस् तत्र जहि कौन्तेय गुर्वर्थस् ते भविष्यति ॥ (११।२)

ततो मातलिसंयुक्तं मयूरसमरोमभिः । (१२।१)

हयैर् उपेतं प्रादान् मे रथं दिव्यं महाप्रभम् ॥ (१२।२)

बबन्ध चैव मे मूर्ध्नि किरीटम् इदम् उत्तमम् । (१३।१)

स्वरूपसदृशं चैव प्रादाद् अङ्गविभूषणम् ॥ (१३।२)

अभेद्यं कवचं चेदं स्पर्शरूपवद् उत्तमम् । (१४।१)

अजरां ज्याम् इमां चापि गाण्डीवे समयोजयत् ॥ (१४।२)

ततः प्रायाम् अहं तेन स्यन्दनेन विराजता । (१५।१)

येनाजयद् देवपतिर् बलिं वैरोचनिं पुरा ॥ (१५।२)

ततो देवाः सर्व एव तेन घोषेण बोधितः । (१६।१)

मन्वाना देवराजं मां समाजग्मुर् विशां पते । (१६।२)

दृष्ट्वा च माम् अपृच्छन्त किं करिष्यसि फल्गुन ॥ (१६।३)

तान् अब्रुवं यथाभूतम् इदं कर्तास्मि संयुगे । (१७।१)

निवातकवचानां तु प्रस्थितं मां वधैषिणम् । (१७।२)

निबोधत महाभागाः शिवं चाशास्त मे ऽनघाः ॥ (१७।३)

तुष्टुवुर् मां प्रसन्नास् ते यथा देवं पुरंदरम् । (१८।१)

रथेनानेन मघवा जितवाञ्शम्बरं युधि । (१८।२)

नमुचिं बलवृत्रौ च प्रह्लादनरकावपि ॥ (१८।३)

बहूनि च सहस्राणि प्रयुतान्यर्बुदानि च । (१९।१)

रथेनानेन दैत्यानां जितवान् मघवान् युधि ॥ (१९।२)

त्वम् अप्येतेन कौन्तेय निवातकवचान् रणे । (२०।१)

विजेता युधि विक्रम्य पुरेव मघवान् वशी ॥ (२०।२)

अयं च शङ्खप्रवरो येन जेतासि दानवान् । (२१।१)

अनेन विजिता लोकाः शक्रेणापि महात्मना ॥ (२१।२)

प्रदीयमानं देवैस् तु देवदत्तं जलोद्भवम् । (२२।१)

प्रत्यगृह्णं जयायैनं स्तूयमानस् तदामरैः ॥ (२२।२)

स शङ्खी कवची बाणी प्रगृहीतशरासनः । (२३।१)

दानवालयम् अत्युग्रं प्रयातो ऽस्मि युयुत्सया ॥ (२३।२)