वैशंपायन उवाच । (१।१)

एवं सनत्सुजातेन विदुरेण च धीमता । (१।२)

सार्धं कथयतो राज्ञः सा व्यतीयाय शर्वरी ॥ (१।३)

तस्यां रजन्यां व्युष्टायां राजानः सर्व एव ते । (२।१)

सभाम् आविविशुर् हृष्टाः सूतस्योपदिदृक्षया ॥ (२।२)

शुश्रूषमाणाः पार्थानां वचो धर्मार्थसंहितम् । (३।१)

धृतराष्ट्रमुखाः सर्वे ययू राजसभां शुभाम् ॥ (३।२)

सुधावदातां विस्तीर्णां कनकाजिरभूषिताम् । (४।१)

चन्द्रप्रभां सुरुचिरां सिक्तां परमवारिणा ॥ (४।२)

रुचिरैर् आसनैः स्तीर्णां काञ्चनैर् दारवैर् अपि । (५।१)

अश्मसारमयैर् दान्तैः स्वास्तीर्णैः सोत्तरच्छदैः ॥ (५।२)

भीष्मो द्रोणः कृपः शल्यः कृतवर्मा जयद्रथः । (६।१)

अश्वत्थामा विकर्णश्च सोमदत्तश्च बाह्लिकः ॥ (६।२)

विदुरश्च महाप्राज्ञो युयुत्सुश्च महारथः । (७।१)

सर्वे च सहिताः शूराः पार्थिवा भरतर्षभ । (७।२)

धृतराष्ट्रं पुरस्कृत्य विविशुस्तां सभां शुभाम् ॥ (७।३)

दुःशासनश्चित्रसेनः शकुनिश्चापि सौबलः । (८।१)

दुर्मुखो दुःसहः कर्ण उलूको ऽथ विविंशतिः ॥ (८।२)

कुरुराजं पुरस्कृत्य दुर्योधनम् अमर्षणम् । (९।१)

विविशुस्तां सभां राजन् सुराः शक्रसदो यथा ॥ (९।२)

आविशद्भिस्तदा राजञ् शूरैः परिघबाहुभिः । (१०।१)

शुशुभे सा सभा राजन् सिंहैर् इव गिरेर् गुहा ॥ (१०।२)

ते प्रविश्य महेष्वासाः सभां समितिशोभनाः । (११।१)

आसनानि महार्हाणि भेजिरे सूर्यवर्चसः ॥ (११।२)

आसनस्थेषु सर्वेषु तेषु राजसु भारत । (१२।१)

द्वाःस्थो निवेदयामास सूतपुत्रम् उपस्थितम् ॥ (१२।२)

अयं स रथ आयाति यो ऽयासीत् पाण्डवान् प्रति । (१३।१)

दूतो नस्तूर्णम् आयातः सैन्धवैः साधुवाहिभिः ॥ (१३।२)

उपयाय तु स क्षिप्रं रथात् प्रस्कन्द्य कुण्डली । (१४।१)

प्रविवेश सभां पूर्णां महीपालैर् महात्मभिः ॥ (१४।२)

संजय उवाच । (१५।१)

प्राप्तो ऽस्मि पाण्डवान् गत्वा तद् विजानीत कौरवाः । (१५।२)

यथावयः कुरून् सर्वान् प्रतिनन्दन्ति पाण्डवाः ॥ (१५।३)

अभिवादयन्ति वृद्धांश्च वयस्यांश्च वयस्यवत् । (१६।१)

यूनश्चाभ्यवदन् पार्थाः प्रतिपूज्य यथावयः ॥ (१६।२)

यथाहं धृतराष्ट्रेण शिष्टः पूर्वम् इतो गतः । (१७।१)

अब्रुवं पाण्डवान् गत्वा तन्निबोधत पार्थिवाः ॥ (१७।२)