नारद उवाच । (१।१)

प्रत्यभिज्ञातमात्रो ऽथ सद्भिस्तैर् नरपुंगवः । (१।२)

ययातिर् दिव्यसंस्थानो बभूव विगतज्वरः ॥ (१।३)

दिव्यमाल्याम्बरधरो दिव्याभरणभूषितः । (२।१)

दिव्यगन्धगुणोपेतो न पृथ्वीम् अस्पृशत् पदा ॥ (२।२)

ततो वसुमनाः पूर्वम् उच्चैर् उच्चारयन् वचः । (३।१)

ख्यातो दानपतिर् लोके व्याजहार नृपं तदा ॥ (३।२)

प्राप्तवान् अस्मि यल् लोके सर्ववर्णेष्वगर्हया । (४।१)

तद् अप्यथ च दास्यामि तेन संयुज्यतां भवान् ॥ (४।२)

यत् फलं दानशीलस्य क्षमाशीलस्य यत् फलम् । (५।१)

यच्च मे फलम् आधाने तेन संयुज्यतां भवान् ॥ (५।२)

ततः प्रतर्दनो ऽप्याह वाक्यं क्षत्रियपुंगवः । (६।१)

यथा धर्मरतिर् नित्यं नित्यं युद्धपरायणः ॥ (६।२)

प्राप्तवान् अस्मि यल् लोके क्षत्रधर्मोद्भवं यशः । (७।१)

वीरशब्दफलं चैव तेन संयुज्यतां भवान् ॥ (७।२)

शिबिरौशीनरो धीमान् उवाच मधुरां गिरम् । (८।१)

यथा बालेषु नारीषु वैहार्येषु तथैव च ॥ (८।२)

संगरेषु निपातेषु तथापद्व्यसनेषु च । (९।१)

अनृतं नोक्तपूर्वं मे तेन सत्येन खं व्रज ॥ (९।२)

यथा प्राणांश्च राज्यं च राजन् कर्म सुखानि च । (१०।१)

त्यजेयं न पुनः सत्यं तेन सत्येन खं व्रज ॥ (१०।२)

यथा सत्येन मे धर्मो यथा सत्येन पावकः । (११।१)

प्रीतः शक्रश्च सत्येन तेन सत्येन खं व्रज ॥ (११।२)

अष्टकस्त्वथ राजर्षिः कौशिको माधवीसुतः । (१२।१)

अनेकशतयज्वानं वचनं प्राह धर्मवित् ॥ (१२।२)

शतशः पुण्डरीका मे गोसवाश्च चिताः प्रभो । (१३।१)

क्रतवो वाजपेयाश्च तेषां फलम् अवाप्नुहि ॥ (१३।२)

न मे रत्नानि न धनं न तथान्ये परिच्छदाः । (१४।१)

क्रतुष्वनुपयुक्तानि तेन सत्येन खं व्रज ॥ (१४।२)

यथा यथा हि जल्पन्ति दौहित्रास्तं नराधिपम् । (१५।१)

तथा तथा वसुमतीं त्यक्त्वा राजा दिवं ययौ ॥ (१५।२)

एवं सर्वे समस्तास्ते राजानः सुकृतैस्तदा । (१६।१)

ययातिं स्वर्गतो भ्रष्टं तारयामासुर् अञ्जसा ॥ (१६।२)

दौहित्राः स्वेन धर्मेण यज्ञदानकृतेन वै । (१७।१)

चतुर्षु राजवंशेषु सम्भूताः कुलवर्धनाः । (१७।२)

मातामहं महाप्राज्ञं दिवम् आरोपयन्ति ते ॥ (१७।३)

राजान ऊचुः । (१८।१)

राजधर्मगुणोपेताः सर्वधर्मगुणान्विताः । (१८।२)

दौहित्रास्ते वयं राजन् दिवम् आरोह पार्थिवः ॥ (१८।३)