युधिष्ठिर उवाच । (१।१)

हताः पुत्राश्च पौत्राश्च भ्रातरः पितरस्तथा । (१।२)

श्वशुरा गुरवश्चैव मातुलाः सपितामहाः ॥ (१।३)

क्षत्रियाश्च महात्मानः संबन्धिसुहृदस्तथा । (२।१)

वयस्या ज्ञातयश्चैव भ्रातरश्च पितामह ॥ (२।२)

बहवश्च मनुष्येन्द्रा नानादेशसमागताः । (३।१)

घातिता राज्यलुब्धेन मयैकेन पितामह ॥ (३।२)

तांस्तादृशान् अहं हत्वा धर्मनित्यान्महीक्षितः । (४।१)

असकृत् सोमपान् वीरान् किं प्राप्स्यामि तपोधन ॥ (४।२)

दह्याम्यनिशम् अद्याहं चिन्तयानः पुनः पुनः । (५।१)

हीनां पार्थिवसिंहैस्तैः श्रीमद्भिः पृथिवीम् इमाम् ॥ (५।२)

दृष्ट्वा ज्ञातिवधं घोरं हतांश्च शतशः परान् । (६।१)

कोटिशश्च नरान् अन्यान् परितप्ये पितामह ॥ (६।२)

का नु तासां वरस्त्रीणाम् अवस्थाद्य भविष्यति । (७।१)

विहीनानां स्वतनयैः पतिभिर् भ्रातृभिस्तथा ॥ (७।२)

अस्मान् अन्तकरान् घोरान् पाण्डवान् वृष्णिसंहितान् । (८।१)

आक्रोशन्त्यः कृशा दीना निपतन्त्यश्च भूतले ॥ (८।२)

अपश्यन्त्यः पितॄन् भ्रातॄन् पतीन् पुत्रांश्च योषितः । (९।१)

त्यक्त्वा प्राणान् प्रियान् सर्वा गमिष्यन्ति यमक्षयम् ॥ (९।२)

वत्सलत्वाद् द्विजश्रेष्ठ तत्र मे नास्ति संशयः । (१०।१)

व्यक्तं सौक्ष्म्याच्च धर्मस्य प्राप्स्यामः स्त्रीवधं वयम् ॥ (१०।२)

ते वयं सुहृदो हत्वा कृत्वा पापम् अनन्तकम् । (११।१)

नरके निपतिष्यामो ह्यधःशिरस एव च ॥ (११।२)

शरीराणि विमोक्ष्यामस्तपसोग्रेण सत्तम । (१२।१)

आश्रमांश्च विशेषांस्त्वं ममाचक्ष्व पितामह ॥ (१२।२)