संजय उवाच । (१।१)

तस्मिंस्तथा वर्तमाने कर्णराक्षसयोर् मृधे । (१।२)

अलायुधो राक्षसेन्द्रो वीर्यवान् अभ्यवर्तत ॥ (१।३)

महत्या सेनया युक्तः सुयोधनम् उपागमत् । (२।१)

राक्षसानां विरूपाणां सहस्रैः परिवारितः । (२।२)

नानारूपधरैर् वीरैः पूर्ववैरम् अनुस्मरन् ॥ (२।३)

तस्य ज्ञातिर् हि विक्रान्तो ब्राह्मणादो बको हतः । (३।१)

किर्मीरश्च महातेजा हिडिम्बश्च सखा तथा ॥ (३।२)

स दीर्घकालाध्युषितं पूर्ववैरम् अनुस्मरन् । (४।१)

विज्ञायैतन्निशायुद्धं जिघांसुर् भीमम् आहवे ॥ (४।२)

स मत्त इव मातङ्गः संक्रुद्ध इव चोरगः । (५।१)

दुर्योधनम् इदं वाक्यम् अब्रवीद् युद्धलालसः ॥ (५।२)

विदितं ते महाराज यथा भीमेन राक्षसाः । (६।१)

हिडिम्बबककिर्मीरा निहता मम बान्धवाः ॥ (६।२)

परामर्शश्च कन्याया हिडिम्बायाः कृतः पुरा । (७।१)

किम् अन्यद् राक्षसान् अन्यान् अस्मांश्च परिभूय ह ॥ (७।२)

तम् अहं सगणं राजन् सवाजिरथकुञ्जरम् । (८।१)

हैडिम्बं च सहामात्यं हन्तुम् अभ्यागतः स्वयम् ॥ (८।२)

अद्य कुन्तीसुतान् सर्वान् वासुदेवपुरोगमान् । (९।१)

हत्वा संभक्षयिष्यामि सर्वैर् अनुचरैः सह । (९।२)

निवारय बलं सर्वं वयं योत्स्याम पाण्डवान् ॥ (९।३)

तस्य तद् वचनं श्रुत्वा हृष्टो दुर्योधनस्तदा । (१०।१)

प्रतिपूज्याब्रवीद् वाक्यं भ्रातृभिः परिवारितः ॥ (१०।२)

त्वां पुरस्कृत्य सगणं वयं योत्स्यामहे परान् । (११।१)

न हि वैरान्तमनसः स्थास्यन्ति मम सैनिकाः ॥ (११।२)

एवम् अस्त्विति राजानम् उक्त्वा राक्षसपुंगवः । (१२।१)

अभ्ययात् त्वरितो भीमं सहितः पुरुषाशनैः ॥ (१२।२)

दीप्यमानेन वपुषा रथेनादित्यवर्चसा । (१३।१)

तादृशेनैव राजेन्द्र यादृशेन घटोत्कचः ॥ (१३।२)

तस्याप्यतुलनिर्घोषो बहुतोरणचित्रितः । (१४।१)

ऋक्षचर्मावनद्धाङ्गो नल्वमात्रो महारथः ॥ (१४।२)

तस्यापि तुरगाः शीघ्रा हस्तिकायाः खरस्वनाः । (१५।१)

शतं युक्ता महाकाया मांसशोणितभोजनाः ॥ (१५।२)

तस्यापि रथनिर्घोषो महामेघरवोपमः । (१६।१)

तस्यापि सुमहच्चापं दृढज्यं बलवत्तरम् ॥ (१६।२)

तस्याप्यक्षसमा बाणा रुक्मपुङ्खाः शिलाशिताः । (१७।१)

सो ऽपि वीरो महाबाहुर् यथैव स घटोत्कचः ॥ (१७।२)

तस्यापि गोमायुबडाभिगुप्तो बभूव केतुर् ज्वलनार्कतुल्यः । (१८।१)

स चापि रूपेण घटोत्कचस्य श्रीमत्तमो व्याकुलदीपितास्यः ॥ (१८।२)

दीप्ताङ्गदो दीप्तकिरीटमाली बद्धस्रगुष्णीषनिबद्धखड्गः । (१९।१)

गदी भुशुण्डी मुसली हली च शरासनी वारणतुल्यवर्ष्मा ॥ (१९।२)

रथेन तेनानलवर्चसा च विद्रावयन् पाण्डववाहिनीं ताम् । (२०।१)

रराज संख्ये परिवर्तमानो विद्युन्माली मेघ इवान्तरिक्षे ॥ (२०।२)

ते चापि सर्वे प्रवरा नरेन्द्रा महाबला वर्मिणश्चर्मिणश्च । (२१।१)

हर्षान्विता युयुधुस्तत्र राजन् समन्ततः पाण्डवयोधवीराः ॥ (२१।२)