युधिष्ठिर उवाच । (१।१)

वासुदेव महाबाहो विस्तरेण महामते । (१।२)

सौभस्य वधम् आचक्ष्व न हि तृप्यामि कथ्यतः ॥ (१।३)

वासुदेव उवाच । (२।१)

हतं श्रुत्वा महाबाहो मया श्रौतश्रवं नृपम् । (२।२)

उपायाद् भरतश्रेष्ठ शाल्वो द्वारवतीं पुरीम् ॥ (२।३)

अरुन्धत्तां सुदुष्टात्मा सर्वतः पाण्डुनन्दन । (३।१)

शाल्वो वैहायसं चापि तत् पुरं व्यूह्य विष्ठितः ॥ (३।२)

तत्रस्थो ऽथ महीपालो योधयामास तां पुरीम् । (४।१)

अभिसारेण सर्वेण तत्र युद्धम् अवर्तत ॥ (४।२)

पुरी समन्ताद् विहिता सपताका सतोरणा । (५।१)

सचक्रा सहुडा चैव सयन्त्रखनका तथा ॥ (५।२)

सोपतल्पप्रतोलीका साट्टाट्टालकगोपुरा । (६।१)

सकचग्रहणी चैव सोल्कालातावपोथिका ॥ (६।२)

सोष्ट्रिका भरतश्रेष्ठ सभेरीपणवानका । (७।१)

समित्तृणकुशा राजन् सशतघ्नीकलाङ्गला ॥ (७।२)

सभुशुण्ड्यश्मलगुडा सायुधा सपरश्वधा । (८।१)

लोहचर्मवती चापि साग्निः सहुडशृङ्गिका ॥ (८।२)

शास्त्रदृष्टेन विधिना संयुक्ता भरतर्षभ । (९।१)

द्रव्यैर् अनेकैर् विविधैर् गदसाम्बोद्धवादिभिः ॥ (९।२)

पुरुषैः कुरुशार्दूल समर्थैः प्रतिबाधने । (१०।१)

अभिख्यातकुलैर् वीरैर् दृष्टवीर्यैश् च संयुगे ॥ (१०।२)

मध्यमेन च गुल्मेन रक्षिता सारसंज्ञिता । (११।१)

उत्क्षिप्तगुल्मैश्च तथा हयैश् चैव पदातिभिः ॥ (११।२)

आघोषितं च नगरे न पातव्या सुरेति ह । (१२।१)

प्रमादं परिरक्षद्भिर् उग्रसेनोद्धवादिभिः ॥ (१२।२)

प्रमत्तेष्वभिघातं हि कुर्याच्छाल्वो नराधिपः । (१३।१)

इति कृत्वाप्रमत्तास् ते सर्वे वृष्ण्यन्धकाः स्थिताः ॥ (१३।२)

आनर्ताश् च तथा सर्वे नटनर्तकगायनाः । (१४।१)

बहिर् विवासिताः सर्वे रक्षद्भिर् वित्तसंचयान् ॥ (१४।२)

संक्रमा भेदिताः सर्वे नावश् च प्रतिषेधिताः । (१५।१)

परिखाश् चापि कौरव्य कीलैः सुनिचिताः कृताः ॥ (१५।२)

उदपानाः कुरुश्रेष्ठ तथैवाप्यम्बरीषकाः । (१६।१)

समन्तात् क्रोशमात्रं च कारिता विषमा च भूः ॥ (१६।२)

प्रकृत्या विषमं दुर्गं प्रकृत्या च सुरक्षितम् । (१७।१)

प्रकृत्या चायुधोपेतं विशेषेण तदानघ ॥ (१७।२)

सुरक्षितं सुगुप्तं च सर्वायुधसमन्वितम् । (१८।१)

तत् पुरं भरतश्रेष्ठ यथेन्द्रभवनं तथा ॥ (१८।२)

न चामुद्रो ऽभिनिर्याति न चामुद्रः प्रवेश्यते । (१९।१)

वृष्ण्यन्धकपुरे राजंस्तदा सौभसमागमे ॥ (१९।२)

अनु रथ्यासु सर्वासु चत्वरेषु च कौरव । (२०।१)

बलं बभूव राजेन्द्र प्रभूतगजवाजिमत् ॥ (२०।२)

दत्तवेतनभक्तं च दत्तायुधपरिच्छदम् । (२१।१)

कृतापदानं च तदा बलम् आसीन् महाभुज ॥ (२१।२)

न कुप्यवेतनी कश्चिन् न चातिक्रान्तवेतनी । (२२।१)

नानुग्रहभृतः कश्चिन् न चादृष्टपराक्रमः ॥ (२२।२)

एवं सुविहिता राजन् द्वारका भूरिदक्षिणैः । (२३।१)

आहुकेन सुगुप्ता च राज्ञा राजीवलोचन ॥ (२३।२)