वैशंपायन उवाच । (१।१)

प्रकृतीनां तु तद् वाक्यं देशकालोपसंहितम् । (१।२)

श्रुत्वा युधिष्ठिरो राजाथोत्तरं प्रत्यभाषत ॥ (१।३)

धन्याः पाण्डुसुता लोके येषां ब्राह्मणपुंगवाः । (२।१)

तथ्यान् वाप्यथ वातथ्यान् गुणान् आहुः समागताः ॥ (२।२)

अनुग्राह्या वयं नूनं भवताम् इति मे मतिः । (३।१)

यत्रैवं गुणसम्पन्नान् अस्मान् ब्रूथ विमत्सराः ॥ (३।२)

धृतराष्ट्रो महाराजः पिता नो दैवतं परम् । (४।१)

शासने ऽस्य प्रिये चैव स्थेयं मत्प्रियकाङ्क्षिभिः ॥ (४।२)

एतदर्थं हि जीवामि कृत्वा ज्ञातिवधं महत् । (५।१)

अस्य शुश्रूषणं कार्यं मया नित्यम् अतन्द्रिणा ॥ (५।२)

यदि चाहम् अनुग्राह्यो भवतां सुहृदां ततः । (६।१)

धृतराष्ट्रे यथापूर्वं वृत्तिं वर्तितुम् अर्हथ ॥ (६।२)

एष नाथो हि जगतो भवतां च मया सह । (७।१)

अस्यैव पृथिवी कृत्स्ना पाण्डवाः सर्व एव च । (७।२)

एतन्मनसि कर्तव्यं भवद्भिर् वचनं मम ॥ (७।३)

अनुगम्य च राजानं यथेष्टं गम्यताम् इति । (८।१)

पौरजानपदान् सर्वान् विसृज्य कुरुनन्दनः । (८।२)

यौवराज्येन कौरव्यो भीमसेनम् अयोजयत् ॥ (८।३)

मन्त्रे च निश्चये चैव षाड्गुण्यस्य च चिन्तने । (९।१)

विदुरं बुद्धिसम्पन्नं प्रीतिमान् वै समादिशत् ॥ (९।२)

कृताकृतपरिज्ञाने तथायव्ययचिन्तने । (१०।१)

संजयं योजयामास ऋद्धम् ऋद्धैर् गुणैर् युतम् ॥ (१०।२)

बलस्य परिमाणे च भक्तवेतनयोस्तथा । (११।१)

नकुलं व्यादिशद् राजा कर्मिणाम् अन्ववेक्षणे ॥ (११।२)

परचक्रोपरोधे च दृप्तानां चावमर्दने । (१२।१)

युधिष्ठिरो महाराजः फल्गुनं व्यादिदेश ह ॥ (१२।२)

द्विजानां वेदकार्येषु कार्येष्वन्येषु चैव हि । (१३।१)

धौम्यं पुरोधसां श्रेष्ठं व्यादिदेश परंतपः ॥ (१३।२)

सहदेवं समीपस्थं नित्यम् एव समादिशत् । (१४।१)

तेन गोप्यो हि नृपतिः सर्वावस्थो विशां पते ॥ (१४।२)

यान् यान् अमन्यद् योग्यांश्च येषु येष्विह कर्मसु । (१५।१)

तांस्तांस्तेष्वेव युयुजे प्रीयमाणो महीपतिः ॥ (१५।२)

विदुरं संजयं चैव युयुत्सुं च महामतिम् । (१६।१)

अब्रवीत् परवीरघ्नो धर्मात्मा धर्मवत्सलः ॥ (१६।२)

उत्थायोत्थाय यत् कार्यम् अस्य राज्ञः पितुर् मम । (१७।१)

सर्वं भवद्भिः कर्तव्यम् अप्रमत्तैर् यथातथम् ॥ (१७।२)

पौरजानपदानां च यानि कार्याणि नित्यशः । (१८।१)

राजानं समनुज्ञाप्य तानि कार्याणि धर्मतः ॥ (१८।२)