ब्राह्मण उवाच । (१।१)

संकल्पदंशमशकं शोकहर्षहिमातपम् । (१।२)

मोहान्धकारतिमिरं लोभव्यालसरीसृपम् ॥ (१।३)

विषयैकात्ययाध्वानं कामक्रोधविरोधकम् । (२।१)

तद् अतीत्य महादुर्गं प्रविष्टो ऽस्मि महद् वनम् ॥ (२।२)

ब्राह्मण्युवाच । (३।१)

क्व तद् वनं महाप्राज्ञ के वृक्षाः सरितश्च काः । (३।२)

गिरयः पर्वताश्चैव कियत्यध्वनि तद् वनम् ॥ (३।३)

ब्राह्मण उवाच । (४।१)

न तद् अस्ति पृथग्भावे किंचिद् अन्यत् ततः समम् । (४।२)

न तद् अस्त्यपृथग्भावे किंचिद् दूरतरं ततः ॥ (४।३)

तस्माद्ध्रस्वतरं नास्ति न ततो ऽस्ति बृहत्तरम् । (५।१)

नास्ति तस्माद् दुःखतरं नास्त्यन्यत् तत्समं सुखम् ॥ (५।२)

न तत् प्रविश्य शोचन्ति न प्रहृष्यन्ति च द्विजाः । (६।१)

न च बिभ्यति केषांचित् तेभ्यो बिभ्यति केचन ॥ (६।२)

तस्मिन् वने सप्त महाद्रुमाश्च फलानि सप्तातिथयश्च सप्त । (७।१)

सप्ताश्रमाः सप्त समाधयश्च दीक्षाश्च सप्तैतद् अरण्यरूपम् ॥ (७।२)

पञ्चवर्णानि दिव्यानि पुष्पाणि च फलानि च । (८।१)

सृजन्तः पादपास्तत्र व्याप्य तिष्ठन्ति तद् वनम् ॥ (८।२)

सुवर्णानि द्विवर्णानि पुष्पाणि च फलानि च । (९।१)

सृजन्तः पादपास्तत्र व्याप्य तिष्ठन्ति तद् वनम् ॥ (९।२)

चतुर्वर्णानि दिव्यानि पुष्पाणि च फलानि च । (१०।१)

सृजन्तः पादपास्तत्र व्याप्य तिष्ठन्ति तद् वनम् ॥ (१०।२)

शंकराणि त्रिवर्णानि पुष्पाणि च फलानि च । (११।१)

सृजन्तः पादपास्तत्र व्याप्य तिष्ठन्ति तद् वनम् ॥ (११।२)

सुरभीण्येकवर्णानि पुष्पाणि च फलानि च । (१२।१)

सृजन्तः पादपास्तत्र व्याप्य तिष्ठन्ति तद् वनम् ॥ (१२।२)

बहून्यव्यक्तवर्णानि पुष्पाणि च फलानि च । (१३।१)

विसृजन्तौ महावृक्षौ तद् वनं व्याप्य तिष्ठतः ॥ (१३।२)

एको ह्यग्निः सुमना ब्राह्मणो ऽत्र पञ्चेन्द्रियाणि समिधश्चात्र सन्ति । (१४।१)

तेभ्यो मोक्षाः सप्त भवन्ति दीक्षा गुणाः फलान्यतिथयः फलाशाः ॥ (१४।२)

आतिथ्यं प्रतिगृह्णन्ति तत्र सप्त महर्षयः । (१५।१)

अर्चितेषु प्रलीनेषु तेष्वन्यद् रोचते वनम् ॥ (१५।२)

प्रतिज्ञावृक्षम् अफलं शान्तिच्छायासमन्वितम् । (१६।१)

ज्ञानाश्रयं तृप्तितोयम् अन्तःक्षेत्रज्ञभास्करम् ॥ (१६।२)

ये ऽधिगच्छन्ति तत् सन्तस्तेषां नास्ति भयं पुनः । (१७।१)

ऊर्ध्वं चावाक् च तिर्यक् च तस्य नान्तो ऽधिगम्यते ॥ (१७।२)

सप्त स्त्रियस्तत्र वसन्ति सद्यो ऽवाङ्मुखा भानुमत्यो जनित्र्यः । (१८।१)

ऊर्ध्वं रसानां ददते प्रजाभ्यः सर्वान् यथा सर्वम् अनित्यतां च ॥ (१८।२)

तत्रैव प्रतितिष्ठन्ति पुनस्तत्रोदयन्ति च । (१९।१)

सप्त सप्तर्षयः सिद्धा वसिष्ठप्रमुखाः सह ॥ (१९।२)

यशो वर्चो भगश्चैव विजयः सिद्धितेजसी । (२०।१)

एवम् एवानुवर्तन्ते सप्त ज्योतींषि भास्करम् ॥ (२०।२)

गिरयः पर्वताश्चैव सन्ति तत्र समासतः । (२१।१)

नद्यश्च सरितो वारि वहन्त्यो ब्रह्मसंभवम् ॥ (२१।२)

नदीनां संगमस्तत्र वैतानः समुपह्वरे । (२२।१)

स्वात्मतृप्ता यतो यान्ति साक्षाद् दान्ताः पितामहम् ॥ (२२।२)

कृशाशाः सुव्रताशाश्च तपसा दग्धकिल्बिषाः । (२३।१)

आत्मन्यात्मानम् आवेश्य ब्रह्माणं समुपासते ॥ (२३।२)

ऋचम् अप्यत्र शंसन्ति विद्यारण्यविदो जनाः । (२४।१)

तद् अरण्यम् अभिप्रेत्य यथाधीरम् अजायत ॥ (२४।२)

एतद् एतादृशं दिव्यम् अरण्यं ब्राह्मणा विदुः । (२५।१)

विदित्वा चान्वतिष्ठन्त क्षेत्रज्ञेनानुदर्शितम् ॥ (२५।२)