ब्रह्मोवाच । (१।१)

संन्यासं तप इत्याहुर् वृद्धा निश्चितदर्शिनः । (१।२)

ब्राह्मणा ब्रह्मयोनिस्था ज्ञानं ब्रह्म परं विदुः ॥ (१।३)

अविदूरात् परं ब्रह्म वेदविद्याव्यपाश्रयम् । (२।१)

निर्द्वंद्वं निर्गुणं नित्यम् अचिन्त्यं गुह्यम् उत्तमम् ॥ (२।२)

ज्ञानेन तपसा चैव धीराः पश्यन्ति तत् पदम् । (३।१)

निर्णिक्ततमसः पूता व्युत्क्रान्तरजसो ऽमलाः ॥ (३।२)

तपसा क्षेमम् अध्वानं गच्छन्ति परमैषिणः । (४।१)

संन्यासनिरता नित्यं ये ब्रह्मविदुषो जनाः ॥ (४।२)

तपः प्रदीप इत्याहुर् आचारो धर्मसाधकः । (५।१)

ज्ञानं त्वेव परं विद्म संन्यासस्तप उत्तमम् ॥ (५।२)

यस्तु वेद निराबाधं ज्ञानं तत्त्वविनिश्चयात् । (६।१)

सर्वभूतस्थम् आत्मानं स सर्वगतिर् इष्यते ॥ (६।२)

यो विद्वान् सहवासं च विवासं चैव पश्यति । (७।१)

तथैवैकत्वनानात्वे स दुःखात् परिमुच्यते ॥ (७।२)

यो न कामयते किंचिन्न किंचिद् अवमन्यते । (८।१)

इहलोकस्थ एवैष ब्रह्मभूयाय कल्पते ॥ (८।२)

प्रधानगुणतत्त्वज्ञः सर्वभूतविधानवित् । (९।१)

निर्ममो निरहंकारो मुच्यते नात्र संशयः ॥ (९।२)

निर्द्वंद्वो निर्नमस्कारो निःस्वधाकार एव च । (१०।१)

निर्गुणं नित्यम् अद्वंद्वं प्रशमेनैव गच्छति ॥ (१०।२)

हित्वा गुणमयं सर्वं कर्म जन्तुः शुभाशुभम् । (११।१)

उभे सत्यानृते हित्वा मुच्यते नात्र संशयः ॥ (११।२)

अव्यक्तबीजप्रभवो बुद्धिस्कन्धमयो महान् । (१२।१)

महाहंकारविटप इन्द्रियान्तरकोटरः ॥ (१२।२)

महाभूतविशाखश्च विशेषप्रतिशाखवान् । (१३।१)

सदापर्णः सदापुष्पः शुभाशुभफलोदयः । (१३।२)

आजीवः सर्वभूतानां ब्रह्मवृक्षः सनातनः ॥ (१३।३)

एतच्छित्त्वा च भित्त्वा च ज्ञानेन परमासिना । (१४।१)

हित्वा चामरतां प्राप्य जह्याद् वै मृत्युजन्मनी । (१४।२)

निर्ममो निरहंकारो मुच्यते नात्र संशयः ॥ (१४।३)

द्वावेतौ पक्षिणौ नित्यौ सखायौ चाप्यचेतनौ । (१५।१)

एताभ्यां तु परो यस्य चेतनावान् इति स्मृतः ॥ (१५।२)

अचेतनः सत्त्वसंघातयुक्तः सत्त्वात् परं चेतयते ऽन्तरात्मा । (१६।१)

स क्षेत्रज्ञः सत्त्वसंघातबुद्धिर् गुणातिगो मुच्यते मृत्युपाशात् ॥ (१६।२)