जनमेजय उवाच । (१।१)

एवं हृतायां कृष्णायां प्राप्य क्लेशम् अनुत्तमम् । (१।२)

प्रतिलभ्य ततः कृष्णां किम् अकुर्वत पाण्डवाः ॥ (१।३)

वैशम्पायन उवाच । (२।१)

एवं हृतायां कृष्णायां प्राप्य क्लेशम् अनुत्तमम् । (२।२)

विहाय काम्यकं राजा सह भ्रातृभिर् अच्युतः ॥ (२।३)

पुनर् द्वैतवनं रम्यम् आजगाम युधिष्ठिरः । (३।१)

स्वादुमूलफलं रम्यं मार्कण्डेयाश्रमं प्रति ॥ (३।२)

अनुगुप्तफलाहाराः सर्व एव मिताशनाः । (४।१)

न्यवसन् पाण्डवास् तत्र कृष्णया सह भारत ॥ (४।२)

वसन् द्वैतवने राजा कुन्तीपुत्रो युधिष्ठिरः । (५।१)

भीमसेनो ऽर्जुनश् चैव माद्रीपुत्रौ च पाण्डवौ ॥ (५।२)

ब्राह्मणार्थे पराक्रान्ता धर्मात्मानो यतव्रताः । (६।१)

क्लेशम् आर्छन्त विपुलं सुखोदर्कं परंतपाः ॥ (६।२)

अजातशत्रुम् आसीनं भ्रातृभिः सहितं वने । (७।१)

आगम्य ब्राह्मणस् तूर्णं संतप्त इदम् अब्रवीत् ॥ (७।२)

अरणीसहितं मह्यं समासक्तं वनस्पतौ । (८।१)

मृगस्य घर्षमाणस्य विषाणे समसज्जत ॥ (८।२)

तद् आदाय गतो राजंस् त्वरमाणो महामृगः । (९।१)

आश्रमात् त्वरितः शीघ्रं प्लवमानो महाजवः ॥ (९।२)

तस्य गत्वा पदं शीघ्रम् आसाद्य च महामृगम् । (१०।१)

अग्निहोत्रं न लुप्येत तदानयत पाण्डवाः ॥ (१०।२)

ब्राह्मणस्य वचः श्रुत्वा संतप्तो ऽथ युधिष्ठिरः । (११।१)

धनुर् आदाय कौन्तेयः प्राद्रवद् भ्रातृभिः सह ॥ (११।२)

संनद्धा धन्विनः सर्वे प्राद्रवन् नरपुंगवाः । (१२।१)

ब्राह्मणार्थे यतन्तस् ते शीघ्रम् अन्वगमन् मृगम् ॥ (१२।२)

कर्णिनालीकनाराचान् उत्सृजन्तो महारथाः । (१३।१)

नाविध्यन् पाण्डवास् तत्र पश्यन्तो मृगम् अन्तिकात् ॥ (१३।२)

तेषां प्रयतमानानां नादृश्यत महामृगः । (१४।१)

अपश्यन्तो मृगं श्रान्ता दुःखं प्राप्ता मनस्विनः ॥ (१४।२)

शीतलच्छायम् आसाद्य न्यग्रोधं गहने वने । (१५।१)

क्षुत्पिपासापरीताङ्गाः पाण्डवाः समुपाविशन् ॥ (१५।२)

तेषां समुपविष्टानां नकुलो दुःखितस् तदा । (१६।१)

अब्रवीद् भ्रातरं ज्येष्ठम् अमर्षात् कुरुसत्तम ॥ (१६।२)

नास्मिन् कुले जातु ममज्ज धर्मो न चालस्याद् अर्थलोपो बभूव । (१७।१)

अनुत्तराः सर्वभूतेषु भूयः सम्प्राप्ताः स्मः संशयं केन राजन् ॥ (१७।२)