वैशंपायन उवाच । (१।१)

ततस्ते भरतश्रेष्ठाः समाजग्मुः परस्परम् । (१।२)

विगतक्रोधमात्सर्याः सर्वे विगतकल्मषाः ॥ (१।३)

विधिं परमम् आस्थाय ब्रह्मर्षिविहितं शुभम् । (२।१)

संप्रीतमनसः सर्वे देवलोक इवामराः ॥ (२।२)

पुत्रः पित्रा च मात्रा च भार्या च पतिना सह । (३।१)

भ्राता भ्रात्रा सखा चैव सख्या राजन् समागताः ॥ (३।२)

पाण्डवास्तु महेष्वासं कर्णं सौभद्रम् एव च । (४।१)

संप्रहर्षात् समाजग्मुर् द्रौपदेयांश्च सर्वशः ॥ (४।२)

ततस्ते प्रीयमाणा वै कर्णेन सह पाण्डवाः । (५।१)

समेत्य पृथिवीपालाः सौहृदे ऽवस्थिताभवन् ॥ (५।२)

ऋषिप्रसादात् ते ऽन्ये च क्षत्रिया नष्टमन्यवः । (६।१)

असौहृदं परित्यज्य सौहृदे पर्यवस्थिताः ॥ (६।२)

एवं समागताः सर्वे गुरुभिर् बान्धवैस्तथा । (७।१)

पुत्रैश्च पुरुषव्याघ्राः कुरवो ऽन्ये च मानवाः ॥ (७।२)

तां रात्रिम् एकां कृत्स्नां ते विहृत्य प्रीतमानसाः । (८।१)

मेनिरे परितोषेण नृपाः स्वर्गसदो यथा ॥ (८।२)

नात्र शोको भयं त्रासो नारतिर् नायशो ऽभवत् । (९।१)

परस्परं समागम्य योधानां भरतर्षभ ॥ (९।२)

समागतास्ताः पितृभिर् भ्रातृभिः पतिभिः सुतैः । (१०।१)

मुदं परमिकां प्राप्य नार्यो दुःखम् अथात्यजन् ॥ (१०।२)

एकां रात्रिं विहृत्यैवं ते वीरास्ताश्च योषितः । (११।१)

आमन्त्र्यान्योन्यम् आश्लिष्य ततो जग्मुर् यथागतम् ॥ (११।२)

ततो विसर्जयामास लोकांस्तान्मुनिपुंगवः । (१२।१)

क्षणेनान्तर्हिताश्चैव प्रेक्षताम् एव ते ऽभवन् ॥ (१२।२)

अवगाह्य महात्मानः पुण्यां त्रिपथगां नदीम् । (१३।१)

सरथाः सध्वजाश्चैव स्वानि स्थानानि भेजिरे ॥ (१३।२)

देवलोकं ययुः केचित् केचिद् ब्रह्मसदस्तथा । (१४।१)

केचिच्च वारुणं लोकं केचित् कौबेरम् आप्नुवन् ॥ (१४।२)

तथा वैवस्वतं लोकं केचिच्चैवाप्नुवन्नृपाः । (१५।१)

राक्षसानां पिशाचानां केचिच्चाप्युत्तरान् कुरून् ॥ (१५।२)

विचित्रगतयः सर्वे या अवाप्यामरैः सह । (१६।१)

आजग्मुस्ते महात्मानः सवाहाः सपदानुगाः ॥ (१६।२)

गतेषु तेषु सर्वेषु सलिलस्थो महामुनिः । (१७।१)

धर्मशीलो महातेजाः कुरूणां हितकृत् सदा । (१७।२)

ततः प्रोवाच ताः सर्वाः क्षत्रिया निहतेश्वराः ॥ (१७।३)

या याः पतिकृतांल्लोकान् इच्छन्ति परमस्त्रियः । (१८।१)

ता जाह्नवीजलं क्षिप्रम् अवगाहन्त्वतन्द्रिताः ॥ (१८।२)

ततस्तस्य वचः श्रुत्वा श्रद्दधाना वराङ्गनाः । (१९।१)

श्वशुरं समनुज्ञाप्य विविशुर् जाह्नवीजलम् ॥ (१९।२)

विमुक्ता मानुषैर् देहैस्ततस्ता भर्तृभिः सह । (२०।१)

समाजग्मुस्तदा साध्व्यः सर्वा एव विशां पते ॥ (२०।२)

एवं क्रमेण सर्वास्ताः शीलवत्यः कुलस्त्रियः । (२१।१)

प्रविश्य तोयं निर्मुक्ता जग्मुर् भर्तृसलोकताम् ॥ (२१।२)

दिव्यरूपसमायुक्ता दिव्याभरणभूषिताः । (२२।१)

दिव्यमाल्याम्बरधरा यथासां पतयस्तथा ॥ (२२।२)

ताः शीलसत्त्वसम्पन्ना वितमस्का गतक्लमाः । (२३।१)

सर्वाः सर्वगुणैर् युक्ताः स्वं स्वं स्थानं प्रपेदिरे ॥ (२३।२)

यस्य यस्य च यः कामस्तस्मिन् काले ऽभवत् तदा । (२४।१)

तं तं विसृष्टवान् व्यासो वरदो धर्मवत्सलः ॥ (२४।२)

तच्छ्रुत्वा नरदेवानां पुनरागमनं नराः । (२५।१)

जहृषुर् मुदिताश्चासन्न् अन्यदेहगता अपि ॥ (२५।२)

प्रियैः समागमं तेषां य इमं शृणुयान्नरः । (२६।१)

प्रियाणि लभते नित्यम् इह च प्रेत्य चैव ह ॥ (२६।२)

इष्टबान्धवसंयोगम् अनायासम् अनामयम् । (२७।१)

य इमं श्रावयेद् विद्वान् संसिद्धिं प्राप्नुयात् पराम् ॥ (२७।२)

स्वाध्याययुक्ताः पुरुषाः क्रियायुक्ताश्च भारत । (२८।१)

अध्यात्मयोगयुक्ताश्च धृतिमन्तश्च मानवाः । (२८।२)

श्रुत्वा पर्व त्विदं नित्यम् अवाप्स्यन्ति परां गतिम् ॥ (२८।३)