भीष्म उवाच । (१।१)

प्राचेतसस्य वचनं कीर्तयन्ति पुराविदः । (१।२)

यस्याः किंचिन्नाददते ज्ञातयो न स विक्रयः ॥ (१।३)

अर्हणं तत् कुमारीणाम् आनृशंस्यतमं च तत् । (२।१)

सर्वं च प्रतिदेयं स्यात् कन्यायै तद् अशेषतः ॥ (२।२)

पितृभिर् भ्रातृभिश्चैव श्वशुरैर् अथ देवरैः । (३।१)

पूज्या लालयितव्याश्च बहुकल्याणम् ईप्सुभिः ॥ (३।२)

यदि वै स्त्री न रोचेत पुमांसं न प्रमोदयेत् । (४।१)

अमोदनात् पुनः पुंसः प्रजनं न प्रवर्धते ॥ (४।२)

पूज्या लालयितव्याश्च स्त्रियो नित्यं जनाधिप । (५।१)

अपूजिताश्च यत्रैताः सर्वास्तत्राफलाः क्रियाः । (५।२)

तदैव तत् कुलं नास्ति यदा शोचन्ति जामयः ॥ (५।३)

जामीशप्तानि गेहानि निकृत्तानीव कृत्यया । (६।१)

नैव भान्ति न वर्धन्ते श्रिया हीनानि पार्थिव ॥ (६।२)

स्त्रियः पुंसां परिददे मनुर् जिगमिषुर् दिवम् । (७।१)

अबलाः स्वल्पकौपीनाः सुहृदः सत्यजिष्णवः ॥ (७।२)

ईर्ष्यवो मानकामाश्च चण्डा असुहृदो ऽबुधाः । (८।१)

स्त्रियो माननम् अर्हन्ति ता मानयत मानवाः ॥ (८।२)

स्त्रीप्रत्ययो हि वो धर्मो रतिभोगाश्च केवलाः । (९।१)

परिचर्यान्नसंस्कारास्तदायत्ता भवन्तु वः ॥ (९।२)

उत्पादनम् अपत्यस्य जातस्य परिपालनम् । (१०।१)

प्रीत्यर्थं लोकयात्रा च पश्यत स्त्रीनिबन्धनम् ॥ (१०।२)

संमान्यमानाश्चैताभिः सर्वकार्याण्यवाप्स्यथ । (११।१)

विदेहराजदुहिता चात्र श्लोकम् अगायत ॥ (११।२)

नास्ति यज्ञः स्त्रियः कश्चिन्न श्राद्धं नोपवासकम् । (१२।१)

धर्मस्तु भर्तृशुश्रूषा तया स्वर्गं जयत्युत ॥ (१२।२)

पिता रक्षति कौमारे भर्ता रक्षति यौवने । (१३।१)

पुत्रास्तु स्थविरीभावे न स्त्री स्वातन्त्र्यम् अर्हति ॥ (१३।२)

श्रिय एताः स्त्रियो नाम सत्कार्या भूतिम् इच्छता । (१४।१)

लालिता निगृहीता च स्त्री श्रीर् भवति भारत ॥ (१४।२)