भीष्म उवाच । (१।१)

नाधर्मेण महीं जेतुं लिप्सेत जगतीपतिः । (१।२)

अधर्मविजयं लब्ध्वा को ऽनुमन्येत भूमिपः ॥ (१।३)

अधर्मयुक्तो विजयो ह्यध्रुवो ऽस्वर्ग्य एव च । (२।१)

सादयत्येष राजानं महीं च भरतर्षभ ॥ (२।२)

विशीर्णकवचं चैव तवास्मीति च वादिनम् । (३।१)

कृताञ्जलिं न्यस्तशस्त्रं गृहीत्वा न विहिंसयेत् ॥ (३।२)

बलेनावजितो यश्च न तं युध्येत भूमिपः । (४।१)

संवत्सरं विप्रणयेत् तस्माज्जातः पुनर् भवेत् ॥ (४।२)

नार्वाक् संवत्सरात् कन्या स्प्रष्टव्या विक्रमाहृता । (५।१)

एवम् एव धनं सर्वं यच्चान्यत् सहसाहृतम् ॥ (५।२)

न तु वन्ध्यं धनं तिष्ठेत् पिबेयुर् ब्राह्मणाः पयः । (६।१)

युञ्जीरन् वाप्यनडुहः क्षन्तव्यं वा तदा भवेत् ॥ (६।२)

राज्ञा राजैव योद्धव्यस्तथा धर्मो विधीयते । (७।१)

नान्यो राजानम् अभ्यसेद् अराजन्यः कथंचन ॥ (७।२)

अनीकयोः संहतयोर् यदीयाद् ब्राह्मणो ऽन्तरा । (८।१)

शान्तिम् इच्छन्न् उभयतो न योद्धव्यं तदा भवेत् । (८।२)

मर्यादां शाश्वतीं भिन्द्याद् ब्राह्मणं यो ऽभिलङ्घयेत् ॥ (८।३)

अथ चेल् लङ्घयेद् एनां मर्यादां क्षत्रियब्रुवः । (९।१)

अप्रशस्यस् तदूर्ध्वं स्याद् अनादेयश्च संसदि ॥ (९।२)

या तु धर्मविलोपेन मर्यादाभेदनेन च । (१०।१)

तां वृत्तिं नानुवर्तेत विजिगीषुर् महीपतिः । (१०।२)

धर्मलब्धाद्धि विजयात् को लाभो ऽभ्यधिको भवेत् ॥ (१०।३)

सहसा नाम्य भूतानि क्षिप्रम् एव प्रसादयेत् । (११।१)

सान्त्वेन भोगदानेन स राज्ञां परमो नयः ॥ (११।२)

भुज्यमाना ह्ययोगेन स्वराष्ट्राद् अभितापिताः । (१२।१)

अमित्रान् पर्युपासीरन् व्यसनौघप्रतीक्षिणः ॥ (१२।२)

अमित्रोपग्रहं चास्य ते कुर्युः क्षिप्रम् आपदि । (१३।१)

संदुष्टाः सर्वतो राजन् राजव्यसनकाङ्क्षिणः ॥ (१३।२)

नामित्रो विनिकर्तव्यो नातिच्छेद्यः कथंचन । (१४।१)

जीवितं ह्यप्यतिच्छिन्नः संत्यजत्येकदा नरः ॥ (१४।२)

अल्पेनापि हि संयुक्तस्तुष्यत्येवापराधिकः । (१५।१)

शुद्धं जीवितम् एवापि तादृशो बहु मन्यते ॥ (१५।२)

यस्य स्फीतो जनपदः सम्पन्नः प्रियराजकः । (१६।१)

संतुष्टभृत्यसचिवो दृढमूलः स पार्थिवः ॥ (१६।२)

ऋत्विक्पुरोहिताचार्या ये चान्ये श्रुतसंमताः । (१७।१)

पूजार्हाः पूजिता यस्य स वै लोकजिद् उच्यते ॥ (१७।२)

एतेनैव च वृत्तेन महीं प्राप सुरोत्तमः । (१८।१)

अन्वेव चैन्द्रं विजयं व्यजिगीषन्त पार्थिवाः ॥ (१८।२)

भूमिवर्जं पुरं राजा जित्वा राजानम् आहवे । (१९।१)

अमृताश्चौषधीः शश्वद् आजहार प्रतर्दनः ॥ (१९।२)

अग्निहोत्राण्यग्निशेषं हविर् भाजनम् एव च । (२०।१)

आजहार दिवोदासस्ततो विप्रकृतो ऽभवत् ॥ (२०।२)

सराजकानि राष्ट्राणि नाभागो दक्षिणां ददौ । (२१।१)

अन्यत्र श्रोत्रियस्वाच्च तापसस्वाच्च भारत ॥ (२१।२)

उच्चावचानि वृत्तानि धर्मज्ञानां युधिष्ठिर । (२२।१)

आसन् राज्ञां पुराणानां सर्वं तन्मम रोचते ॥ (२२।२)

सर्वविद्यातिरेकाद् वा जयम् इच्छेन्महीपतिः । (२३।१)

न मायया न दम्भेन य इच्छेद् भूतिम् आत्मनः ॥ (२३।२)