वैशंपायन उवाच । (१।१)

ततो युधिष्ठिरो राजा देवैः सर्षिमरुद्गणैः । (१।२)

पूज्यमानो ययौ तत्र यत्र ते कुरुपुंगवाः ॥ (१।३)

ददर्श तत्र गोविन्दं ब्राह्मेण वपुषान्वितम् । (२।१)

तेनैव दृष्टपूर्वेण सादृश्येनोपसूचितम् ॥ (२।२)

दीप्यमानं स्ववपुषा दिव्यैर् अस्त्रैर् उपस्थितम् । (३।१)

चक्रप्रभृतिभिर् घोरैर् दिव्यैः पुरुषविग्रहैः । (३।२)

उपास्यमानं वीरेण फल्गुनेन सुवर्चसा ॥ (३।३)

अपरस्मिन्न् अथोद्देशे कर्णं शस्त्रभृतां वरम् । (४।१)

द्वादशादित्यसहितं ददर्श कुरुनन्दनः ॥ (४।२)

अथापरस्मिन्न् उद्देशे मरुद्गणवृतं प्रभुम् । (५।१)

भीमसेनम् अथापश्यत् तेनैव वपुषान्वितम् ॥ (५।२)

अश्विनोस्तु तथा स्थाने दीप्यमानौ स्वतेजसा । (६।१)

नकुलं सहदेवं च ददर्श कुरुनन्दनः ॥ (६।२)

तथा ददर्श पाञ्चालीं कमलोत्पलमालिनीम् । (७।१)

वपुषा स्वर्गम् आक्रम्य तिष्ठन्तीम् अर्कवर्चसम् ॥ (७।२)

अथैनां सहसा राजा प्रष्टुम् ऐच्छद् युधिष्ठिरः । (८।१)

ततो ऽस्य भगवान् इन्द्रः कथयामास देवराट् ॥ (८।२)

श्रीर् एषा द्रौपदीरूपा त्वदर्थे मानुषं गता । (९।१)

अयोनिजा लोककान्ता पुण्यगन्धा युधिष्ठिर ॥ (९।२)

द्रुपदस्य कुले जाता भवद्भिश्चोपजीविता । (१०।१)

रत्यर्थं भवतां ह्येषा निर्मिता शूलपाणिना ॥ (१०।२)

एते पञ्च महाभागा गन्धर्वाः पावकप्रभाः । (११।१)

द्रौपद्यास्तनया राजन् युष्माकम् अमितौजसः ॥ (११।२)

पश्य गन्धर्वराजानं धृतराष्ट्रं मनीषिणम् । (१२।१)

एनं च त्वं विजानीहि भ्रातरं पूर्वजं पितुः ॥ (१२।२)

अयं ते पूर्वजो भ्राता कौन्तेयः पावकद्युतिः । (१३।१)

सूर्यपुत्रो ऽग्रजः श्रेष्ठो राधेय इति विश्रुतः । (१३।२)

आदित्यसहितो याति पश्यैनं पुरुषर्षभ ॥ (१३।३)

साध्यानाम् अथ देवानां वसूनां मरुताम् अपि । (१४।१)

गणेषु पश्य राजेन्द्र वृष्ण्यन्धकमहारथान् । (१४।२)

सात्यकिप्रमुखान् वीरान् भोजांश्चैव महारथान् ॥ (१४।३)

सोमेन सहितं पश्य सौभद्रम् अपराजितम् । (१५।१)

अभिमन्युं महेष्वासं निशाकरसमद्युतिम् ॥ (१५।२)

एष पाण्डुर् महेष्वासः कुन्त्या माद्र्या च संगतः । (१६।१)

विमानेन सदाभ्येति पिता तव ममान्तिकम् ॥ (१६।२)

वसुभिः सहितं पश्य भीष्मं शांतनवं नृपम् । (१७।१)

द्रोणं बृहस्पतेः पार्श्वे गुरुम् एनं निशामय ॥ (१७।२)

एते चान्ये महीपाला योधास्तव च पाण्डव । (१८।१)

गन्धर्वैः सहिता यान्ति यक्षैः पुण्यजनैस्तथा ॥ (१८।२)

गुह्यकानां गतिं चापि केचित् प्राप्ता नृसत्तमाः । (१९।१)

त्यक्त्वा देहं जितस्वर्गाः पुण्यवाग्बुद्धिकर्मभिः ॥ (१९।२)