वैशंपायन उवाच । (१।१)

पार्थः प्राप्य धनुःश्रेष्ठम् अक्षय्यौ च महेषुधी । (१।२)

रथं ध्वजं सभां चैव युधिष्ठिरम् अभाषत ॥ (१।३)

धनुर् अस्त्रं शरा वीर्यं पक्षो भूमिर् यशो बलम् । (२।१)

प्राप्तम् एतन्मया राजन् दुष्प्रापं यद् अभीप्सितम् ॥ (२।२)

तत्र कृत्यम् अहं मन्ये कोशस्यास्य विवर्धनम् । (३।१)

करम् आहारयिष्यामि राज्ञः सर्वान्नृपोत्तम ॥ (३।२)

विजयाय प्रयास्यामि दिशं धनदरक्षिताम् । (४।१)

तिथावथ मुहूर्ते च नक्षत्रे च तथा शिवे ॥ (४।२)

धनंजयवचः श्रुत्वा धर्मराजो युधिष्ठिरः । (५।१)

स्निग्धगम्भीरनादिन्या तं गिरा प्रत्यभाषत ॥ (५।२)

स्वस्ति वाच्यार्हतो विप्रान् प्रयाहि भरतर्षभ । (६।१)

दुर्हृदाम् अप्रहर्षाय सुहृदां नन्दनाय च । (६।२)

विजयस्ते ध्रुवं पार्थ प्रियं कामम् अवाप्नुहि ॥ (६।३)

इत्युक्तः प्रययौ पार्थः सैन्येन महता वृतः । (७।१)

अग्निदत्तेन दिव्येन रथेनाद्भुतकर्मणा ॥ (७।२)

तथैव भीमसेनो ऽपि यमौ च पुरुषर्षभौ । (८।१)

ससैन्याः प्रययुः सर्वे धर्मराजाभिपूजिताः ॥ (८।२)

दिशं धनपतेर् इष्टाम् अजयत् पाकशासनिः । (९।१)

भीमसेनस्तथा प्राचीं सहदेवस्तु दक्षिणाम् ॥ (९।२)

प्रतीचीं नकुलो राजन् दिशं व्यजयद् अस्त्रवित् । (१०।१)

खाण्डवप्रस्थम् अध्यास्ते धर्मराजो युधिष्ठिरः ॥ (१०।२)

जनमेजय उवाच । (११।१)

दिशाम् अभिजयं ब्रह्मन् विस्तरेणानुकीर्तय । (११।२)

न हि तृप्यामि पूर्वेषां शृण्वानश्चरितं महत् ॥ (११।३)

वैशंपायन उवाच । (१२।१)

धनंजयस्य वक्ष्यामि विजयं पूर्वम् एव ते । (१२।२)

यौगपद्येन पार्थैर् हि विजितेयं वसुंधरा ॥ (१२।३)

पूर्वं कुणिन्दविषये वशे चक्रे महीपतीन् । (१३।१)

धनंजयो महाबाहुर् नातितीव्रेण कर्मणा ॥ (१३।२)

आनर्तान् कालकूटांश्च कुणिन्दांश्च विजित्य सः । (१४।१)

सुमण्डलं पापजितं कृतवान् अनुसैनिकम् ॥ (१४।२)

स तेन सहितो राजन् सव्यसाची परंतपः । (१५।१)

विजिग्ये सकलं द्वीपं प्रतिविन्ध्यं च पार्थिवम् ॥ (१५।२)

सकलद्वीपवासांश्च सप्तद्वीपे च ये नृपाः । (१६।१)

अर्जुनस्य च सैन्यानां विग्रहस्तुमुलो ऽभवत् ॥ (१६।२)

स तान् अपि महेष्वासो विजित्य भरतर्षभ । (१७।१)

तैर् एव सहितः सर्वैः प्राग्ज्योतिषम् उपाद्रवत् ॥ (१७।२)

तत्र राजा महान् आसीद् भगदत्तो विशां पते । (१८।१)

तेनासीत् सुमहद् युद्धं पाण्डवस्य महात्मनः ॥ (१८।२)

स किरातैश्च चीनैश्च वृतः प्राग्ज्योतिषो ऽभवत् । (१९।१)

अन्यैश्च बहुभिर् योधैः सागरानूपवासिभिः ॥ (१९।२)

ततः स दिवसान् अष्टौ योधयित्वा धनंजयम् । (२०।१)

प्रहसन्न् अब्रवीद् राजा संग्रामे विगतक्लमः ॥ (२०।२)

उपपन्नं महाबाहो त्वयि पाण्डवनन्दन । (२१।१)

पाकशासनदायादे वीर्यम् आहवशोभिनि ॥ (२१।२)

अहं सखा सुरेन्द्रस्य शक्राद् अनवमो रणे । (२२।१)

न च शक्नोमि ते तात स्थातुं प्रमुखतो युधि ॥ (२२।२)

किम् ईप्सितं पाण्डवेय ब्रूहि किं करवाणि ते । (२३।१)

यद् वक्ष्यसि महाबाहो तत् करिष्यामि पुत्रक ॥ (२३।२)

अर्जुन उवाच । (२४।१)

कुरूणाम् ऋषभो राजा धर्मपुत्रो युधिष्ठिरः । (२४।२)

तस्य पार्थिवताम् ईप्से करस्तस्मै प्रदीयताम् ॥ (२४।३)

भवान् पितृसखा चैव प्रीयमाणो मयापि च । (२५।१)

ततो नाज्ञापयामि त्वां प्रीतिपूर्वं प्रदीयताम् ॥ (२५।२)

भगदत्त उवाच । (२६।१)

कुन्तीमातर् यथा मे त्वं तथा राजा युधिष्ठिरः । (२६।२)

सर्वम् एतत् करिष्यामि किं चान्यत् करवाणि ते ॥ (२६।३)