भीष्म उवाच । (१।१)

यमस्तु यानि श्राद्धानि प्रोवाच शशबिन्दवे । (१।२)

तानि मे शृणु काम्यानि नक्षत्रेषु पृथक् पृथक् ॥ (१।३)

श्राद्धं यः कृत्तिकायोगे कुर्वीत सततं नरः । (२।१)

अग्नीन् आधाय सापत्यो यजेत विगतज्वरः ॥ (२।२)

अपत्यकामो रोहिण्याम् ओजस्कामो मृगोत्तमे । (३।१)

क्रूरकर्मा ददच्छ्राद्धम् आर्द्रायां मानवो भवेत् ॥ (३।२)

कृषिभागी भवेन्मर्त्यः कुर्वञ्श्राद्धं पुनर्वसौ । (४।१)

पुष्टिकामो ऽथ पुष्येण श्राद्धम् ईहेत मानवः ॥ (४।२)

आश्लेषायां ददच्छ्राद्धं वीरान् पुत्रान् प्रजायते । (५।१)

ज्ञातीनां तु भवेच्छ्रेष्ठो मघासु श्राद्धम् आवपन् ॥ (५।२)

फल्गुनीषु ददच्छ्राद्धं सुभगः श्राद्धदो भवेत् । (६।१)

अपत्यभाग् उत्तरासु हस्तेन फलभाग् भवेत् ॥ (६।२)

चित्रायां तु ददच्छ्राद्धं लभेद् रूपवतः सुतान् । (७।१)

स्वातियोगे पितॄन् अर्च्य वाणिज्यम् उपजीवति ॥ (७।२)

बहुपुत्रो विशाखासु पित्र्यम् ईहन् भवेन्नरः । (८।१)

अनुराधासु कुर्वाणो राजचक्रं प्रवर्तयेत् ॥ (८।२)

आदिपत्यं व्रजेन्मर्त्यो ज्येष्ठायाम् अपवर्जयन् । (९।१)

नरः कुरुकुलश्रेष्ठ श्रद्धादमपुरःसरः ॥ (९।२)

मूले त्वारोग्यम् अर्छेत यशो ऽषाढास्वनुत्तमम् । (१०।१)

उत्तरासु त्वषाढासु वीतशोकश्चरेन्महीम् ॥ (१०।२)

श्राद्धं त्वभिजिता कुर्वन् विद्यां श्रेष्ठाम् अवाप्नुयात् । (११।१)

श्रवणे तु ददच्छ्राद्धं प्रेत्य गच्छेत् परां गतिम् ॥ (११।२)

राज्यभागी धनिष्ठायां प्राप्नुयान्नापदं नरः । (१२।१)

नक्षत्रे वारुणे कुर्वन् भिषक्सिद्धिम् अवाप्नुयात् ॥ (१२।२)

पूर्वप्रोष्ठपदाः कुर्वन् बहु विन्देद् अजाविकम् । (१३।१)

उत्तरास्वथ कुर्वाणो विन्दते गाः सहस्रशः ॥ (१३।२)

बहुरूप्यकृतं वित्तं विन्दते रेवतीं श्रितः । (१४।१)

अश्वांश्चाश्वयुजे वेत्ति भरणीष्वायुर् उत्तमम् ॥ (१४।२)

इमं श्राद्धविधिं श्रुत्वा शशबिन्दुस्तथाकरोत् । (१५।१)

अक्लेशेनाजयच्चापि महीं सो ऽनुशशास ह ॥ (१५।२)