वैशंपायन उवाच । (१।१)

पाण्डवैः सह संयोगं गतस्य द्रुपदस्य तु । (१।२)

न बभूव भयं किंचिद् देवेभ्यो ऽपि कथंचन । (१।३)

एवं विवाहं कृत्वा ते वीरा द्रुपदवेश्मनि । (१।४)

ऊषुः सर्वे यथा पुण्यं कृतवन्तो ऽन्तरिक्षगाः ॥ (१।५)

कुन्तीम् आसाद्य ता नार्यो द्रुपदस्य महात्मनः । (२।१)

नाम संकीर्तयन्त्यस्ताः पादौ जग्मुः स्वमूर्धभिः ॥ (२।२)

कृष्णा च क्षौमसंवीता कृतकौतुकमङ्गला । (३।१)

कृताभिवादना श्वश्र्वास्तस्थौ प्रह्वा कृताञ्जलिः ॥ (३।२)

रूपलक्षणसम्पन्नां शीलाचारसमन्विताम् । (४।१)

द्रौपदीम् अवदत् प्रेम्णा पृथाशीर्वचनं स्नुषाम् ॥ (४।२)

यथेन्द्राणी हरिहये स्वाहा चैव विभावसौ । (५।१)

रोहिणी च यथा सोमे दमयन्ती यथा नले ॥ (५।२)

यथा वैश्रवणे भद्रा वसिष्ठे चाप्यरुन्धती । (६।१)

यथा दाशरथौ सीता यथा रुद्रे नगात्मजा । (६।२)

लोपामुद्रा यथागस्त्ये यथा रामे च जानकी । (६।३)

यथा नारायणे लक्ष्मीस्तथा त्वं भव भर्तृषु । (६।४)

वाग्देवी चतुरानने । (६।५)

गिरिजा गिरिशे यद्वद् उषा भानौ यथा स्थिरा । (६।६)

स्थिरा च वल्लभा च त्वम् ॥ (६।७)

जीवसूर् वीरसूर् भद्रे बहुसौख्यसमन्विता । (७।१)

सुभगा भोगसम्पन्ना यज्ञपत्नी स्वनुव्रता ॥ (७।२)

अतिथीन् आगतान् साधून् बालान् वृद्धान् गुरूंस्तथा । (८।१)

पूजयन्त्या यथान्यायं शश्वद् गच्छन्तु ते समाः ॥ (८।२)

कुरुजाङ्गलमुख्येषु राष्ट्रेषु नगरेषु च । (९।१)

अनु त्वम् अभिषिच्यस्व नृपतिं धर्मवत्सलम् ॥ (९।२)

पतिभिर् निर्जिताम् उर्वीं विक्रमेण महाबलैः । (१०।१)

कुरु ब्राह्मणसात् सर्वाम् अश्वमेधे महाक्रतौ ॥ (१०।२)

पृथिव्यां यानि रत्नानि गुणवन्ति गुणान्विते । (११।१)

तान्याप्नुहि त्वं कल्याणि सुखिनी शरदां शतम् ॥ (११।२)

यथा च त्वाभिनन्दामि वध्वद्य क्षौमसंवृताम् । (१२।१)

तथा भूयो ऽभिनन्दिष्ये सूतपुत्रां गुणान्विताम् ॥ (१२।२)

ततस्तु कृतदारेभ्यः पाण्डुभ्यः प्राहिणोद्धरिः । (१३।१)

मुक्तावैडूर्यचित्राणि हैमान्याभरणानि च ॥ (१३।२)

वासांसि च महार्हाणि नानादेश्यानि माधवः । (१४।१)

कम्बलाजिनरत्नानि स्पर्शवन्ति शुभानि च ॥ (१४।२)

शयनासनयानानि विविधानि महान्ति च । (१५।१)

वैडूर्यवज्रचित्राणि शतशो भाजनानि च ॥ (१५।२)

रूपयौवनदाक्षिण्यैर् उपेताश्च स्वलंकृताः । (१६।१)

राकाशशाङ्कवदनाः पद्मिनीजातिसंभवाः । (१६।२)

पद्मगन्धाः पद्ममुखाः पद्मपत्रनिभेक्षणाः । (१६।३)

मुक्तायुक्तसुकर्णाश्च सप्तबिन्दुललाटिकाः । (१६।४)

पीवरस्तनभारार्ताः शङ्खकण्ठ्यः सुनासिकाः । (१६।५)

कृष्णदीर्घसुकेशिन्यो मुष्टिग्राह्यसुमध्यमाः । (१६।६)

भृङ्गालिरोमलतिका ह्यावर्तनिभनाभिकाः । (१६।७)

विपुलश्रोणिफलका रम्भास्तम्भोरुयुग्मकाः । (१६।८)

प्रेष्याः सम्प्रददौ कृष्णो नानादेश्याः सहस्रशः ॥ (१६।९)

गजान् विनीतान् भद्रांश्च सदश्वांश्च स्वलंकृतान् । (१७।१)

रथांश्च दान्तान् सौवर्णैः शुभैः पट्टैर् अलंकृतान् ॥ (१७।२)

कोटिशश्च सुवर्णं स तेषाम् अकृतकं तथा । (१८।१)

वीतीकृतम् अमेयात्मा प्राहिणोन् मधुसूदनः ॥ (१८।२)

तत् सर्वं प्रतिजग्राह धर्मराजो युधिष्ठिरः । (१९।१)

मुदा परमया युक्तो गोविन्दप्रियकाम्यया ॥ (१९।२)