भीष्म उवाच । (१।१)

अथ काले बहुतिथे पूर्णे प्राप्तो भुजंगमः । (१।२)

दत्ताभ्यनुज्ञः स्वं वेश्म कृतकर्मा विवस्वतः ॥ (१।३)

तं भार्या समभिक्रामत् पादशौचादिभिर् गुणैः । (२।१)

उपपन्नां च तां साध्वीं पन्नगः पर्यपृच्छत ॥ (२।२)

अपि त्वम् असि कल्याणि देवतातिथिपूजने । (३।१)

पूर्वम् उक्तेन विधिना युक्ता युक्तेन मत्समम् ॥ (३।२)

न खल्वस्यकृतार्थेन स्त्रीबुद्ध्या मार्दवीकृता । (४।१)

मद्वियोगेन सुश्रोणि वियुक्ता धर्मसेतुना ॥ (४।२)

नागभार्योवाच । (५।१)

शिष्याणां गुरुशुश्रूषा विप्राणां वेदपारणम् । (५।२)

भृत्यानां स्वामिवचनं राज्ञां लोकानुपालनम् ॥ (५।३)

सर्वभूतपरित्राणं क्षत्रधर्म इहोच्यते । (६।१)

वैश्यानां यज्ञसंवृत्तिर् आतिथेयसमन्विता ॥ (६।२)

विप्रक्षत्रियवैश्यानां शुश्रूषा शूद्रकर्म तत् । (७।१)

गृहस्थधर्मो नागेन्द्र सर्वभूतहितैषिता ॥ (७।२)

नियताहारता नित्यं व्रतचर्या यथाक्रमम् । (८।१)

धर्मो हि धर्मसंबन्धाद् इन्द्रियाणां विशेषणम् ॥ (८।२)

अहं कस्य कुतो वाहं कः को मे ह भवेद् इति । (९।१)

प्रयोजनमतिर् नित्यम् एवं मोक्षाश्रमी भवेत् ॥ (९।२)

पतिव्रतात्वं भार्यायाः परमो धर्म उच्यते । (१०।१)

तवोपदेशान्नागेन्द्र तच्च तत्त्वेन वेद्मि वै ॥ (१०।२)

साहं धर्मं विजानन्ती धर्मनित्ये त्वयि स्थिते । (११।१)

सत्पथं कथम् उत्सृज्य यास्यामि विषमे पथि ॥ (११।२)

देवतानां महाभाग धर्मचर्या न हीयते । (१२।१)

अतिथीनां च सत्कारे नित्ययुक्तास्म्यतन्द्रिता ॥ (१२।२)

सप्ताष्टदिवसास्त्वद्य विप्रस्येहागतस्य वै । (१३।१)

स च कार्यं न मे ख्याति दर्शनं तव काङ्क्षति ॥ (१३।२)

गोमत्यास्त्वेष पुलिने त्वद्दर्शनसमुत्सुकः । (१४।१)

आसीनो ऽऽवर्तयन् ब्रह्म ब्राह्मणः संशितव्रतः ॥ (१४।२)

अहं त्वनेन नागेन्द्र सामपूर्वं समाहिता । (१५।१)

प्रस्थाप्यो मत्सकाशं स सम्प्राप्तो भुजगोत्तमः ॥ (१५।२)

एतच्छ्रुत्वा महाप्राज्ञ तत्र गन्तुं त्वम् अर्हसि । (१६।१)

दातुम् अर्हसि वा तस्य दर्शनं दर्शनश्रवः ॥ (१६।२)