लोमश उवाच । (१।१)

अस्मिन् किल स्वयं राजन्निष्टवान् वै प्रजापतिः । (१।२)

सत्त्रम् इष्टीकृतं नाम पुरा वर्षसहस्रिकम् ॥ (१।३)

अम्बरीषश् च नाभाग इष्टवान् यमुनाम् अनु । (२।१)

यज्ञैश् च तपसा चैव परां सिद्धिम् अवाप सः ॥ (२।२)

देशो नाहुषयज्ञानाम् अयं पुण्यतमो नृप । (३।१)

यत्रेष्ट्वा दश पद्मानि सदस्येभ्यो निसृष्टवान् ॥ (३।२)

सार्वभौमस्य कौन्तेय ययातेर् अमितौजसः । (४।१)

स्पर्धमानस्य शक्रेण पश्येदं यज्ञवास्त्विह ॥ (४।२)

पश्य नानाविधाकारैर् अग्निभिर् निचितां महीम् । (५।१)

मज्जन्तीम् इव चाक्रान्तां ययातेर् यज्ञकर्मभिः ॥ (५।२)

एषा शम्येकपत्त्रा सा शरकं चैतद् उत्तमम् । (६।१)

पश्य रामह्रदान् एतान् पश्य नारायणाश्रमम् ॥ (६।२)

एतद् आर्चीकपुत्रस्य योगैर् विचरतो महीम् । (७।१)

अपसर्पणं महीपाल रौप्यायाम् अमितौजसः ॥ (७।२)

अत्रानुवंशं पठतः शृणु मे कुरुनन्दन । (८।१)

उलूखलैर् आभरणैः पिशाची यद् अभाषत ॥ (८।२)

युगंधरे दधि प्राश्य उषित्वा चाच्युतस्थले । (९।१)

तद्वद् भूतिलये स्नात्वा सपुत्रा वस्तुम् इच्छसि ॥ (९।२)

एकरात्रम् उषित्वेह द्वितीयं यदि वत्स्यसि । (१०।१)

एतद् वै ते दिवा वृत्तं रात्रौ वृत्तम् अतो ऽन्यथा ॥ (१०।२)

अत्राद्याहो निवत्स्यामः क्षपां भरतसत्तम । (११।१)

द्वारम् एतद्धि कौन्तेय कुरुक्षेत्रस्य भारत ॥ (११।२)

अत्रैव नाहुषो राजा राजन् क्रतुभिर् इष्टवान् । (१२।१)

ययातिर् बहुरत्नाढ्यैर् यत्रेन्द्रो मुदम् अभ्यगात् ॥ (१२।२)

एतत् प्लक्षावतरणं यमुनातीर्थम् उच्यते । (१३।१)

एतद् वै नाकपृष्ठस्य द्वारम् आहुर् मनीषिणः ॥ (१३।२)

अत्र सारस्वतैर् यज्ञैर् ईजानाः परमर्षयः । (१४।१)

यूपोलूखलिनस् तात गच्छन्त्यवभृथाप्लवम् ॥ (१४।२)

अत्रैव भरतो राजा मेध्यम् अश्वम् अवासृजत् । (१५।१)

असकृत् कृष्णसारङ्गं धर्मेणावाप्य मेदिनीम् ॥ (१५।२)

अत्रैव पुरुषव्याघ्र मरुत्तः सत्त्रम् उत्तमम् । (१६।१)

आस्ते देवर्षिमुख्येन संवर्तेनाभिपालितः ॥ (१६।२)

अत्रोपस्पृश्य राजेन्द्र सर्वांल्लोकान् प्रपश्यति । (१७।१)

पूयते दुष्कृताच्चैव समुपस्पृश्य भारत ॥ (१७।२)

वैशम्पायन उवाच । (१८।१)

तत्र सभ्रातृकः स्नात्वा स्तूयमानो महर्षिभिः । (१८।२)

लोमशं पाण्डवश्रेष्ठ इदं वचनम् अब्रवीत् ॥ (१८।३)

सर्वांल्लोकान् प्रपश्यामि तपसा सत्यविक्रम । (१९।१)

इहस्थः पाण्डवश्रेष्ठं पश्यामि श्वेतवाहनम् ॥ (१९।२)

लोमश उवाच । (२०।१)

एवम् एतन् महाबाहो पश्यन्ति परमर्षयः । (२०।२)

सरस्वतीम् इमां पुण्यां पश्यैकशरणावृताम् ॥ (२०।३)

यत्र स्नात्वा नरश्रेष्ठ धूतपाप्मा भविष्यति । (२१।१)

इह सारस्वतैर् यज्ञैर् इष्टवन्तः सुरर्षयः । (२१।२)

ऋषयश् चैव कौन्तेय तथा राजर्षयो ऽपि च ॥ (२१।३)

वेदी प्रजापतेर् एषा समन्तात् पञ्चयोजना । (२२।१)

कुरोर् वै यज्ञशीलस्य क्षेत्रम् एतन् महात्मनः ॥ (२२।२)