मार्कण्डेय उवाच । (१।१)

ब्रह्मणो यस्तृतीयस् तु पुत्रः कुरुकुलोद्वह । (१।२)

तस्यापवसुता भार्या प्रजास् तस्यापि मे शृणु ॥ (१।३)

बृहज्ज्योतिर् बृहत्कीर्तिर् बृहद्ब्रह्मा बृहन्मनाः । (२।१)

बृहन्मन्त्रो बृहद्भासस् तथा राजन् बृहस्पतिः ॥ (२।२)

प्रजासु तासु सर्वासु रूपेणाप्रतिमाभवत् । (३।१)

देवी भानुमती नाम प्रथमाङ्गिरसः सुता ॥ (३।२)

भूतानाम् एव सर्वेषां यस्यां रागस् तदाभवत् । (४।१)

रागाद् रागेति याम् आहुर् द्वितीयाङ्गिरसः सुता ॥ (४।२)

यां कपर्दिसुताम् आहुर् दृश्यादृश्येति देहिनः । (५।१)

तनुत्वात् सा सिनीवाली तृतीयाङ्गिरसः सुता ॥ (५।२)

पश्यत्यर्चिष्मती भाभिर् हविर्भिश्च हविष्मती । (६।१)

षष्ठीम् अङ्गिरसः कन्यां पुण्याम् आहुर् हविष्मतीम् ॥ (६।२)

महामखेष्वाङ्गिरसी दीप्तिमत्सु महामती । (७।१)

महामतीति विख्याता सप्तमी कथ्यते सुता ॥ (७।२)

यां तु दृष्ट्वा भगवतीं जनः कुहुकुहायते । (८।१)

एकानंशेति याम् आहुः कुहूम् अङ्गिरसः सुताम् ॥ (८।२)