कर्ण उवाच । (१।१)

सर्वान् आयुष्मतो भीतान् संत्रस्तान् इव लक्षये । (१।२)

अयुद्धमनसश्चैव सर्वांश्चैवानवस्थितान् ॥ (१।३)

यद्येष राजा मत्स्यानां यदि बीभत्सुर् आगतः । (२।१)

अहम् आवारयिष्यामि वेलेव मकरालयम् ॥ (२।२)

मम चापप्रमुक्तानां शराणां नतपर्वणाम् । (३।१)

नावृत्तिर् गच्छताम् अस्ति सर्पाणाम् इव सर्पताम् ॥ (३।२)

रुक्मपुङ्खाः सुतीक्ष्णाग्रा मुक्ता हस्तवता मया । (४।१)

छादयन्तु शराः पार्थं शलभा इव पादपम् ॥ (४।२)

शराणां पुङ्खसक्तानां मौर्व्याभिहतया दृढम् । (५।१)

श्रूयतां तलयोः शब्दो भेर्योर् आहतयोर् इव ॥ (५।२)

समाहितो हि बीभत्सुर् वर्षाण्यष्टौ च पञ्च च । (६।१)

जातस्नेहश्च युद्धस्य मयि सम्प्रहरिष्यति ॥ (६।२)

पात्रीभूतश्च कौन्तेयो ब्राह्मणो गुणवान् इव । (७।१)

शरौघान् प्रतिगृह्णातु मया मुक्तान् सहस्रशः ॥ (७।२)

एष चैव महेष्वासस्त्रिषु लोकेषु विश्रुतः । (८।१)

अहं चापि कुरुश्रेष्ठा अर्जुनान्नावरः क्वचित् ॥ (८।२)

इतश्चेतश्च निर्मुक्तैः काञ्चनैर् गार्ध्रवाजितैः । (९।१)

दृश्यताम् अद्य वै व्योम खद्योतैर् इव संवृतम् ॥ (९।२)

अद्याहम् ऋणम् अक्षय्यं पुरा वाचा प्रतिश्रुतम् । (१०।१)

धार्तराष्ट्रस्य दास्यामि निहत्य समरे ऽर्जुनम् ॥ (१०।२)

अन्तरा छिद्यमानानां पुङ्खानां व्यतिशीर्यताम् । (११।१)

शलभानाम् इवाकाशे प्रचारः सम्प्रदृश्यताम् ॥ (११।२)

इन्द्राशनिसमस्पर्शं महेन्द्रसमतेजसम् । (१२।१)

अर्दयिष्याम्यहं पार्थम् उल्काभिर् इव कुञ्जरम् ॥ (१२।२)

तम् अग्निम् इव दुर्धर्षम् असिशक्तिशरेन्धनम् । (१३।१)

पाण्डवाग्निम् अहं दीप्तं प्रदहन्तम् इवाहितान् ॥ (१३।२)

अश्ववेगपुरोवातो रथौघस्तनयित्नुमान् । (१४।१)

शरधारो महामेघः शमयिष्यामि पाण्डवम् ॥ (१४।२)

मत्कार्मुकविनिर्मुक्ताः पार्थम् आशीविषोपमाः । (१५।१)

शराः समभिसर्पन्तु वल्मीकम् इव पन्नगाः ॥ (१५।२)

जामदग्न्यान्मया ह्यस्त्रं यत् प्राप्तम् ऋषिसत्तमात् । (१६।१)

तद् उपाश्रित्य वीर्यं च युध्येयम् अपि वासवम् ॥ (१६।२)

ध्वजाग्रे वानरस्तिष्ठन् भल्लेन निहतो मया । (१७।१)

अद्यैव पततां भूमौ विनदन् भैरवान् रवान् ॥ (१७।२)

शत्रोर् मयाभिपन्नानां भूतानां ध्वजवासिनाम् । (१८।१)

दिशः प्रतिष्ठमानानाम् अस्तु शब्दो दिवं गतः ॥ (१८।२)

अद्य दुर्योधनस्याहं शल्यं हृदि चिरस्थितम् । (१९।१)

समूलम् उद्धरिष्यामि बीभत्सुं पातयन् रथात् ॥ (१९।२)

हताश्वं विरथं पार्थं पौरुषे पर्यवस्थितम् । (२०।१)

निःश्वसन्तं यथा नागम् अद्य पश्यन्तु कौरवाः ॥ (२०।२)

कामं गच्छन्तु कुरवो धनम् आदाय केवलम् । (२१।१)

रथेषु वापि तिष्ठन्तो युद्धं पश्यन्तु मामकम् ॥ (२१।२)