वैशंपायन उवाच । (१।१)

इन्द्रतीर्थं ततो गत्वा यदूनां प्रवरो बली । (१।२)

विप्रेभ्यो धनरत्नानि ददौ स्नात्वा यथाविधि ॥ (१।३)

तत्र ह्यमरराजो ऽसावीजे क्रतुशतेन ह । (२।१)

बृहस्पतेश्च देवेशः प्रददौ विपुलं धनम् ॥ (२।२)

निरर्गलान् सजारूथ्यान् सर्वान् विविधदक्षिणान् । (३।१)

आजहार क्रतूंस्तत्र यथोक्तान् वेदपारगैः ॥ (३।२)

तान् क्रतून् भरतश्रेष्ठ शतकृत्वो महाद्युतिः । (४।१)

पूरयामास विधिवत् ततः ख्यातः शतक्रतुः ॥ (४।२)

तस्य नाम्ना च तत् तीर्थं शिवं पुण्यं सनातनम् । (५।१)

इन्द्रतीर्थम् इति ख्यातं सर्वपापप्रमोचनम् ॥ (५।२)

उपस्पृश्य च तत्रापि विधिवन्मुसलायुधः । (६।१)

ब्राह्मणान् पूजयित्वा च पानाच्छादनभोजनैः । (६।२)

शुभं तीर्थवरं तस्माद् रामतीर्थं जगाम ह ॥ (६।३)

यत्र रामो महाभागो भार्गवः सुमहातपाः । (७।१)

असकृत् पृथिवीं सर्वां हतक्षत्रियपुंगवाम् ॥ (७।२)

उपाध्यायं पुरस्कृत्य कश्यपं मुनिसत्तमम् । (८।१)

अयजद् वाजपेयेन सो ऽश्वमेधशतेन च । (८।२)

प्रददौ दक्षिणार्थं च पृथिवीं वै ससागराम् ॥ (८।३)

रामो दत्त्वा धनं तत्र द्विजेभ्यो जनमेजय । (९।१)

उपस्पृश्य यथान्यायं पूजयित्वा तथा द्विजान् ॥ (९।२)

पुण्ये तीर्थे शुभे देशे वसु दत्त्वा शुभाननः । (१०।१)

मुनींश्चैवाभिवाद्याथ यमुनातीर्थम् आगमत् ॥ (१०।२)

यत्रानयामास तदा राजसूयं महीपते । (११।१)

पुत्रो ऽदितेर् महाभागो वरुणो वै सितप्रभः ॥ (११।२)

तत्र निर्जित्य संग्रामे मानुषान् दैवतांस्तथा । (१२।१)

वरं क्रतुं समाजह्रे वरुणः परवीरहा ॥ (१२।२)

तस्मिन् क्रतुवरे वृत्ते संग्रामः समजायत । (१३।१)

देवानां दानवानां च त्रैलोक्यस्य क्षयावहः ॥ (१३।२)

राजसूये क्रतुश्रेष्ठे निवृत्ते जनमेजय । (१४।१)

जायते सुमहाघोरः संग्रामः क्षत्रियान् प्रति ॥ (१४।२)

सीरायुधस्तदा रामस्तस्मिंस्तीर्थवरे तदा । (१५।१)

तत्र स्नात्वा च दत्त्वा च द्विजेभ्यो वसु माधवः ॥ (१५।२)

वनमाली ततो हृष्टः स्तूयमानो द्विजातिभिः । (१६।१)

तस्माद् आदित्यतीर्थं च जगाम कमलेक्षणः ॥ (१६।२)

यत्रेष्ट्वा भगवाञ् ज्योतिर् भास्करो राजसत्तम । (१७।१)

ज्योतिषाम् आधिपत्यं च प्रभावं चाभ्यपद्यत ॥ (१७।२)

तस्या नद्यास्तु तीरे वै सर्वे देवाः सवासवाः । (१८।१)

विश्वेदेवाः समरुतो गन्धर्वाप्सरसश्च ह ॥ (१८।२)

द्वैपायनः शुकश्चैव कृष्णश्च मधुसूदनः । (१९।१)

यक्षाश्च राक्षसाश्चैव पिशाचाश्च विशां पते ॥ (१९।२)

एते चान्ये च बहवो योगसिद्धाः सहस्रशः । (२०।१)

तस्मिंस्तीर्थे सरस्वत्याः शिवे पुण्ये परंतप ॥ (२०।२)

तत्र हत्वा पुरा विष्णुर् असुरौ मधुकैटभौ । (२१।१)

आप्लुतो भरतश्रेष्ठ तीर्थप्रवर उत्तमे ॥ (२१।२)

द्वैपायनश्च धर्मात्मा तत्रैवाप्लुत्य भारत । (२२।१)

सम्प्राप्तः परमं योगं सिद्धिं च परमां गतः ॥ (२२।२)

असितो देवलश्चैव तस्मिन्न् एव महातपाः । (२३।१)

परमं योगम् आस्थाय ऋषिर् योगम् अवाप्तवान् ॥ (२३।२)