सहदेव उवाच । (१।१)

यद् एतत् कथितं राज्ञा धर्म एष सनातनः । (१।२)

यथा तु युद्धम् एव स्यात् तथा कार्यम् अरिंदम ॥ (१।३)

यदि प्रशमम् इच्छेयुः कुरवः पाण्डवैः सह । (२।१)

तथापि युद्धं दाशार्ह योजयेथाः सहैव तैः ॥ (२।२)

कथं नु दृष्ट्वा पाञ्चालीं तथा क्लिष्टां सभागताम् । (३।१)

अवधेन प्रशाम्येत मम मन्युः सुयोधने ॥ (३।२)

यदि भीमार्जुनौ कृष्ण धर्मराजश्च धार्मिकः । (४।१)

धर्मम् उत्सृज्य तेनाहं योद्धुम् इच्छामि संयुगे ॥ (४।२)

सात्यकिर् उवाच । (५।१)

सत्यम् आह महाबाहो सहदेवो महामतिः । (५।२)

दुर्योधनवधे शान्तिस्तस्य कोपस्य मे भवेत् ॥ (५।३)

जानासि हि यथा दृष्ट्वा चीराजिनधरान् वने । (६।१)

तवापि मन्युर् उद्भूतो दुःखितान् प्रेक्ष्य पाण्डवान् ॥ (६।२)

तस्मान्माद्रीसुतः शूरो यद् आह पुरुषर्षभः । (७।१)

वचनं सर्वयोधानां तन्मतं पुरुषोत्तम ॥ (७।२)

वैशंपायन उवाच । (८।१)

एवं वदति वाक्यं तु युयुधाने महामतौ । (८।२)

सुभीमः सिंहनादो ऽभूद् योधानां तत्र सर्वशः ॥ (८।३)

सर्वे हि सर्वतो वीरास्तद् वचः प्रत्यपूजयन् । (९।१)

साधु साध्विति शैनेयं हर्षयन्तो युयुत्सवः ॥ (९।२)