वैशंपायन उवाच । (१।१)

ततो निशायां प्राप्तायां कृतसायाह्निकक्रियाः । (१।२)

व्यासम् अभ्यगमन् सर्वे ये तत्रासन् समागताः ॥ (१।३)

धृतराष्ट्रस्तु धर्मात्मा पाण्डवैः सहितस्तदा । (२।१)

शुचिर् एकमनाः सार्धम् ऋषिभिस्तैर् उपाविशत् ॥ (२।२)

गान्धार्या सह नार्यस्तु सहिताः समुपाविशन् । (३।१)

पौरजानपदश्चापि जनः सर्वो यथावयः ॥ (३।२)

ततो व्यासो महातेजाः पुण्यं भागीरथीजलम् । (४।१)

अवगाह्याजुहावाथ सर्वांल्लोकान्महामुनिः ॥ (४।२)

पाण्डवानां च ये योधाः कौरवाणां च सर्वशः । (५।१)

राजानश्च महाभागा नानादेशनिवासिनः ॥ (५।२)

ततः सुतुमुलः शब्दो जलान्तर् जनमेजय । (६।१)

प्रादुरासीद् यथा पूर्वं कुरुपाण्डवसेनयोः ॥ (६।२)

ततस्ते पार्थिवाः सर्वे भीष्मद्रोणपुरोगमाः । (७।१)

ससैन्याः सलिलात् तस्मात् समुत्तस्थुः सहस्रशः ॥ (७।२)

विराटद्रुपदौ चोभौ सपुत्रौ सहसैनिकौ । (८।१)

द्रौपदेयाश्च सौभद्रो राक्षसश्च घटोत्कचः ॥ (८।२)

कर्णदुर्योधनौ चोभौ शकुनिश्च महारथः । (९।१)

दुःशासनादयश्चैव धार्तराष्ट्रा महारथाः ॥ (९।२)

जारासंधिर् भगदत्तो जलसंधश्च पार्थिवः । (१०।१)

भूरिश्रवाः शलः शल्यो वृषसेनश्च सानुजः ॥ (१०।२)

लक्ष्मणो राजपुत्रश्च धृष्टद्युम्नस्य चात्मजाः । (११।१)

शिखण्डिपुत्राः सर्वे च धृष्टकेतुश्च सानुजः ॥ (११।२)

अचलो वृषकश्चैव राक्षसश्चाप्यलायुधः । (१२।१)

बाह्लीकः सोमदत्तश्च चेकितानश्च पार्थिवः ॥ (१२।२)

एते चान्ये च बहवो बहुत्वाद् ये न कीर्तिताः । (१३।१)

सर्वे भासुरदेहास्ते समुत्तस्थुर् जलात् ततः ॥ (१३।२)

यस्य वीरस्य यो वेषो यो ध्वजो यच्च वाहनम् । (१४।१)

तेन तेन व्यदृश्यन्त समुपेता नराधिपाः ॥ (१४।२)

दिव्याम्बरधराः सर्वे सर्वे भ्राजिष्णुकुण्डलाः । (१५।१)

निर्वैरा निरहंकारा विगतक्रोधमन्यवः ॥ (१५।२)

गन्धर्वैर् उपगीयन्तः स्तूयमानाश्च बन्दिभिः । (१६।१)

दिव्यमाल्याम्बरधरा वृताश्चाप्सरसां गणैः ॥ (१६।२)

धृतराष्ट्रस्य च तदा दिव्यं चक्षुर् नराधिप । (१७।१)

मुनिः सत्यवतीपुत्रः प्रीतः प्रादात् तपोबलात् ॥ (१७।२)

दिव्यज्ञानबलोपेता गान्धारी च यशस्विनी । (१८।१)

ददर्श पुत्रांस्तान् सर्वान् ये चान्ये ऽपि रणे हताः ॥ (१८।२)

तद् अद्भुतम् अचिन्त्यं च सुमहद् रोमहर्षणम् । (१९।१)

विस्मितः स जनः सर्वो ददर्शानिमिषेक्षणः ॥ (१९।२)

तद् उत्सवमदोदग्रं हृष्टनारीनराकुलम् । (२०।१)

ददृशे बलम् आयान्तं चित्रं पटगतं यथा ॥ (२०।२)

धृतराष्ट्रस्तु तान् सर्वान् पश्यन् दिव्येन चक्षुषा । (२१।१)

मुमुदे भरतश्रेष्ठ प्रसादात् तस्य वै मुनेः ॥ (२१।२)