गालव उवाच । (१।१)

महावीर्यो महीपालः काशीनाम् ईश्वरः प्रभुः । (१।२)

दिवोदास इति ख्यातो भैमसेनिर् नराधिपः ॥ (१।३)

तत्र गच्छावहे भद्रे शनैर् आगच्छ मा शुचः । (२।१)

धार्मिकः संयमे युक्तः सत्यश्चैव जनेश्वरः ॥ (२।२)

नारद उवाच । (३।१)

तम् उपागम्य स मुनिर् न्यायतस्तेन सत्कृतः । (३।२)

गालवः प्रसवस्यार्थे तं नृपं प्रत्यचोदयत् ॥ (३।३)

दिवोदास उवाच । (४।१)

श्रुतम् एतन्मया पूर्वं किम् उक्त्वा विस्तरं द्विज । (४।२)

काङ्क्षितो हि मयैषो ऽर्थः श्रुत्वैतद् द्विजसत्तम ॥ (४।३)

एतच्च मे बहुमतं यद् उत्सृज्य नराधिपान् । (५।१)

माम् एवम् उपयातो ऽसि भावि चैतद् असंशयम् ॥ (५।२)

स एव विभवो ऽस्माकम् अश्वानाम् अपि गालव । (६।१)

अहम् अप्येकम् एवास्यां जनयिष्यामि पार्थिवम् ॥ (६।२)

नारद उवाच । (७।१)

तथेत्युक्त्वा द्विजश्रेष्ठः प्रादात् कन्यां महीपतेः । (७।२)

विधिपूर्वं च तां राजा कन्यां प्रतिगृहीतवान् ॥ (७।३)

रेमे स तस्यां राजर्षिः प्रभावत्यां यथा रविः । (८।१)

स्वाहायां च यथा वह्निर् यथा शच्यां स वासवः ॥ (८।२)

यथा चन्द्रश्च रोहिण्यां यथा धूमोर्णया यमः । (९।१)

वरुणश्च यथा गौर्यां यथा चर्द्ध्यां धनेश्वरः ॥ (९।२)

यथा नारायणो लक्ष्म्यां जाह्नव्यां च यथोदधिः । (१०।१)

यथा रुद्रश्च रुद्राण्यां यथा वेद्यां पितामहः ॥ (१०।२)

अदृश्यन्त्यां च वासिष्ठो वसिष्ठश्चाक्षमालया । (११।१)

च्यवनश्च सुकन्यायां पुलस्त्यः संध्यया यथा ॥ (११।२)

अगस्त्यश्चापि वैदर्भ्यां सावित्र्यां सत्यवान् यथा । (१२।१)

यथा भृगुः पुलोमायाम् अदित्यां कश्यपो यथा ॥ (१२।२)

रेणुकायां यथार्चीको हैमवत्यां च कौशिकः । (१३।१)

बृहस्पतिश्च तारायां शुक्रश्च शतपर्वया ॥ (१३।२)

यथा भूम्यां भूमिपतिर् उर्वश्यां च पुरूरवाः । (१४।१)

ऋचीकः सत्यवत्यां च सरस्वत्यां यथा मनुः ॥ (१४।२)

तथा तु रममाणस्य दिवोदासस्य भूपतेः । (१५।१)

माधवी जनयामास पुत्रम् एकं प्रतर्दनम् ॥ (१५।२)

अथाजगाम भगवान् दिवोदासं स गालवः । (१६।१)

समये समनुप्राप्ते वचनं चेदम् अब्रवीत् ॥ (१६।२)

निर्यातयतु मे कन्यां भवांस्तिष्ठन्तु वाजिनः । (१७।१)

यावद् अन्यत्र गच्छामि शुल्कार्थं पृथिवीपते ॥ (१७।२)

दिवोदासो ऽथ धर्मात्मा समये गालवस्य ताम् । (१८।१)

कन्यां निर्यातयामास स्थितः सत्ये महीपतिः ॥ (१८।२)