वैशंपायन उवाच । (१।१)

अथ संगम्य सर्वे तु कौरवाणां महारथाः । (१।२)

अर्जुनं सहिता यत्ताः प्रत्ययुध्यन्त भारत ॥ (१।३)

स सायकमयैर् जालैः सर्वतस्तान्महारथान् । (२।१)

प्राच्छादयद् अमेयात्मा नीहार इव पर्वतान् ॥ (२।२)

नदद्भिश्च महानागैर् हेषमाणैश्च वाजिभिः । (३।१)

भेरीशङ्खनिनादैश्च स शब्दस्तुमुलो ऽभवत् ॥ (३।२)

नराश्वकायान्निर्भिद्य लोहानि कवचानि च । (४।१)

पार्थस्य शरजालानि विनिष्पेतुः सहस्रशः ॥ (४।२)

त्वरमाणः शरान् अस्यन् पाण्डवः स बभौ रणे । (५।१)

मध्यंदिनगतो ऽर्चिष्माञ्शरदीव दिवाकरः ॥ (५।२)

उपप्लवन्त वित्रस्ता रथेभ्यो रथिनस्तदा । (६।१)

सादिनश्चाश्वपृष्ठेभ्यो भूमौ चापि पदातयः ॥ (६।२)

शरैः संताड्यमानानां कवचानां महात्मनाम् । (७।१)

ताम्रराजतलोहानां प्रादुरासीन्महास्वनः ॥ (७।२)

छन्नम् आयोधनं सर्वं शरीरैर् गतचेतसाम् । (८।१)

गजाश्वसादिभिस्तत्र शितबाणात्तजीवितैः ॥ (८।२)

रथोपस्थाभिपतितैर् आस्तृता मानवैर् मही । (९।१)

प्रनृत्यद् इव संग्रामे चापहस्तो धनंजयः ॥ (९।२)

श्रुत्वा गाण्डीवनिर्घोषं विस्फूर्जितम् इवाशनेः । (१०।१)

त्रस्तानि सर्वभूतानि व्यगच्छन्त महाहवात् ॥ (१०।२)

कुण्डलोष्णीषधारीणि जातरूपस्रजानि च । (११।१)

पतितानि स्म दृश्यन्ते शिरांसि रणमूर्धनि ॥ (११।२)

विशिखोन्मथितैर् गात्रैर् बाहुभिश्च सकार्मुकैः । (१२।१)

सहस्ताभरणैश्चान्यैः प्रच्छन्ना भाति मेदिनी ॥ (१२।२)

शिरसां पात्यमानानाम् अन्तरा निशितैः शरैः । (१३।१)

अश्मवृष्टिर् इवाकाशाद् अभवद् भरतर्षभ ॥ (१३।२)

दर्शयित्वा तथात्मानं रौद्रं रुद्रपराक्रमः । (१४।१)

अवरुद्धश्चरन् पार्थो दशवर्षाणि त्रीणि च । (१४।२)

क्रोधाग्निम् उत्सृजद् घोरं धार्तराष्ट्रेषु पाण्डवः ॥ (१४।३)

तस्य तद् दहतः सैन्यं दृष्ट्वा चैव पराक्रमम् । (१५।१)

सर्वे शान्तिपरा योधा धार्तराष्ट्रस्य पश्यतः ॥ (१५।२)

वित्रासयित्वा तत् सैन्यं द्रावयित्वा महारथान् । (१६।१)

अर्जुनो जयतां श्रेष्ठः पर्यवर्तत भारत ॥ (१६।२)

प्रावर्तयन्नदीं घोरां शोणितौघतरङ्गिणीम् । (१७।१)

अस्थिशैवलसंबाधां युगान्ते कालनिर्मिताम् ॥ (१७।२)

शरचापप्लवां घोरां मांसशोणितकर्दमाम् । (१८।१)

महारथमहाद्वीपां शङ्खदुन्दुभिनिस्वनाम् । (१८।२)

चकार महतीं पार्थो नदीम् उत्तरशोणिताम् ॥ (१८।३)

आददानस्य हि शरान् संधाय च विमुञ्चतः । (१९।१)

विकर्षतश्च गाण्डीवं न किंचिद् दृश्यते ऽन्तरम् ॥ (१९।२)