ब्रह्मोवाच । (१।१)

अव्यक्तात् पूर्वम् उत्पन्नो महान् आत्मा महामतिः । (१।२)

आदिर् गुणानां सर्वेषां प्रथमः सर्ग उच्यते ॥ (१।३)

महान् आत्मा मतिर् विष्णुर् विश्वः शंभुश्च वीर्यवान् । (२।१)

बुद्धिः प्रज्ञोपलब्धिश्च तथा ख्यातिर् धृतिः स्मृतिः ॥ (२।२)

पर्यायवाचकैः शब्दैर् महान् आत्मा विभाव्यते । (३।१)

तं जानन् ब्राह्मणो विद्वान्न प्रमोहं निगच्छति ॥ (३।२)

सर्वतःपाणिपादश्च सर्वतोऽक्षिशिरोमुखः । (४।१)

सर्वतःश्रुतिमांल् लोके सर्वं व्याप्य स तिष्ठति ॥ (४।२)

महाप्रभार्चिः पुरुषः सर्वस्य हृदि निश्रितः । (५।१)

अणिमा लघिमा प्राप्तिर् ईशानो ज्योतिर् अव्ययः ॥ (५।२)

तत्र बुद्धिमतां लोकाः संन्यासनिरताश्च ये । (६।१)

ध्यानिनो नित्ययोगाश्च सत्यसंधा जितेन्द्रियाः ॥ (६।२)

ज्ञानवन्तश्च ये केचिद् अलुब्धा जितमन्यवः । (७।१)

प्रसन्नमनसो धीरा निर्ममा निरहंकृताः । (७।२)

विमुक्ताः सर्व एवैते महत्त्वम् उपयान्ति वै ॥ (७।३)

आत्मनो महतो वेद यः पुण्यां गतिम् उत्तमाम् । (८।१)

स धीरः सर्वलोकेषु न मोहम् अधिगच्छति । (८।२)

विष्णुर् एवादिसर्गेषु स्वयंभूर् भवति प्रभुः ॥ (८।३)

एवं हि यो वेद गुहाशयं प्रभुं नरः पुराणं पुरुषं विश्वरूपम् । (९।१)

हिरण्मयं बुद्धिमतां परां गतिं स बुद्धिमान् बुद्धिम् अतीत्य तिष्ठति ॥ (९।२)