युधिष्ठिर उवाच । (१।१)

के पूज्याः के नमस्कार्याः कथं वर्तेत केषु च । (१।२)

किमाचारः कीदृशेषु पितामह न रिष्यते ॥ (१।३)

भीष्म उवाच । (२।१)

ब्राह्मणानां परिभवः सादयेद् अपि देवताः । (२।२)

ब्राह्मणानां नमस्कर्ता युधिष्ठिर न रिष्यते ॥ (२।३)

ते पूज्यास् ते नमस्कार्या वर्तेथास्तेषु पुत्रवत् । (३।१)

ते हि लोकान् इमान् सर्वान् धारयन्ति मनीषिणः ॥ (३।२)

ब्राह्मणाः सर्वलोकानां महान्तो धर्मसेतवः । (४।१)

धनत्यागाभिरामाश्च वाक्संयमरताश्च ये ॥ (४।२)

रमणीयाश्च भूतानां निधानं च धृतव्रताः । (५।१)

प्रणेतारश्च लोकानां शास्त्राणां च यशस्विनः ॥ (५।२)

तपो येषां धनं नित्यं वाक् चैव विपुलं बलम् । (६।१)

प्रभवश्चापि धर्माणां धर्मज्ञाः सूक्ष्मदर्शिनः ॥ (६।२)

धर्मकामाः स्थिता धर्मे सुकृतैर् धर्मसेतवः । (७।१)

यान् उपाश्रित्य जीवन्ति प्रजाः सर्वाश्चतुर्विधाः ॥ (७।२)

पन्थानः सर्वनेतारो यज्ञवाहाः सनातनाः । (८।१)

पितृपैतामहीं गुर्वीम् उद्वहन्ति धुरं सदा ॥ (८।२)

धुरि ये नावसीदन्ति विषमे सद्गवा इव । (९।१)

पितृदेवातिथिमुखा हव्यकव्याग्रभोजिनः ॥ (९।२)

भोजनाद् एव ये लोकांस्त्रायन्ते महतो भयात् । (१०।१)

दीपाः सर्वस्य लोकस्य चक्षुश्चक्षुष्मताम् अपि ॥ (१०।२)

सर्वशिल्पादिनिधयो निपुणाः सूक्ष्मदर्शिनः । (११।१)

गतिज्ञाः सर्वभूतानाम् अध्यात्मगतिचिन्तकाः ॥ (११।२)

आदिमध्यावसानानां ज्ञातारश्छिन्नसंशयाः । (१२।१)

परावरविशेषज्ञा गन्तारः परमां गतिम् ॥ (१२।२)

विमुक्ता धुतपाप्मानो निर्द्वंद्वा निष्परिग्रहाः । (१३।१)

मानार्हा मानिता नित्यं ज्ञानविद्भिर् महात्मभिः ॥ (१३।२)

चन्दने मलपङ्के च भोजने ऽभोजने समाः । (१४।१)

समं येषां दुकूलं च शाणक्षौमाजिनानि च ॥ (१४।२)

तिष्ठेयुर् अप्यभुञ्जाना बहूनि दिवसान्यपि । (१५।१)

शोषयेयुश्च गात्राणि स्वाध्यायैः संयतेन्द्रियाः ॥ (१५।२)

अदैवं दैवतं कुर्युर् दैवतं चाप्यदैवतम् । (१६।१)

लोकान् अन्यान् सृजेयुश्च लोकपालांश्च कोपिताः ॥ (१६।२)

अपेयः सागरो येषाम् अभिशापान्महात्मनाम् । (१७।१)

येषां कोपाग्निर् अद्यापि दण्डके नोपशाम्यति ॥ (१७।२)

देवानाम् अपि ये देवाः कारणं कारणस्य च । (१८।१)

प्रमाणस्य प्रमाणं च कस्तान् अभिभवेद् बुधः ॥ (१८।२)

येषां वृद्धश्च बालश्च सर्वः संमानम् अर्हति । (१९।१)

तपोविद्याविशेषात् तु मानयन्ति परस्परम् ॥ (१९।२)

अविद्वान् ब्राह्मणो देवः पात्रं वै पावनं महत् । (२०।१)

विद्वान् भूयस्तरो देवः पूर्णसागरसंनिभः ॥ (२०।२)

अविद्वांश्चैव विद्वांश्च ब्राह्मणो दैवतं महत् । (२१।१)

प्रणीतश्चाप्रणीतश्च यथाग्निर् दैवतं महत् ॥ (२१।२)

श्मशाने ह्यपि तेजस्वी पावको नैव दुष्यति । (२२।१)

हविर् यज्ञेषु च वहन् भूय एवाभिशोभते ॥ (२२।२)

एवं यद्यप्यनिष्टेषु वर्तते सर्वकर्मसु । (२३।१)

सर्वथा ब्राह्मणो मान्यो दैवतं विद्धि तत् परम् ॥ (२३।२)