युधिष्ठिर उवाच । (१।१)

चातुर्वर्ण्यस्य धर्मात्मन् धर्मः प्रोक्तस्त्वयानघ । (१।२)

तथैव मे श्राद्धविधिं कृत्स्नं प्रब्रूहि पार्थिव ॥ (१।३)

वैशंपायन उवाच । (२।१)

युधिष्ठिरेणैवम् उक्तो भीष्मः शांतनवस्तदा । (२।२)

इमं श्राद्धविधिं कृत्स्नं प्रवक्तुम् उपचक्रमे ॥ (२।३)

भीष्म उवाच । (३।१)

शृणुष्वावहितो राजञ्श्राद्धकल्पम् इमं शुभम् । (३।२)

धन्यं यशस्यं पुत्रीयं पितृयज्ञं परंतप ॥ (३।३)

देवासुरमनुष्याणां गन्धर्वोरगरक्षसाम् । (४।१)

पिशाचकिंनराणां च पूज्या वै पितरः सदा ॥ (४।२)

पितॄन् पूज्यादितः पश्चाद् देवान् संतर्पयन्ति वै । (५।१)

तस्मात् सर्वप्रयत्नेन पुरुषः पूजयेत् सदा ॥ (५।२)

अन्वाहार्यं महाराज पितॄणां श्राद्धम् उच्यते । (६।१)

तच्चामिषेण विधिना विधिः प्रथमकल्पितः ॥ (६।२)

सर्वेष्वहःसु प्रीयन्ते कृतैः श्राद्धैः पितामहाः । (७।१)

प्रवक्ष्यामि तु ते सर्वांस्तिथ्यां तिथ्यां गुणागुणान् ॥ (७।२)

येष्वहःसु कृतैः श्राद्धैर् यत् फलं प्राप्यते ऽनघ । (८।१)

तत् सर्वं कीर्तयिष्यामि यथावत् तन्निबोध मे ॥ (८।२)

पितॄन् अर्च्य प्रतिपदि प्राप्नुयात् स्वगृहे स्त्रियः । (९।१)

अभिरूपप्रजायिन्यो दर्शनीया बहुप्रजाः ॥ (९।२)

स्त्रियो द्वितीयां जायन्ते तृतीयायां तु वन्दिनः । (१०।१)

चतुर्थ्यां क्षुद्रपशवो भवन्ति बहवो गृहे ॥ (१०।२)

पञ्चम्यां बहवः पुत्रा जायन्ते कुर्वतां नृप । (११।१)

कुर्वाणास्तु नराः षष्ठ्यां भवन्ति द्युतिभागिनः ॥ (११।२)

कृषिभागी भवेच्छ्राद्धं कुर्वाणः सप्तमीं नृप । (१२।१)

अष्टम्यां तु प्रकुर्वाणो वाणिज्ये लाभम् आप्नुयात् ॥ (१२।२)

नवम्यां कुर्वतः श्राद्धं भवत्येकशफं बहु । (१३।१)

विवर्धन्ते तु दशमीं गावः श्राद्धानि कुर्वतः ॥ (१३।२)

कुप्यभागी भवेन्मर्त्यः कुर्वन्न् एकादशीं नृप । (१४।१)

ब्रह्मवर्चस्विनः पुत्रा जायन्ते तस्य वेश्मनि ॥ (१४।२)

द्वादश्याम् ईहमानस्य नित्यम् एव प्रदृश्यते । (१५।१)

रजतं बहु चित्रं च सुवर्णं च मनोरमम् ॥ (१५।२)

ज्ञातीनां तु भवेच्छ्रेष्ठः कुर्वञ्श्राद्धं त्रयोदशीम् । (१६।१)

अवश्यं तु युवानो ऽस्य प्रमीयन्ते नरा गृहे ॥ (१६।२)

युद्धभागी भवेन्मर्त्यः श्राद्धं कुर्वंश्चतुर्दशीम् । (१७।१)

अमावास्यां तु निवपन् सर्वान् कामान् अवाप्नुयात् ॥ (१७।२)

कृष्णपक्षे दशम्यादौ वर्जयित्वा चतुर्दशीम् । (१८।१)

श्राद्धकर्मणि तिथ्यः स्युः प्रशस्ता न तथेतराः ॥ (१८।२)

यथा चैवापरः पक्षः पूर्वपक्षाद् विशिष्यते । (१९।१)

तथा श्राद्धस्य पूर्वाह्णाद् अपराह्णो विशिष्यते ॥ (१९।२)