1.2१.२स तु राजा पुनस्तस्याः कर्तुकामः स्वयंवरम् । (१।२)
sa tu rājā punastasyāḥ kartukāmaḥ svayaṃvaram |
1.3१.३उपगम्याश्रमपदं गङ्गायमुनसंगमे ॥ (१।३)
upagamyāśramapadaṃ gaṅgāyamunasaṃgame ||
2.1२.१गृहीतमाल्यदामां तां रथम् आरोप्य माधवीम् । (२।१)
gṛhītamālyadāmāṃ tāṃ ratham āropya mādhavīm |
2.2२.२पूरुर् यदुश्च भगिनीम् आश्रमे पर्यधावताम् ॥ (२।२)
pūrur yaduśca bhaginīm āśrame paryadhāvatām ||
3.1३.१नागयक्षमनुष्याणां पतत्रिमृगपक्षिणाम् । (३।१)
nāgayakṣamanuṣyāṇāṃ patatrimṛgapakṣiṇām |
3.2३.२शैलद्रुमवनौकानाम् आसीत् तत्र समागमः ॥ (३।२)
śailadrumavanaukānām āsīt tatra samāgamaḥ ||
4.1४.१नानापुरुषदेशानाम् ईश्वरैश्च समाकुलम् । (४।१)
nānāpuruṣadeśānām īśvaraiśca samākulam |
4.2४.२ऋषिभिर् ब्रह्मकल्पैश्च समन्ताद् आवृतं वनम् ॥ (४।२)
ṛṣibhir brahmakalpaiśca samantād āvṛtaṃ vanam ||
5.1५.१निर्दिश्यमानेषु तु सा वरेषु वरवर्णिनी । (५।१)
nirdiśyamāneṣu tu sā vareṣu varavarṇinī |
5.2५.२वरान् उत्क्रम्य सर्वांस्तान् वनं वृतवती वरम् ॥ (५।२)
varān utkramya sarvāṃstān vanaṃ vṛtavatī varam ||
6.1६.१अवतीर्य रथात् कन्या नमस्कृत्वा च बन्धुषु । (६।१)
avatīrya rathāt kanyā namaskṛtvā ca bandhuṣu |
6.2६.२उपगम्य वनं पुण्यं तपस्तेपे ययातिजा ॥ (६।२)
upagamya vanaṃ puṇyaṃ tapastepe yayātijā ||
7.1७.१उपवासैश्च विविधैर् दीक्षाभिर् नियमैस्तथा । (७।१)
upavāsaiśca vividhair dīkṣābhir niyamaistathā |
7.2७.२आत्मनो लघुतां कृत्वा बभूव मृगचारिणी ॥ (७।२)
ātmano laghutāṃ kṛtvā babhūva mṛgacāriṇī ||
8.1८.१वैडूर्याङ्कुरकल्पानि मृदूनि हरितानि च । (८।१)
vaiḍūryāṅkurakalpāni mṛdūni haritāni ca |
8.2८.२चरन्ती शष्पमुख्यानि तिक्तानि मधुराणि च ॥ (८।२)
carantī śaṣpamukhyāni tiktāni madhurāṇi ca ||
9.1९.१स्रवन्तीनां च पुण्यानां सुरसानि शुचीनि च । (९।१)
sravantīnāṃ ca puṇyānāṃ surasāni śucīni ca |
9.2९.२पिबन्ती वारिमुख्यानि शीतानि विमलानि च ॥ (९।२)
pibantī vārimukhyāni śītāni vimalāni ca ||
10.1१०.१वनेषु मृगराजेषु सिंहविप्रोषितेषु च । (१०।१)
vaneṣu mṛgarājeṣu siṃhaviproṣiteṣu ca |
10.2१०.२दावाग्निविप्रमुक्तेषु शून्येषु गहनेषु च ॥ (१०।२)
dāvāgnivipramukteṣu śūnyeṣu gahaneṣu ca ||
11.1११.१चरन्ती हरिणैः सार्धं मृगीव वनचारिणी । (११।१)
carantī hariṇaiḥ sārdhaṃ mṛgīva vanacāriṇī |
11.2११.२चचार विपुलं धर्मं ब्रह्मचर्येण संवृता ॥ (११।२)
cacāra vipulaṃ dharmaṃ brahmacaryeṇa saṃvṛtā ||
12.1१२.१ययातिर् अपि पूर्वेषां राज्ञां वृत्तम् अनुष्ठितः । (१२।१)
yayātir api pūrveṣāṃ rājñāṃ vṛttam anuṣṭhitaḥ |
12.2१२.२बहुवर्षसहस्रायुर् अयुजत् कालधर्मणा ॥ (१२।२)
bahuvarṣasahasrāyur ayujat kāladharmaṇā ||
13.1१३.१पूरुर् यदुश्च द्वौ वंशौ वर्धमानौ नरोत्तमौ । (१३।१)
pūrur yaduśca dvau vaṃśau vardhamānau narottamau |
13.2१३.२ताभ्यां प्रतिष्ठितो लोके परलोके च नाहुषः ॥ (१३।२)
tābhyāṃ pratiṣṭhito loke paraloke ca nāhuṣaḥ ||
14.1१४.१महीयते नरपतिर् ययातिः स्वर्गम् आस्थितः । (१४।१)
mahīyate narapatir yayātiḥ svargam āsthitaḥ |
14.2१४.२महर्षिकल्पो नृपतिः स्वर्गाग्र्यफलभुग् विभुः ॥ (१४।२)
maharṣikalpo nṛpatiḥ svargāgryaphalabhug vibhuḥ ||
15.1१५.१बहुवर्षसहस्राख्ये काले बहुगुणे गते । (१५।१)
bahuvarṣasahasrākhye kāle bahuguṇe gate |
15.2१५.२राजर्षिषु निषण्णेषु महीयःसु महर्षिषु ॥ (१५।२)
rājarṣiṣu niṣaṇṇeṣu mahīyaḥsu maharṣiṣu ||
16.1१६.१अवमेने नरान् सर्वान् देवान् ऋषिगणांस्तथा । (१६।१)
avamene narān sarvān devān ṛṣigaṇāṃstathā |
16.2१६.२ययातिर् मूढविज्ञानो विस्मयाविष्टचेतनः ॥ (१६।२)
yayātir mūḍhavijñāno vismayāviṣṭacetanaḥ ||
17.1१७.१ततस्तं बुबुधे देवः शक्रो बलनिषूदनः । (१७।१)
tatastaṃ bubudhe devaḥ śakro balaniṣūdanaḥ |
17.2१७.२ते च राजर्षयः सर्वे धिग् धिग् इत्येवम् अब्रुवन् ॥ (१७।२)
te ca rājarṣayaḥ sarve dhig dhig ityevam abruvan ||
18.1१८.१विचारश्च समुत्पन्नो निरीक्ष्य नहुषात्मजम् । (१८।१)
vicāraśca samutpanno nirīkṣya nahuṣātmajam |
18.2१८.२को न्वयं कस्य वा राज्ञः कथं वा स्वर्गम् आगतः ॥ (१८।२)
ko nvayaṃ kasya vā rājñaḥ kathaṃ vā svargam āgataḥ ||
19.1१९.१कर्मणा केन सिद्धो ऽयं क्व वानेन तपश्चितम् । (१९।१)
karmaṇā kena siddho 'yaṃ kva vānena tapaścitam |
19.2१९.२कथं वा ज्ञायते स्वर्गे केन वा ज्ञायते ऽप्युत ॥ (१९।२)
kathaṃ vā jñāyate svarge kena vā jñāyate 'pyuta ||
20.1२०.१एवं विचारयन्तस्ते राजानः स्वर्गवासिनः । (२०।१)
evaṃ vicārayantaste rājānaḥ svargavāsinaḥ |
20.2२०.२दृष्ट्वा पप्रच्छुर् अन्योन्यं ययातिं नृपतिं प्रति ॥ (२०।२)
dṛṣṭvā papracchur anyonyaṃ yayātiṃ nṛpatiṃ prati ||
21.1२१.१विमानपालाः शतशः स्वर्गद्वाराभिरक्षिणः । (२१।१)
vimānapālāḥ śataśaḥ svargadvārābhirakṣiṇaḥ |
21.2२१.२पृष्टा आसनपालाश्च न जानीमेत्यथाब्रुवन् ॥ (२१।२)
pṛṣṭā āsanapālāśca na jānīmetyathābruvan ||
22.1२२.१सर्वे ते ह्यावृतज्ञाना नाभ्यजानन्त तं नृपम् । (२२।१)
sarve te hyāvṛtajñānā nābhyajānanta taṃ nṛpam |
22.2२२.२स मुहूर्ताद् अथ नृपो हतौजा अभवत् तदा ॥ (२२।२)
sa muhūrtād atha nṛpo hataujā abhavat tadā ||
Data courtesy of The Digital Corpus of Sanskrit.
