धौम्य उवाच । (१।१)

उदीच्यां राजशार्दूल दिशि पुण्यानि यानि वै । (१।२)

तानि ते कीर्तयिष्यामि पुण्यान्यायतनानि च ॥ (१।३)

सरस्वती पुण्यवहा ह्रदिनी वनमालिनी । (२।१)

समुद्रगा महावेगा यमुना यत्र पाण्डव ॥ (२।२)

तत्र पुण्यतमं तीर्थं प्लक्षावतरणं शिवम् । (३।१)

यत्र सारस्वतैर् इष्ट्वा गच्छन्त्यवभृथं द्विजाः ॥ (३।२)

पुण्यं चाख्यायते दिव्यं शिवम् अग्निशिरो ऽनघ । (४।१)

सहदेवो ऽयजद् यत्र शम्याक्षेपेण भारत ॥ (४।२)

एतस्मिन्न् एव चार्थेयम् इन्द्रगीता युधिष्ठिर । (५।१)

गाथा चरति लोके ऽस्मिन् गीयमाना द्विजातिभिः ॥ (५।२)

अग्नयः सहदेवेन ये चिता यमुनाम् अनु । (६।१)

शतं शतसहस्राणि सहस्रशतदक्षिणाः ॥ (६।२)

तत्रैव भरतो राजा चक्रवर्ती महायशाः । (७।१)

विंशतिं सप्त चाष्टौ च हयमेधान् उपाहरत् ॥ (७।२)

कामकृद् यो द्विजातीनां श्रुतस् तात मया पुरा । (८।१)

अत्यन्तम् आश्रमः पुण्यः सरकस् तस्य विश्रुतः ॥ (८।२)

सरस्वती नदी सद्भिः सततं पार्थ पूजिता । (९।१)

वालखिल्यैर् महाराज यत्रेष्टम् ऋषिभिः पुरा ॥ (९।२)

दृषद्वती पुण्यतमा तत्र ख्याता युधिष्ठिर । (१०।१)

तत्र वैवर्ण्यवर्णौ च सुपुण्यौ मनुजाधिप ॥ (१०।२)

वेदज्ञौ वेदविदितौ विद्यावेदविदाव् उभौ । (११।१)

यजन्तौ क्रतुभिर् नित्यं पुण्यैर् भरतसत्तम ॥ (११।२)

समेत्य बहुशो देवाः सेन्द्राः सवरुणाः पुरा । (१२।१)

विशाखयूपे ऽतप्यन्त तस्मात् पुण्यतमः स वै ॥ (१२।२)

ऋषिर् महान् महाभागो जमदग्निर् महायशाः । (१३।१)

पलाशकेषु पुण्येषु रम्येष्व् अयजताभिभूः ॥ (१३।२)

यत्र सर्वाः सरिच्छ्रेष्ठाः साक्षात् तम् ऋषिसत्तमम् । (१४।१)

स्वं स्वं तोयम् उपादाय परिवार्योपतस्थिरे ॥ (१४।२)

अपि चात्र महाराज स्वयं विश्वावसुर् जगौ । (१५।१)

इमं श्लोकं तदा वीर प्रेक्ष्य वीर्यं महात्मनः ॥ (१५।२)

यजमानस्य वै देवाञ्जमदग्नेर् महात्मनः । (१६।१)

आगम्य सरितः सर्वा मधुना समतर्पयन् ॥ (१६।२)

गन्धर्वयक्षरक्षोभिर् अप्सरोभिश् च शोभितम् । (१७।१)

किरातकिंनरावासं शैलं शिखरिणां वरम् ॥ (१७।२)

बिभेद तरसा गङ्गा गङ्गाद्वारे युधिष्ठिर । (१८।१)

पुण्यं तत् ख्यायते राजन् ब्रह्मर्षिगणसेवितम् ॥ (१८।२)

सनत्कुमारः कौरव्य पुण्यं कनखलं तथा । (१९।१)

पर्वतश्च पुरुर् नाम यत्र जातः पुरूरवाः ॥ (१९।२)

भृगुर् यत्र तपस् तेपे महर्षिगणसेवितः । (२०।१)

स राजन्न् आश्रमः ख्यातो भृगुतुङ्गो महागिरिः ॥ (२०।२)

यच्च भूतं भविष्यच्च भवच्च पुरुषर्षभ । (२१।१)

नारायणः प्रभुर् विष्णुः शाश्वतः पुरुषोत्तमः ॥ (२१।२)

तस्यातियशसः पुण्यां विशालां बदरीम् अनु । (२२।१)

आश्रमः ख्यायते पुण्यस् त्रिषु लोकेषु विश्रुतः ॥ (२२।२)

उष्णतोयवहा गङ्गा शीततोयवहापरा । (२३।१)

सुवर्णसिकता राजन् विशालां बदरीम् अनु ॥ (२३।२)

ऋषयो यत्र देवाश् च महाभागा महौजसः । (२४।१)

प्राप्य नित्यं नमस्यन्ति देवं नारायणं विभुम् ॥ (२४।२)

यत्र नारायणो देवः परमात्मा सनातनः । (२५।१)

तत्र कृत्स्नं जगत् पार्थ तीर्थान्यायतनानि च ॥ (२५।२)

तत् पुण्यं तत् परं ब्रह्म तत् तीर्थं तत् तपोवनम् । (२६।१)

तत्र देवर्षयः सिद्धाः सर्वे चैव तपोधनाः ॥ (२६।२)

आदिदेवो महायोगी यत्रास्ते मधुसूदनः । (२७।१)

पुण्यानाम् अपि तत् पुण्यं तत्र ते संशयो ऽस्तु मा ॥ (२७।२)

एतानि राजन् पुण्यानि पृथिव्यां पृथिवीपते । (२८।१)

कीर्तितानि नरश्रेष्ठ तीर्थान्यायतनानि च ॥ (२८।२)

एतानि वसुभिः साध्यैर् आदित्यैर् मरुदश्विभिः । (२९।१)

ऋषिभिर् ब्रह्मकल्पैश् च सेवितानि महात्मभिः ॥ (२९।२)

चरन् एतानि कौन्तेय सहितो ब्राह्मणर्षभैः । (३०।१)

भ्रातृभिश् च महाभागैर् उत्कण्ठां विजहिष्यसि ॥ (३०।२)