वैशंपायन उवाच । (१।१)

एवम् उक्तस्तु कृष्णेन धर्मपुत्रो युधिष्ठिरः । (१।२)

व्यासम् आमन्त्र्य मेधावी ततो वचनम् अब्रवीत् ॥ (१।३)

यथा कालं भवान् वेत्ति हयमेधस्य तत्त्वतः । (२।१)

दीक्षयस्व तदा मा त्वं त्वय्यायत्तो हि मे क्रतुः ॥ (२।२)

व्यास उवाच । (३।१)

अहं पैलो ऽथ कौन्तेय याज्ञवल्क्यस्तथैव च । (३।२)

विधानं यद् यथाकालं तत् कर्तारो न संशयः ॥ (३।३)

चैत्र्यां हि पौर्णमास्यां च तव दीक्षा भविष्यति । (४।१)

संभाराः संभ्रियन्तां ते यज्ञार्थं पुरुषर्षभ ॥ (४।२)

अश्वविद्याविदश्चैव सूता विप्राश्च तद्विदः । (५।१)

मेध्यम् अश्वं परीक्षन्तां तव यज्ञार्थसिद्धये ॥ (५।२)

तम् उत्सृज्य यथाशास्त्रं पृथिवीं सागराम्बराम् । (६।१)

स पर्येतु यशो नाम्ना तव पार्थिव वर्धयन् ॥ (६।२)

वैशंपायन उवाच । (७।१)

इत्युक्तः स तथेत्युक्त्वा पाण्डवः पृथिवीपतिः । (७।२)

चकार सर्वं राजेन्द्र यथोक्तं ब्रह्मवादिना । (७।३)

संभाराश्चैव राजेन्द्र सर्वे संकल्पिताभवन् ॥ (७।४)

स संभारान् समाहृत्य नृपो धर्मात्मजस्तदा । (८।१)

न्यवेदयद् अमेयात्मा कृष्णद्वैपायनाय वै ॥ (८।२)

ततो ऽब्रवीन्महातेजा व्यासो धर्मात्मजं नृपम् । (९।१)

यथाकालं यथायोगं सज्जाः स्म तव दीक्षणे ॥ (९।२)

स्फ्यश्च कूर्चश्च सौवर्णो यच्चान्यद् अपि कौरव । (१०।१)

तत्र योग्यं भवेत् किंचित् तद् रौक्मं क्रियताम् इति ॥ (१०।२)

अश्वश्चोत्सृज्यताम् अद्य पृथ्व्याम् अथ यथाक्रमम् । (११।१)

सुगुप्तश्च चरत्वेष यथाशास्त्रं युधिष्ठिर ॥ (११।२)

युधिष्ठिर उवाच । (१२।१)

अयम् अश्वो मया ब्रह्मन्न् उत्सृष्टः पृथिवीम् इमाम् । (१२।२)

चरिष्यति यथाकामं तत्र वै संविधीयताम् ॥ (१२।३)

पृथिवीं पर्यटन्तं हि तुरगं कामचारिणम् । (१३।१)

कः पालयेद् इति मुने तद् भवान् वक्तुम् अर्हति ॥ (१३।२)

वैशंपायन उवाच । (१४।१)

इत्युक्तः स तु राजेन्द्र कृष्णद्वैपायनो ऽब्रवीत् । (१४।२)

भीमसेनाद् अवरजः श्रेष्ठः सर्वधनुष्मताम् ॥ (१४।३)

जिष्णुः सहिष्णुर् धृष्णुश्च स एनं पालयिष्यति । (१५।१)

शक्तः स हि महीं जेतुं निवातकवचान्तकः ॥ (१५।२)

तस्मिन् ह्यस्त्राणि दिव्यानि दिव्यं संहननं तथा । (१६।१)

दिव्यं धनुश्चेषुधी च स एनम् अनुयास्यति ॥ (१६।२)

स हि धर्मार्थकुशलः सर्वविद्याविशारदः । (१७।१)

यथाशास्त्रं नृपश्रेष्ठ चारयिष्यति ते हयम् ॥ (१७।२)

राजपुत्रो महाबाहुः श्यामो राजीवलोचनः । (१८।१)

अभिमन्योः पिता वीरः स एनम् अनुयास्यति ॥ (१८।२)

भीमसेनो ऽपि तेजस्वी कौन्तेयो ऽमितविक्रमः । (१९।१)

समर्थो रक्षितुं राष्ट्रं नकुलश्च विशां पते ॥ (१९।२)

सहदेवस्तु कौरव्य समाधास्यति बुद्धिमान् । (२०।१)

कुटुम्बतन्त्रं विधिवत् सर्वम् एव महायशाः ॥ (२०।२)

तत् तु सर्वं यथान्यायम् उक्तं कुरुकुलोद्वहः । (२१।१)

चकार फल्गुनं चापि संदिदेश हयं प्रति ॥ (२१।२)

युधिष्ठिर उवाच । (२२।१)

एह्यर्जुन त्वया वीर हयो ऽयं परिपाल्यताम् । (२२।२)

त्वम् अर्हो रक्षितुं ह्येनं नान्यः कश्चन मानवः ॥ (२२।३)

ये चापि त्वां महाबाहो प्रत्युदीयुर् नराधिपाः । (२३।१)

तैर् विग्रहो यथा न स्यात् तथा कार्यं त्वयानघ ॥ (२३।२)

आख्यातव्यश्च भवता यज्ञो ऽयं मम सर्वशः । (२४।१)

पार्थिवेभ्यो महाबाहो समये गम्यताम् इति ॥ (२४।२)

एवम् उक्त्वा स धर्मात्मा भ्रातरं सव्यसाचिनम् । (२५।१)

भीमं च नकुलं चैव पुरगुप्तौ समादधत् ॥ (२५।२)

कुटुम्बतन्त्रे च तथा सहदेवं युधां पतिम् । (२६।१)

अनुमान्य महीपालं धृतराष्ट्रं युधिष्ठिरः ॥ (२६।२)