वैशंपायन उवाच । (१।१)

तं विजित्य महाबाहुः कुन्तीपुत्रो धनंजयः । (१।२)

प्रययावुत्तरां तस्माद् दिशं धनदपालिताम् ॥ (१।३)

अन्तर्गिरिं च कौन्तेयस्तथैव च बहिर्गिरिम् । (२।१)

तथोपरिगिरिं चैव विजिग्ये पुरुषर्षभः ॥ (२।२)

विजित्य पर्वतान् सर्वान् ये च तत्र नराधिपाः । (३।१)

तान् वशे स्थापयित्वा स रत्नान्यादाय सर्वशः ॥ (३।२)

तैर् एव सहितः सर्वैर् अनुरज्य च तान्नृपान् । (४।१)

कुलूतवासिनं राजन् बृहन्तम् उपजग्मिवान् ॥ (४।२)

मृदङ्गवरनादेन रथनेमिस्वनेन च । (५।१)

हस्तिनां च निनादेन कम्पयन् वसुधाम् इमाम् ॥ (५।२)

ततो बृहन्तस्तरुणो बलेन चतुरङ्गिणा । (६।१)

निष्क्रम्य नगरात् तस्माद् योधयामास पाण्डवम् ॥ (६।२)

सुमहान् संनिपातो ऽभूद् धनंजयबृहन्तयोः । (७।१)

न शशाक बृहन्तस्तु सोढुं पाण्डवविक्रमम् ॥ (७।२)

सो ऽविषह्यतमं ज्ञात्वा कौन्तेयं पर्वतेश्वरः । (८।१)

उपावर्तत दुर्मेधा रत्नान्यादाय सर्वशः ॥ (८।२)

स तद् राज्यम् अवस्थाप्य कुलूतसहितो ययौ । (९।१)

सेनाबिन्दुम् अथो राजन् राज्याद् आशु समाक्षिपत् ॥ (९।२)

मोदापुरं वामदेवं सुदामानं सुसंकुलम् । (१०।१)

कुलूतान् उत्तरांश्चैव तांश्च राज्ञः समानयत् ॥ (१०।२)

तत्रस्थः पुरुषैर् एव धर्मराजस्य शासनात् । (११।१)

व्यजयद् धनंजयो राजन् देशान् पञ्च प्रमाणतः ॥ (११।२)

स दिवःप्रस्थम् आसाद्य सेनाबिन्दोः पुरं महत् । (१२।१)

बलेन चतुरङ्गेण निवेशम् अकरोत् प्रभुः ॥ (१२।२)

स तैः परिवृतः सर्वैर् विष्वगश्वं नराधिपम् । (१३।१)

अभ्यगच्छन्महातेजाः पौरवं पुरुषर्षभः ॥ (१३।२)

विजित्य चाहवे शूरान् पार्वतीयान्महारथान् । (१४।१)

ध्वजिन्या व्यजयद् राजन् पुरं पौरवरक्षितम् ॥ (१४।२)

पौरवं तु विनिर्जित्य दस्यून् पर्वतवासिनः । (१५।१)

गणान् उत्सवसंकेतान् अजयत् सप्त पाण्डवः ॥ (१५।२)

ततः काश्मीरकान् वीरान् क्षत्रियान् क्षत्रियर्षभः । (१६।१)

व्यजयल्लोहितं चैव मण्डलैर् दशभिः सह ॥ (१६।२)

ततस्त्रिगर्तान् कौन्तेयो दार्वान् कोकनदाश्च ये । (१७।१)

क्षत्रिया बहवो राजन्न् उपावर्तन्त सर्वशः ॥ (१७।२)

अभिसारीं ततो रम्यां विजिग्ये कुरुनन्दनः । (१८।१)

उरशावासिनं चैव रोचमानं रणे ऽजयत् ॥ (१८।२)

ततः सिंहपुरं रम्यं चित्रायुधसुरक्षितम् । (१९।१)

प्रामथद् बलम् आस्थाय पाकशासनिर् आहवे ॥ (१९।२)

ततः सुह्मांश्च चोलांश्च किरीटी पाण्डवर्षभः । (२०।१)

सहितः सर्वसैन्येन प्रामथत् कुरुनन्दनः ॥ (२०।२)

ततः परमविक्रान्तो बाह्लीकान् कुरुनन्दनः । (२१।१)

महता परिमर्देन वशे चक्रे दुरासदान् ॥ (२१।२)

गृहीत्वा तु बलं सारं फल्गु चोत्सृज्य पाण्डवः । (२२।१)

दरदान् सह काम्बोजैर् अजयत् पाकशासनिः ॥ (२२।२)

प्रागुत्तरां दिशं ये च वसन्त्याश्रित्य दस्यवः । (२३।१)

निवसन्ति वने ये च तान् सर्वान् अजयत् प्रभुः ॥ (२३।२)

लोहान् परमकाम्बोजान् ऋषिकान् उत्तरान् अपि । (२४।१)

सहितांस्तान्महाराज व्यजयत् पाकशासनिः ॥ (२४।२)

ऋषिकेषु तु संग्रामो बभूवातिभयंकरः । (२५।१)

तारकामयसंकाशः परमर्षिकपार्थयोः ॥ (२५।२)

स विजित्य ततो राजन्न् ऋषिकान् रणमूर्धनि । (२६।१)

शुकोदरसमप्रख्यान् हयान् अष्टौ समानयत् । (२६।२)

मयूरसदृशान् अन्यान् उभयान् एव चापरान् ॥ (२६।३)

स विनिर्जित्य संग्रामे हिमवन्तं सनिष्कुटम् । (२७।१)

श्वेतपर्वतम् आसाद्य न्यवसत् पुरुषर्षभः ॥ (२७।२)