युधिष्ठिर उवाच । (१।१)

पितामहेन विधिवद् यज्ञाः प्रोक्ता महात्मना । (१।२)

गुणाश्चैषां यथातत्त्वं प्रेत्य चेह च सर्वशः ॥ (१।३)

न ते शक्या दरिद्रेण यज्ञाः प्राप्तुं पितामह । (२।१)

बहूपकरणा यज्ञा नानासंभारविस्तराः ॥ (२।२)

पार्थिवै राजपुत्रैर् वा शक्याः प्राप्तुं पितामह । (३।१)

नार्थन्यूनैर् अवगुणैर् एकात्मभिर् असंहतैः ॥ (३।२)

यो दरिद्रैर् अपि विधिः शक्यः प्राप्तुं सदा भवेत् । (४।१)

तुल्यो यज्ञफलैर् एतैस्तन्मे ब्रूहि पितामह ॥ (४।२)

भीष्म उवाच । (५।१)

इदम् अङ्गिरसा प्रोक्तम् उपवासफलात्मकम् । (५।२)

विधिं यज्ञफलैस्तुल्यं तन्निबोध युधिष्ठिर ॥ (५।३)

यस्तु कल्यं तथा सायं भुञ्जानो नान्तरा पिबेत् । (६।१)

अहिंसानिरतो नित्यं जुह्वानो जातवेदसम् ॥ (६।२)

षड्भिर् एव तु वर्षैः स सिध्यते नात्र संशयः । (७।१)

तप्तकाञ्चनवर्णं च विमानं लभते नरः ॥ (७।२)

देवस्त्रीणाम् अधीवासे नृत्यगीतनिनादिते । (८।१)

प्राजापत्ये वसेत् पद्मं वर्षाणाम् अग्निसंनिभे ॥ (८।२)

त्रीणि वर्षाणि यः प्राशेत् सततं त्वेकभोजनम् । (९।१)

धर्मपत्नीरतो नित्यम् अग्निष्टोमफलं लभेत् ॥ (९।२)

द्वितीये दिवसे यस्तु प्राश्नीयाद् एकभोजनम् । (१०।१)

सदा द्वादशमासांस्तु जुह्वानो जातवेदसम् । (१०।२)

यज्ञं बहुसुवर्णं वा वासवप्रियम् आहरेत् ॥ (१०।३)

सत्यवाग् दानशीलश्च ब्रह्मण्यश्चानसूयकः । (११।१)

क्षान्तो दान्तो जितक्रोधः स गच्छति परां गतिम् ॥ (११।२)

पाण्डुराभ्रप्रतीकाशे विमाने हंसलक्षणे । (१२।१)

द्वे समाप्ते ततः पद्मे सो ऽप्सरोभिर् वसेत् सह ॥ (१२।२)

तृतीये दिवसे यस्तु प्राश्नीयाद् एकभोजनम् । (१३।१)

सदा द्वादशमासांस्तु जुह्वानो जातवेदसम् ॥ (१३।२)

अतिरात्रस्य यज्ञस्य फलं प्राप्नोत्यनुत्तमम् । (१४।१)

मयूरहंससंयुक्तं विमानं लभते नरः ॥ (१४।२)

सप्तर्षीणां सदा लोके सो ऽप्सरोभिर् वसेत् सह । (१५।१)

निवर्तनं च तत्रास्य त्रीणि पद्मानि वै विदुः ॥ (१५।२)

दिवसे यश्चतुर्थे तु प्राश्नीयाद् एकभोजनम् । (१६।१)

सदा द्वादशमासान् वै जुह्वानो जातवेदसम् ॥ (१६।२)

वाजपेयस्य यज्ञस्य फलं प्राप्नोत्यनुत्तमम् । (१७।१)

इन्द्रकन्याभिरूढं च विमानं लभते नरः ॥ (१७।२)

सागरस्य च पर्यन्ते वासवं लोकम् आवसेत् । (१८।१)

देवराजस्य च क्रीडां नित्यकालम् अवेक्षते ॥ (१८।२)

दिवसे पञ्चमे यस्तु प्राश्नीयाद् एकभोजनम् । (१९।१)

सदा द्वादशमासांस्तु जुह्वानो जातवेदसम् ॥ (१९।२)

अलुब्धः सत्यवादी च ब्रह्मण्यश्चाविहिंसकः । (२०।१)

अनसूयुर् अपापस्थो द्वादशाहफलं लभेत् ॥ (२०।२)

जाम्बूनदमयं दिव्यं विमानं हंसलक्षणम् । (२१।१)

सूर्यमालासमाभासम् आरोहेत् पाण्डुरं गृहम् ॥ (२१।२)

आवर्तनानि चत्वारि तथा पद्मानि द्वादश । (२२।१)

शराग्निपरिमाणं च तत्रासौ वसते सुखम् ॥ (२२।२)

दिवसे यस्तु षष्ठे वै मुनिः प्राशेत भोजनम् । (२३।१)

सदा द्वादशमासान् वै जुह्वानो जातवेदसम् ॥ (२३।२)

सदा त्रिषवणस्नायी ब्रह्मचार्यनसूयकः । (२४।१)

गवामयस्य यज्ञस्य फलं प्राप्नोत्यनुत्तमम् ॥ (२४।२)

अग्निज्वालासमाभासं हंसबर्हिणसेवितम् । (२५।१)

शातकुम्भमयं युक्तं साधयेद् यानम् उत्तमम् ॥ (२५।२)

तथैवाप्सरसाम् अङ्के प्रसुप्तः प्रतिबुध्यते । (२६।१)

नूपुराणां निनादेन मेखलानां च निस्वनैः ॥ (२६।२)

कोटीसहस्रं वर्षाणां त्रीणि कोटिशतानि च । (२७।१)

पद्मान्यष्टादश तथा पताके द्वे तथैव च ॥ (२७।२)

अयुतानि च पञ्चाशद् ऋक्षचर्मशतस्य च । (२८।१)

लोम्नां प्रमाणेन समं ब्रह्मलोके महीयते ॥ (२८।२)

दिवसे सप्तमे यस्तु प्राश्नीयाद् एकभोजनम् । (२९।१)

सदा द्वादशमासान् वै जुह्वानो जातवेदसम् ॥ (२९।२)

सरस्वतीं गोपयानो ब्रह्मचर्यं समाचरन् । (३०।१)

सुमनोवर्णकं चैव मधुमांसं च वर्जयेत् ॥ (३०।२)

पुरुषो मरुतां लोकम् इन्द्रलोकं च गच्छति । (३१।१)

तत्र तत्र च सिद्धार्थो देवकन्याभिर् उह्यते ॥ (३१।२)

फलं बहुसुवर्णस्य यज्ञस्य लभते नरः । (३२।१)

संख्याम् अतिगुणां चापि तेषु लोकेषु मोदते ॥ (३२।२)

यस्तु संवत्सरं क्षान्तो भुङ्क्ते ऽहन्यष्टमे नरः । (३३।१)

देवकार्यपरो नित्यं जुह्वानो जातवेदसम् ॥ (३३।२)

पौण्डरीकस्य यज्ञस्य फलं प्राप्नोत्यनुत्तमम् । (३४।१)

पद्मवर्णनिभं चैव विमानम् अधिरोहति ॥ (३४।२)

कृष्णाः कनकगौर्यश्च नार्यः श्यामास्तथापराः । (३५।१)

वयोरूपविलासिन्यो लभते नात्र संशयः ॥ (३५।२)

यस्तु संवत्सरं भुङ्क्ते नवमे नवमे ऽहनि । (३६।१)

सदा द्वादशमासान् वै जुह्वानो जातवेदसम् ॥ (३६।२)

अश्वमेधस्य यज्ञस्य फलं प्राप्नोति मानवः । (३७।१)

पुण्डरीकप्रकाशं च विमानं लभते नरः ॥ (३७।२)

दीप्तसूर्याग्नितेजोभिर् दिव्यमालाभिर् एव च । (३८।१)

नीयते रुद्रकन्याभिः सो ऽन्तरिक्षं सनातनम् ॥ (३८।२)

अष्टादशसहस्राणि वर्षाणां कल्पम् एव च । (३९।१)

कोटीशतसहस्रं च तेषु लोकेषु मोदते ॥ (३९।२)

यस्तु संवत्सरं भुङ्क्ते दशाहे वै गते गते । (४०।१)

सदा द्वादशमासान् वै जुह्वानो जातवेदसम् ॥ (४०।२)

ब्रह्मकन्यानिवेशे च सर्वभूतमनोहरे । (४१।१)

अश्वमेधसहस्रस्य फलं प्राप्नोत्यनुत्तमम् ॥ (४१।२)

रूपवत्यश्च तं कन्या रमयन्ति सदा नरम् । (४२।१)

नीलोत्पलनिभैर् वर्णै रक्तोत्पलनिभैस्तथा ॥ (४२।२)

विमानं मण्डलावर्तम् आवर्तगहनावृतम् । (४३।१)

सागरोर्मिप्रतीकाशं साधयेद् यानम् उत्तमम् ॥ (४३।२)

विचित्रमणिमालाभिर् नादितं शङ्खपुष्करैः । (४४।१)

स्फाटिकैर् वज्रसारैश्च स्तम्भैः सुकृतवेदिकम् । (४४।२)

आरोहति महद् यानं हंससारसवाहनम् ॥ (४४।३)

एकादशे तु दिवसे यः प्राप्ते प्राशते हविः । (४५।१)

सदा द्वादशमासान् वै जुह्वानो जातवेदसम् ॥ (४५।२)

परस्त्रियो नाभिलषेद् वाचाथ मनसापि वा । (४६।१)

अनृतं च न भाषेत मातापित्रोः कृते ऽपि वा ॥ (४६।२)

अभिगच्छेन्महादेवं विमानस्थं महाबलम् । (४७।१)

स्वयंभुवं च पश्येत विमानं समुपस्थितम् ॥ (४७।२)

कुमार्यः काञ्चनाभासा रूपवत्यो नयन्ति तम् । (४८।१)

रुद्राणां तम् अधीवासं दिवि दिव्यं मनोहरम् ॥ (४८।२)

वर्षाण्यपरिमेयानि युगान्तम् अपि चावसेत् । (४९।१)

कोटीशतसहस्रं च दश कोटिशतानि च ॥ (४९।२)

रुद्रं नित्यं प्रणमते देवदानवसंमतम् । (५०।१)

स तस्मै दर्शनं प्राप्तो दिवसे दिवसे भवेत् ॥ (५०।२)

दिवसे द्वादशे यस्तु प्राप्ते वै प्राशते हविः । (५१।१)

सदा द्वादशमासान् वै सर्वमेधफलं लभेत् ॥ (५१।२)

आदित्यैर् द्वादशैस्तस्य विमानं संविधीयते । (५२।१)

मणिमुक्ताप्रवालैश्च महार्हैर् उपशोभितम् ॥ (५२।२)

हंसमालापरिक्षिप्तं नागवीथीसमाकुलम् । (५३।१)

मयूरैश्चक्रवाकैश्च कूजद्भिर् उपशोभितम् ॥ (५३।२)

अट्टैर् महद्भिः संयुक्तं ब्रह्मलोके प्रतिष्ठितम् । (५४।१)

नित्यम् आवसते राजन्नरनारीसमावृतम् । (५४।२)

ऋषिर् एवं महाभागस्त्वङ्गिराः प्राह धर्मवित् ॥ (५४।३)

त्रयोदशे तु दिवसे यः प्राप्ते प्राशते हविः । (५५।१)

सदा द्वादश मासान् वै देवसत्रफलं लभेत् ॥ (५५।२)

रक्तपद्मोदयं नाम विमानं साधयेन्नरः । (५६।१)

जातरूपप्रयुक्तं च रत्नसंचयभूषितम् ॥ (५६।२)

देवकन्याभिर् आकीर्णं दिव्याभरणभूषितम् । (५७।१)

पुण्यगन्धोदयं दिव्यं वायव्यैर् उपशोभितम् ॥ (५७।२)

तत्र शङ्कुपताकं च युगान्तं कल्पम् एव च । (५८।१)

अयुतायुतं तथा पद्मं समुद्रं च तथा वसेत् ॥ (५८।२)

गीतगन्धर्वघोषैश्च भेरीपणवनिस्वनैः । (५९।१)

सदा प्रमुदितस्ताभिर् देवकन्याभिर् ईड्यते ॥ (५९।२)

चतुर्दशे तु दिवसे यः पूर्णे प्राशते हविः । (६०।१)

सदा द्वादश मासान् वै महामेधफलं लभेत् ॥ (६०।२)

अनिर्देश्यवयोरूपा देवकन्याः स्वलंकृताः । (६१।१)

मृष्टतप्ताङ्गदधरा विमानैर् अनुयान्ति तम् ॥ (६१।२)

कलहंसविनिर्घोषैर् नूपुराणां च निस्वनैः । (६२।१)

काञ्चीनां च समुत्कर्षैस्तत्र तत्र विबोध्यते ॥ (६२।२)

देवकन्यानिवासे च तस्मिन् वसति मानवः । (६३।१)

जाह्नवीवालुकाकीर्णे पूर्णं संवत्सरं नरः ॥ (६३।२)

यस्तु पक्षे गते भुङ्क्ते एकभक्तं जितेन्द्रियः । (६४।१)

सदा दादश मासांस्तु जुह्वानो जातवेदसम् । (६४।२)

राजसूयसहस्रस्य फलं प्राप्नोत्यनुत्तमम् ॥ (६४।३)

यानम् आरोहते नित्यं हंसबर्हिणसेवितम् । (६५।१)

मणिमण्डलकैश्चित्रं जातरूपसमावृतम् ॥ (६५।२)

दिव्याभरणशोभाभिर् वरस्त्रीभिर् अलंकृतम् । (६६।१)

एकस्तम्भं चतुर्द्वारं सप्तभौमं सुमङ्गलम् । (६६।२)

वैजयन्तीसहस्रैश्च शोभितं गीतनिस्वनैः ॥ (६६।३)

दिव्यं दिव्यगुणोपेतं विमानम् अधिरोहति । (६७।१)

मणिमुक्ताप्रवालैश्च भूषितं वैद्युतप्रभम् । (६७।२)

वसेद् युगसहस्रं च खड्गकुञ्जरवाहनः ॥ (६७।३)

षोडशे दिवसे यस्तु सम्प्राप्ते प्राशते हविः । (६८।१)

सदा द्वादश मासान् वै सोमयज्ञफलं लभेत् ॥ (६८।२)

सोमकन्यानिवासेषु सो ऽध्यावसति नित्यदा । (६९।१)

सौम्यगन्धानुलिप्तश्च कामचारगतिर् भवेत् ॥ (६९।२)

सुदर्शनाभिर् नारीभिर् मधुराभिस्तथैव च । (७०।१)

अर्च्यते वै विमानस्थः कामभोगैश्च सेव्यते ॥ (७०।२)

फलं पद्मशतप्रख्यं महाकल्पं दशाधिकम् । (७१।१)

आवर्तनानि चत्वारि सागरे यात्यसौ नरः ॥ (७१।२)

दिवसे सप्तदशमे यः प्राप्ते प्राशते हविः । (७२।१)

सदा द्वादश मासान् वै जुह्वानो जातवेदसम् ॥ (७२।२)

स्थानं वारुणम् ऐन्द्रं च रौद्रं चैवाधिगच्छति । (७३।१)

मारुतौशनसे चैव ब्रह्मलोकं च गच्छति ॥ (७३।२)

तत्र दैवतकन्याभिर् आसनेनोपचर्यते । (७४।१)

भूर् भुवं चापि देवर्षिं विश्वरूपम् अवेक्षते ॥ (७४।२)

तत्र देवाधिदेवस्य कुमार्यो रमयन्ति तम् । (७५।१)

द्वात्रिंशद् रूपधारिण्यो मधुराः समलंकृताः ॥ (७५।२)

चन्द्रादित्यावुभौ यावद् गगने चरतः प्रभो । (७६।१)

तावच्चरत्यसौ वीरः सुधामृतरसाशनः ॥ (७६।२)

अष्टादशे तु दिवसे प्राश्नीयाद् एकभोजनम् । (७७।१)

सदा द्वादश मासान् वै सप्त लोकान् स पश्यति ॥ (७७।२)

रथैः सनन्दिघोषैश्च पृष्ठतः सो ऽनुगम्यते । (७८।१)

देवकन्याधिरूढैस्तु भ्राजमानैः स्वलंकृतैः ॥ (७८।२)

व्याघ्रसिंहप्रयुक्तं च मेघस्वननिनादितम् । (७९।१)

विमानम् उत्तमं दिव्यं सुसुखी ह्यधिरोहति ॥ (७९।२)

तत्र कल्पसहस्रं स कान्ताभिः सह मोदते । (८०।१)

सुधारसं च भुञ्जीत अमृतोपमम् उत्तमम् ॥ (८०।२)

एकोनविंशे दिवसे यो भुङ्क्ते एकभोजनम् । (८१।१)

सदा द्वादश मासान् वै सप्त लोकान् स पश्यति ॥ (८१।२)

उत्तमं लभते स्थानम् अप्सरोगणसेवितम् । (८२।१)

गन्धर्वैर् उपगीतं च विमानं सूर्यवर्चसम् ॥ (८२।२)

तत्रामरवरस्त्रीभिर् मोदते विगतज्वरः । (८३।१)

दिव्याम्बरधरः श्रीमान् अयुतानां शतं समाः ॥ (८३।२)

पूर्णे ऽथ दिवसे विंशे यो भुङ्क्ते ह्येकभोजनम् । (८४।१)

सदा द्वादश मासांस्तु सत्यवादी धृतव्रतः ॥ (८४।२)

अमांसाशी ब्रह्मचारी सर्वभूतहिते रतः । (८५।१)

स लोकान् विपुलान् दिव्यान् आदित्यानाम् उपाश्नुते ॥ (८५।२)

गन्धर्वैर् अप्सरोभिश्च दिव्यमाल्यानुलेपनैः । (८६।१)

विमानैः काञ्चनैर् दिव्यैः पृष्ठतश्चानुगम्यते ॥ (८६।२)

एकविंशे तु दिवसे यो भुङ्क्ते ह्येकभोजनम् । (८७।१)

सदा द्वादश मासान् वै जुह्वानो जातवेदसम् ॥ (८७।२)

लोकम् औशनसं दिव्यं शक्रलोकं च गच्छति । (८८।१)

अश्विनोर् मरुतां चैव सुखेष्वभिरतः सदा ॥ (८८।२)

अनभिज्ञश्च दुःखानां विमानवरम् आस्थितः । (८९।१)

सेव्यमानो वरस्त्रीभिः क्रीडत्यमरवत् प्रभुः ॥ (८९।२)

द्वाविंशे दिवसे प्राप्ते यो भुङ्क्ते ह्येकभोजनम् । (९०।१)

सदा द्वादश मासान् वै जुह्वानो जातवेदसम् ॥ (९०।२)

धृतिमान् अहिंसानिरतः सत्यवाग् अनसूयकः । (९१।१)

लोकान् वसूनाम् आप्नोति दिवाकरसमप्रभः ॥ (९१।२)

कामचारी सुधाहारो विमानवरम् आस्थितः । (९२।१)

रमते देवकन्याभिर् दिव्याभरणभूषितः ॥ (९२।२)

त्रयोविंशे तु दिवसे प्राशेद् यस्त्वेकभोजनम् । (९३।१)

सदा द्वादश मासांस्तु मिताहारो जितेन्द्रियः ॥ (९३।२)

वायोर् उशनसश्चैव रुद्रलोकं च गच्छति । (९४।१)

कामचारी कामगमः पूज्यमानो ऽप्सरोगणैः ॥ (९४।२)

अनेकगुणपर्यन्तं विमानवरम् आस्थितः । (९५।१)

रमते देवकन्याभिर् दिव्याभरणभूषितः ॥ (९५।२)

चतुर्विंशे तु दिवसे यः प्राशेद् एकभोजनम् । (९६।१)

सदा द्वादश मासान् वै जुह्वानो जातवेदसम् ॥ (९६।२)

आदित्यानाम् अधीवासे मोदमानो वसेच्चिरम् । (९७।१)

दिव्यमाल्याम्बरधरो दिव्यगन्धानुलेपनः ॥ (९७।२)

विमाने काञ्चने दिव्ये हंसयुक्ते मनोरमे । (९८।१)

रमते देवकन्यानां सहस्रैर् अयुतैस्तथा ॥ (९८।२)

पञ्चविंशे तु दिवसे यः प्राशेद् एकभोजनम् । (९९।१)

सदा द्वादश मासांस्तु पुष्कलं यानम् आरुहेत् ॥ (९९।२)

सिंहव्याघ्रप्रयुक्तैश्च मेघस्वननिनादितैः । (१००।१)

रथैः सनन्दिघोषैश्च पृष्ठतः सो ऽनुगम्यते ॥ (१००।२)

देवकन्यासमारूढै राजतैर् विमलैः शुभैः । (१०१।१)

विमानम् उत्तमं दिव्यम् आस्थाय सुमनोहरम् ॥ (१०१।२)

तत्र कल्पसहस्रं वै वसते स्त्रीशतावृते । (१०२।१)

सुधारसं चोपजीवन्न् अमृतोपमम् उत्तमम् ॥ (१०२।२)

षड्विंशे दिवसे यस्तु प्राश्नीयाद् एकभोजनम् । (१०३।१)

सदा द्वादश मासांस्तु नियतो नियताशनः ॥ (१०३।२)

जितेन्द्रियो वीतरागो जुह्वानो जातवेदसम् । (१०४।१)

स प्राप्नोति महाभागः पूज्यमानो ऽप्सरोगणैः ॥ (१०४।२)

सप्तानां मरुतां लोकान् वसूनां चापि सो ऽश्नुते । (१०५।१)

विमाने स्फाटिके दिव्ये सर्वरत्नैर् अलंकृते ॥ (१०५।२)

गन्धर्वैर् अप्सरोभिश्च पूज्यमानः प्रमोदते । (१०६।१)

द्वे युगानां सहस्रे तु दिव्ये दिव्येन तेजसा ॥ (१०६।२)

सप्तविंशे तु दिवसे यः प्राशेद् एकभोजनम् । (१०७।१)

सदा द्वादश मासांस्तु जुह्वानो जातवेदसम् ॥ (१०७।२)

फलं प्राप्नोति विपुलं देवलोके च पूज्यते । (१०८।१)

अमृताशी वसंस्तत्र स वितृप्तः प्रमोदते ॥ (१०८।२)

देवर्षिचरितं राजन् राजर्षिभिर् अधिष्ठितम् । (१०९।१)

अध्यावसति दिव्यात्मा विमानवरम् आस्थितः ॥ (१०९।२)

स्त्रीभिर् मनोभिरामाभी रममाणो मदोत्कटः । (११०।१)

युगकल्पसहस्राणि त्रीण्यावसति वै सुखम् ॥ (११०।२)

यो ऽष्टाविंशे तु दिवसे प्राश्नीयाद् एकभोजनम् । (१११।१)

सदा द्वादश मासांस्तु जितात्मा विजितेन्द्रियः ॥ (१११।२)

फलं देवर्षिचरितं विपुलं समुपाश्नुते । (११२।१)

भोगवांस्तेजसा भाति सहस्रांशुर् इवामलः ॥ (११२।२)

सुकुमार्यश्च नार्यस्तं रममाणाः सुवर्चसः । (११३।१)

पीनस्तनोरुजघना दिव्याभरणभूषिताः ॥ (११३।२)

रमयन्ति मनः कान्ता विमाने सूर्यसंनिभे । (११४।१)

सर्वकामगमे दिव्ये कल्पायुतशतं समाः ॥ (११४।२)

एकोनत्रिंशे दिवसे यः प्राशेद् एकभोजनम् । (११५।१)

सदा द्वादश मासान् वै सत्यव्रतपरायणः ॥ (११५।२)

तस्य लोकाः शुभा दिव्या देवराजर्षिपूजिताः । (११६।१)

विमानं चन्द्रशुभ्राभं दिव्यं समधिगच्छति ॥ (११६।२)

जातरूपमयं युक्तं सर्वरत्नविभूषितम् । (११७।१)

अप्सरोगणसम्पूर्णं गन्धर्वैर् अभिनादितम् ॥ (११७।२)

तत्र चैनं शुभा नार्यो दिव्याभरणभूषिताः । (११८।१)

मनोभिरामा मधुरा रमयन्ति मदोत्कटाः ॥ (११८।२)

भोगवांस्तेजसा युक्तो वैश्वानरसमप्रभः । (११९।१)

दिव्यो दिव्येन वपुषा भ्राजमान इवामरः ॥ (११९।२)

वसूनां मरुतां चैव साध्यानाम् अश्विनोस्तथा । (१२०।१)

रुद्राणां च तथा लोकान् ब्रह्मलोकं च गच्छति ॥ (१२०।२)

यस्तु मासे गते भुङ्क्ते एकभक्तं शमात्मकः । (१२१।१)

सदा द्वादश मासान् वै ब्रह्मलोकम् अवाप्नुयात् ॥ (१२१।२)

सुधारसकृताहारः श्रीमान् सर्वमनोहरः । (१२२।१)

तेजसा वपुषा लक्ष्म्या भ्राजते रश्मिवान् इव ॥ (१२२।२)

दिव्यमाल्याम्बरधरो दिव्यगन्धानुलेपनः । (१२३।१)

सुखेष्वभिरतो योगी दुःखानाम् अविजानकः ॥ (१२३।२)

स्वयंप्रभाभिर् नारीभिर् विमानस्थो महीयते । (१२४।१)

रुद्रदेवर्षिकन्याभिः सततं चाभिपूज्यते ॥ (१२४।२)

नानाविधसुरूपाभिर् नानारागाभिर् एव च । (१२५।१)

नानामधुरभाषाभिर् नानारतिभिर् एव च ॥ (१२५।२)

विमाने नगराकारे सूर्यवत् सूर्यसंनिभे । (१२६।१)

पृष्ठतः सोमसंकाशे उदक् चैवाभ्रसंनिभे ॥ (१२६।२)

दक्षिणायां तु रक्ताभे अधस्तान्नीलमण्डले । (१२७।१)

ऊर्ध्वं चित्राभिसंकाशे नैको वसति पूजितः ॥ (१२७।२)

यावद् वर्षसहस्रं तु जम्बूद्वीपे प्रवर्षति । (१२८।१)

तावत् संवत्सराः प्रोक्ता ब्रह्मलोकस्य धीमतः ॥ (१२८।२)

विप्रुषश्चैव यावन्त्यो निपतन्ति नभस्तलात् । (१२९।१)

वर्षासु वर्षतस्तावन्निवसत्यमरप्रभः ॥ (१२९।२)

मासोपवासी वर्षैस्तु दशभिः स्वर्गम् उत्तमम् । (१३०।१)

महर्षित्वम् अथासाद्य सशरीरगतिर् भवेत् ॥ (१३०।२)

मुनिर् दान्तो जितक्रोधो जितशिश्नोदरः सदा । (१३१।१)

जुह्वन्न् अग्नींश्च नियतः संध्योपासनसेविता ॥ (१३१।२)

बहुभिर् नियमैर् एवं मासान् अश्नाति यो नरः । (१३२।१)

अभ्रावकाशशीलश्च तस्य वासो निरुच्यते ॥ (१३२।२)

दिवं गत्वा शरीरेण स्वेन राजन् यथामरः । (१३३।१)

स्वर्गं पुण्यं यथाकामम् उपभुङ्क्ते यथाविधि ॥ (१३३।२)

एष ते भरतश्रेष्ठ यज्ञानां विधिर् उत्तमः । (१३४।१)

व्याख्यातो ह्यानुपूर्व्येण उपवासफलात्मकः ॥ (१३४।२)

दरिद्रैर् मनुजैः पार्थ प्राप्यं यज्ञफलं यथा । (१३५।१)

उपवासम् इमं कृत्वा गच्छेच्च परमां गतिम् । (१३५।२)

देवद्विजातिपूजायां रतो भरतसत्तम ॥ (१३५।३)

उपवासविधिस्त्वेष विस्तरेण प्रकीर्तितः । (१३६।१)

नियतेष्वप्रमत्तेषु शौचवत्सु महात्मसु ॥ (१३६।२)

दम्भद्रोहनिवृत्तेषु कृतबुद्धिषु भारत । (१३७।१)

अचलेष्वप्रकम्पेषु मा ते भूद् अत्र संशयः ॥ (१३७।२)