वैशंपायन उवाच । (१।१)

अपयाते तु राधेये दुर्योधनपुरोगमाः । (१।२)

अनीकेन यथास्वेन शरैर् आर्छन्त पाण्डवम् ॥ (१।३)

बहुधा तस्य सैन्यस्य व्यूढस्यापततः शरैः । (२।१)

अभियानीयम् आज्ञाय वैराटिर् इदम् अब्रवीत् ॥ (२।२)

आस्थाय रुचिरं जिष्णो रथं सारथिना मया । (३।१)

कतमद् यास्यसे ऽनीकम् उक्तो यास्याम्यहं त्वया ॥ (३।२)

अर्जुन उवाच । (४।१)

लोहिताक्षम् अरिष्टं यं वैयाघ्रम् अनुपश्यसि । (४।२)

नीलां पताकाम् आश्रित्य रथे तिष्ठन्तम् उत्तर ॥ (४।३)

कृपस्यैतद् रथानीकं प्रापयस्वैतद् एव माम् । (५।१)

एतस्य दर्शयिष्यामि शीघ्रास्त्रं दृढधन्विनः ॥ (५।२)

कमण्डलुर् ध्वजे यस्य शातकुम्भमयः शुभः । (६।१)

आचार्य एष वै द्रोणः सर्वशस्त्रभृतां वरः ॥ (६।२)

सुप्रसन्नमना वीर कुरुष्वैनं प्रदक्षिणम् । (७।१)

अत्रैव चाविरोधेन एष धर्मः सनातनः ॥ (७।२)

यदि मे प्रथमं द्रोणः शरीरे प्रहरिष्यति । (८।१)

ततो ऽस्य प्रहरिष्यामि नास्य कोपो भविष्यति ॥ (८।२)

अस्याविदूरे तु धनुर् ध्वजाग्रे यस्य दृश्यते । (९।१)

आचार्यस्यैष पुत्रो वै अश्वत्थामा महारथः ॥ (९।२)

सदा ममैष मान्यश्च सर्वशस्त्रभृताम् अपि । (१०।१)

एतस्य त्वं रथं प्राप्य निवर्तेथाः पुनः पुनः ॥ (१०।२)

य एष तु रथानीके सुवर्णकवचावृतः । (११।१)

सेनाग्र्येण तृतीयेन व्यवहार्येण तिष्ठति ॥ (११।२)

यस्य नागो ध्वजाग्रे वै हेमकेतनसंश्रितः । (१२।१)

धृतराष्ट्रात्मजः श्रीमान् एष राजा सुयोधनः ॥ (१२।२)

एतस्याभिमुखं वीर रथं पररथारुजः । (१३।१)

प्रापयस्वैष तेजोऽभिप्रमाथी युद्धदुर्मदः ॥ (१३।२)

एष द्रोणस्य शिष्याणां शीघ्रास्त्रः प्रथमो मतः । (१४।१)

एतस्य दर्शयिष्यामि शीघ्रास्त्रं विपुलं शरैः ॥ (१४।२)

नागकक्ष्या तु रुचिरा ध्वजाग्रे यस्य तिष्ठति । (१५।१)

एष वैकर्तनः कर्णो विदितः पूर्वम् एव ते ॥ (१५।२)

एतस्य रथम् आस्थाय राधेयस्य दुरात्मनः । (१६।१)

यत्तो भवेथाः संग्रामे स्पर्धत्येष मया सदा ॥ (१६।२)

यस्तु नीलानुसारेण पञ्चतारेण केतुना । (१७।१)

हस्तावापी बृहद्धन्वा रथे तिष्ठति वीर्यवान् ॥ (१७।२)

यस्य तारार्कचित्रो ऽसौ रथे ध्वजवरः स्थितः । (१८।१)

यस्यैतत् पाण्डुरं छत्रं विमलं मूर्ध्नि तिष्ठति ॥ (१८।२)

महतो रथवंशस्य नानाध्वजपताकिनः । (१९।१)

बलाहकाग्रे सूर्यो वा य एष प्रमुखे स्थितः ॥ (१९।२)

हैमं चन्द्रार्कसंकाशं कवचं यस्य दृश्यते । (२०।१)

जातरूपशिरस्त्राणस्त्रासयन्न् इव मे मनः ॥ (२०।२)

एष शांतनवो भीष्मः सर्वेषां नः पितामहः । (२१।१)

राजश्रियावबद्धस्तु दुर्योधनवशानुगः ॥ (२१।२)

पश्चाद् एष प्रयातव्यो न मे विघ्नकरो भवेत् । (२२।१)

एतेन युध्यमानस्य यत्तः संयच्छ मे हयान् ॥ (२२।२)

ततो ऽभ्यवहद् अव्यग्रो वैराटिः सव्यसाचिनम् । (२३।१)

यत्रातिष्ठत् कृपो राजन् योत्स्यमानो धनंजयम् ॥ (२३।२)