धृतराष्ट्र उवाच । (१।१)

व्यवहाराश्च ते तात नित्यम् आप्तैर् अधिष्ठिताः । (१।२)

योज्यास्तुष्टैर् हितै राजन्नित्यं चारैर् अनुष्ठिताः ॥ (१।३)

परिमाणं विदित्वा च दण्डं दण्ड्येषु भारत । (२।१)

प्रणयेयुर् यथान्यायं पुरुषास्ते युधिष्ठिर ॥ (२।२)

आदानरुचयश्चैव परदाराभिमर्शकाः । (३।१)

उग्रदण्डप्रधानाश्च मिथ्या व्याहारिणस्तथा ॥ (३।२)

आक्रोष्टारश्च लुब्धाश्च हन्तारः साहसप्रियाः । (४।१)

सभाविहारभेत्तारो वर्णानां च प्रदूषकाः । (४।२)

हिरण्यदण्ड्या वध्याश्च कर्तव्या देशकालतः ॥ (४।३)

प्रातर् एव हि पश्येथा ये कुर्युर् व्ययकर्म ते । (५।१)

अलंकारम् अथो भोज्यम् अत ऊर्ध्वं समाचरेः ॥ (५।२)

पश्येथाश्च ततो योधान् सदा त्वं परिहर्षयन् । (६।१)

दूतानां च चराणां च प्रदोषस्ते सदा भवेत् ॥ (६।२)

सदा चापररात्रं ते भवेत् कार्यार्थनिर्णये । (७।१)

मध्यरात्रे विहारस्ते मध्याह्ने च सदा भवेत् ॥ (७।२)

सर्वे त्वात्ययिकाः कालाः कार्याणां भरतर्षभ । (८।१)

तथैवालंकृतः काले तिष्ठेथा भूरिदक्षिणः । (८।२)

चक्रवत् कर्मणां तात पर्यायो ह्येष नित्यशः ॥ (८।३)

कोशस्य संचये यत्नं कुर्वीथा न्यायतः सदा । (९।१)

द्विविधस्य महाराज विपरीतं विवर्जयेः ॥ (९।२)

चारैर् विदित्वा शत्रूंश्च ये ते राज्यान्तरायिणः । (१०।१)

तान् आप्तैः पुरुषैर् दूराद् घातयेथाः परस्परम् ॥ (१०।२)

कर्मदृष्ट्याथ भृत्यांस्त्वं वरयेथाः कुरूद्वह । (११।१)

कारयेथाश्च कर्माणि युक्तायुक्तैर् अधिष्ठितैः ॥ (११।२)

सेनाप्रणेता च भवेत् तव तात दृढव्रतः । (१२।१)

शूरः क्लेशसहश्चैव प्रियश्च तव मानवः ॥ (१२।२)

सर्वे जानपदाश्चैव तव कर्माणि पाण्डव । (१३।१)

पौरोगवाश्च सभ्याश्च कुर्युर् ये व्यवहारिणः ॥ (१३।२)

स्वरन्ध्रं पररन्ध्रं च स्वेषु चैव परेषु च । (१४।१)

उपलक्षयितव्यं ते नित्यम् एव युधिष्ठिर ॥ (१४।२)

देशान्तरस्थाश्च नरा विक्रान्ताः सर्वकर्मसु । (१५।१)

मात्राभिर् अनुरूपाभिर् अनुग्राह्या हितास्त्वया ॥ (१५।२)

गुणार्थिनां गुणः कार्यो विदुषां ते जनाधिप । (१६।१)

अविचाल्याश्च ते ते स्युर् यथा मेरुर् महागिरिः ॥ (१६।२)