नारद उवाच । (१।१)

शक्रस्य तु सभा दिव्या भास्वरा कर्मभिर् जिता । (१।२)

स्वयं शक्रेण कौरव्य निर्मितार्कसमप्रभा ॥ (१।३)

विस्तीर्णा योजनशतं शतम् अध्यर्धम् आयता । (२।१)

वैहायसी कामगमा पञ्चयोजनम् उच्छ्रिता ॥ (२।२)

जराशोकक्लमापेता निरातङ्का शिवा शुभा । (३।१)

वेश्मासनवती रम्या दिव्यपादपशोभिता ॥ (३।२)

तस्यां देवेश्वरः पार्थ सभायां परमासने । (४।१)

आस्ते शच्या महेन्द्राण्या श्रिया लक्ष्म्या च भारत ॥ (४।२)

बिभ्रद् वपुर् अनिर्देश्यं किरीटी लोहिताङ्गदः । (५।१)

विरजोम्बरश् चित्रमाल्यो ह्रीकीर्तिद्युतिभिः सह ॥ (५।२)

तस्याम् उपासते नित्यं महात्मानं शतक्रतुम् । (६।१)

मरुतः सर्वतो राजन् सर्वे च गृहमेधिनः । (६।२)

सिद्धा देवर्षयश्चैव साध्या देवगणास्तथा । (६।३)

मरुत्वन्तश्च सहिता भास्वन्तो हेममालिनः ॥ (६।४)

एते सानुचराः सर्वे दिव्यरूपाः स्वलंकृताः । (७।१)

उपासते महात्मानं देवराजम् अरिंदमम् ॥ (७।२)

तथा देवर्षयः सर्वे पार्थ शक्रम् उपासते । (८।१)

अमला धूतपाप्मानो दीप्यमाना इवाग्नयः । (८।२)

तेजस्विनः सोमयुजो विपापा विगतक्लमाः ॥ (८।३)

पराशरः पर्वतश्च तथा सावर्णिगालवौ । (९।१)

एकतश्च द्वितश्चैव त्रितश्चैव महामुनिः । (९।२)

शङ्खश्च लिखितश्चैव तथा गौरशिरा मुनिः ॥ (९।३)

दुर्वासाश्च दीर्घतपा याज्ञवल्क्यो ऽथ भालुकिः । (१०।१)

तथा दीर्घतमा मुनिः । (१०।२)

पवित्रपाणिः सावर्णिः । (१०।३)

उद्दालकः श्वेतकेतुस्तथा शाट्यायनः प्रभुः ॥ (१०।४)

हविष्मांश्च गविष्ठश्च हरिश्चन्द्रश्च पार्थिवः । (११।१)

हृद्यश्चोदरशाण्डिल्यः पाराशर्यः कृषीवलः । (११।२)

जाबालिर् वामदेवश्च शक्तिर् गार्ग्यसुवामनौ ॥ (११।३)

वातस्कन्धो विशाखश्च विधाता काल एव च । (१२।१)

अनन्तदन्तस्त्वष्टा च विश्वकर्मा च तुम्बुरुः ॥ (१२।२)

अयोनिजा योनिजाश्च वायुभक्षा हुताशिनः । (१३।१)

ईशानं सर्वलोकस्य वज्रिणं समुपासते ॥ (१३।२)

सहदेवः सुनीथश्च वाल्मीकिश्च महातपाः । (१४।१)

समीकः सत्यवांश्चैव प्रचेताः सत्यसंगरः ॥ (१४।२)

मेधातिथिर् वामदेवः पुलस्त्यः पुलहः क्रतुः । (१५।१)

मरुत्तश्च मरीचिश्च स्थाणुश्चात्रिर् महातपाः ॥ (१५।२)

कक्षीवान् गौतमस्तार्क्ष्यस्तथा वैश्वानरो मुनिः । (१६।१)

षडर्तुः कवषो धूम्रो रैभ्यो नलपरावसू । (१६।२)

स्वस्त्यात्रेयो जरत्कारुः कहोﾱअः काश्यपस्तथा । (१६।३)

विभण्डको ऋष्यशृङ्ग उन्मुखो विमुखस्तथा । (१६।४)

मुनिः कालकवृक्षीय आश्राव्यो ऽथ हिरण्यदः । (१६।५)

संवर्तो देवहव्यश्च विष्वक्सेनश्च वीर्यवान् । (१६।६)

कण्वः कात्यायनो राजन् गार्ग्यः कौशिक एव तु ॥ (१६।७)

दिव्या आपस्तथौषध्यः श्रद्धा मेधा सरस्वती । (१७।१)

अर्थो धर्मश्च कामश्च विद्युतश्चापि पाण्डव ॥ (१७।२)

जलवाहास्तथा मेघा वायवः स्तनयित्नवः । (१८।१)

प्राची दिग् यज्ञवाहाश्च पावकाः सप्तविंशतिः ॥ (१८।२)

अग्नीषोमौ तथेन्द्राग्नी मित्रो ऽथ सवितार्यमा । (१९।१)

भगो विश्वे च साध्याश्च शुक्रो मन्थी च भारत । (१९।२)

सर्वेषां मरुतां मान्या गुरुः शुक्रस्तथैव च । (१९।३)

विश्वावसुश्चित्रसेनः सुमनस्तरुणस्तथा ॥ (१९।४)

यज्ञाश्च दक्षिणाश्चैव ग्रहाः स्तोभाश्च सर्वशः । (२०।१)

यज्ञवाहाश्च ये मन्त्राः सर्वे तत्र समासते ॥ (२०।२)

तथैवाप्सरसो राजन् गन्धर्वाश्च मनोरमाः । (२१।१)

रम्भोर्वश्यथ मेनका । (२१।२)

घृताची पञ्चचूडा च विप्रचित्तिपुरोगमाः । (२१।३)

विश्वावसुश्चित्रसेनः पर्वतस्तुम्बुरुस्तथा । (२१।४)

विद्याधरास्तु राजेन्द्र । (२१।५)

नृत्यवादित्रगीतैश्च हास्यैश्च विविधैर् अपि । (२१।६)

रमयन्ति स्म नृपते देवराजं शतक्रतुम् ॥ (२१।७)

स्तुतिभिर् मङ्गलैश्चैव स्तुवन्तः कर्मभिस्तथा । (२२।१)

विक्रमैश्च महात्मानं बलवृत्रनिषूदनम् ॥ (२२।२)

ब्रह्मराजर्षयः सर्वे सर्वे देवर्षयस्तथा । (२३।१)

विमानैर् विविधैर् दिव्यैर् भ्राजमानैर् इवाग्निभिः ॥ (२३।२)

स्रग्विणो भूषिताश्चान्ये यान्ति चायान्ति चापरे । (२४।१)

बृहस्पतिश्च शुक्रश्च तस्याम् आययतुः सह ॥ (२४।२)

एते चान्ये च बहवो यतात्मानो यतव्रताः । (२५।१)

विमानैश्चन्द्रसंकाशैः सोमवत् प्रियदर्शनाः । (२५।२)

ब्रह्मणो वचनाद् राजन् भृगुः सप्तर्षयस्तथा ॥ (२५।३)

एषा सभा मया राजन् दृष्टा पुष्करमालिनी । (२६।१)

शतक्रतोर् महाराज याम्यां शृणु ममानघ ॥ (२६।२)