उत्तर उवाच । (१।१)

सुवर्णविकृतानीमान्यायुधानि महात्मनाम् । (१।२)

रुचिराणि प्रकाशन्ते पार्थानाम् आशुकारिणाम् ॥ (१।३)

क्व नु स्विद् अर्जुनः पार्थः कौरव्यो वा युधिष्ठिरः । (२।१)

नकुलः सहदेवश्च भीमसेनश्च पाण्डवः ॥ (२।२)

सर्व एव महात्मानः सर्वामित्रविनाशनाः । (३।१)

राज्यम् अक्षैः पराकीर्य न श्रूयन्ते कदाचन ॥ (३।२)

द्रौपदी क्व च पाञ्चाली स्त्रीरत्नम् इति विश्रुता । (४।१)

जितान् अक्षैस्तदा कृष्णा तान् एवान्वगमद् वनम् ॥ (४।२)

अर्जुन उवाच । (५।१)

अहम् अस्म्यर्जुनः पार्थः सभास्तारो युधिष्ठिरः । (५।२)

बल्लवो भीमसेनस्तु पितुस्ते रसपाचकः ॥ (५।३)

अश्वबन्धो ऽथ नकुलः सहदेवस्तु गोकुले । (६।१)

सैरन्ध्रीं द्रौपदीं विद्धि यत्कृते कीचका हताः ॥ (६।२)

उत्तर उवाच । (७।१)

दश पार्थस्य नामानि यानि पूर्वं श्रुतानि मे । (७।२)

प्रब्रूयास्तानि यदि मे श्रद्दध्यां सर्वम् एव ते ॥ (७।३)

अर्जुन उवाच । (८।१)

हन्त ते ऽहं समाचक्षे दश नामानि यानि मे । (८।२)

अर्जुनः फल्गुनो जिष्णुः किरीटी श्वेतवाहनः । (८।३)

बीभत्सुर् विजयः कृष्णः सव्यसाची धनंजयः ॥ (८।४)

उत्तर उवाच । (९।१)

केनासि विजयो नाम केनासि श्वेतवाहनः । (९।२)

किरीटी नाम केनासि सव्यसाची कथं भवान् ॥ (९।३)

अर्जुनः फल्गुनो जिष्णुः कृष्णो बीभत्सुर् एव च । (१०।१)

धनंजयश्च केनासि प्रब्रूहि मम तत्त्वतः । (१०।२)

श्रुता मे तस्य वीरस्य केवला नामहेतवः ॥ (१०।३)

अर्जुन उवाच । (११।१)

सर्वाञ् जनपदाञ् जित्वा वित्तम् आच्छिद्य केवलम् । (११।२)

मध्ये धनस्य तिष्ठामि तेनाहुर् मां धनंजयम् ॥ (११।३)

अभिप्रयामि संग्रामे यद् अहं युद्धदुर्मदान् । (१२।१)

नाजित्वा विनिवर्तामि तेन मां विजयं विदुः ॥ (१२।२)

श्वेताः काञ्चनसंनाहा रथे युज्यन्ति मे हयाः । (१३।१)

संग्रामे युध्यमानस्य तेनाहं श्वेतवाहनः ॥ (१३।२)

उत्तराभ्यां च पूर्वाभ्यां फल्गुनीभ्याम् अहं दिवा । (१४।१)

जातो हिमवतः पृष्ठे तेन मां फल्गुनं विदुः ॥ (१४।२)

पुरा शक्रेण मे दत्तं युध्यतो दानवर्षभैः । (१५।१)

किरीटं मूर्ध्नि सूर्याभं तेन माहुः किरीटिनम् ॥ (१५।२)

न कुर्यां कर्म बीभत्सं युध्यमानः कथंचन । (१६।१)

तेन देवमनुष्येषु बीभत्सुर् इति मां विदुः ॥ (१६।२)

उभौ मे दक्षिणौ पाणी गाण्डीवस्य विकर्षणे । (१७।१)

तेन देवमनुष्येषु सव्यसाचीति मां विदुः ॥ (१७।२)

पृथिव्यां चतुरन्तायां वर्णो मे दुर्लभः समः । (१८।१)

करोमि कर्म शुक्लं च तेन माम् अर्जुनं विदुः ॥ (१८।२)

अहं दुरापो दुर्धर्षो दमनः पाकशासनिः । (१९।१)

तेन देवमनुष्येषु जिष्णुनामास्मि विश्रुतः ॥ (१९।२)

कृष्ण इत्येव दशमं नाम चक्रे पिता मम । (२०।१)

कृष्णावदातस्य सतः प्रियत्वाद् बालकस्य वै ॥ (२०।२)

वैशंपायन उवाच । (२१।१)

ततः पार्थं स वैराटिर् अभ्यवादयद् अन्तिकात् । (२१।२)

अहं भूमिंजयो नाम नाम्नाहम् अपि चोत्तरः ॥ (२१।३)

दिष्ट्या त्वां पार्थ पश्यामि स्वागतं ते धनंजय । (२२।१)

लोहिताक्ष महाबाहो नागराजकरोपम । (२२।२)

यद् अज्ञानाद् अवोचं त्वां क्षन्तुम् अर्हसि तन्मम ॥ (२२।३)

यतस्त्वया कृतं पूर्वं विचित्रं कर्म दुष्करम् । (२३।१)

अतो भयं व्यतीतं मे प्रीतिश्च परमा त्वयि ॥ (२३।२)