युधिष्ठिर उवाच । (१।१)

कीदृशो जापको याति निरयं वर्णयस्व मे । (१।२)

कौतूहलं हि मे जातं तद् भवान् वक्तुम् अर्हति ॥ (१।३)

भीष्म उवाच । (२।१)

धर्मस्यांशः प्रसूतो ऽसि धर्मिष्ठो ऽसि स्वभावतः । (२।२)

धर्ममूलाश्रयं वाक्यं शृणुष्वावहितो ऽनघ ॥ (२।३)

अमूनि यानि स्थानानि देवानां परमात्मनाम् । (३।१)

नानासंस्थानवर्णानि नानारूपफलानि च ॥ (३।२)

दिव्यानि कामचारीणि विमानानि सभास्तथा । (४।१)

आक्रीडा विविधा राजन् पद्मिन्यश्चामलोदकाः ॥ (४।२)

चतुर्णां लोकपालानां शुक्रस्याथ बृहस्पतेः । (५।१)

मरुतां विश्वदेवानां साध्यानाम् अश्विनोर् अपि ॥ (५।२)

रुद्रादित्यवसूनां च तथान्येषां दिवौकसाम् । (६।१)

एते वै निरयास्तात स्थानस्य परमात्मनः ॥ (६।२)

अभयं चानिमित्तं च न च क्लेशभयावृतम् । (७।१)

द्वाभ्यां मुक्तं त्रिभिर् मुक्तम् अष्टाभिस्त्रिभिर् एव च ॥ (७।२)

चतुर्लक्षणवर्जं तु चतुष्कारणवर्जितम् । (८।१)

अप्रहर्षम् अनानन्दम् अशोकं विगतक्लमम् ॥ (८।२)

कालः संपच्यते तत्र न कालस्तत्र वै प्रभुः । (९।१)

स कालस्य प्रभू राजन् स्वर्गस्यापि तथेश्वरः ॥ (९।२)

आत्मकेवलतां प्राप्तस्तत्र गत्वा न शोचति । (१०।१)

ईदृशं परमं स्थानं निरयास्ते च तादृशाः ॥ (१०।२)

एते ते निरयाः प्रोक्ताः सर्व एव यथातथम् । (११।१)

तस्य स्थानवरस्येह सर्वे निरयसंज्ञिताः ॥ (११।२)